कृष्ण यजुर्वेदीय तैत्तिरीय ब्राह्मणे काठकम्
प्रथमः प्रश्नः

काठकम् प्रश्न १

ओं नमः परमात्मने, श्री महागणपतये नमः

श्री गुरुभ्यो नमः, ह॒रिः॒ ओं

३. कृष्ण यजुर्वेदीय तैत्तिरीय ब्राह्मणे तृतीयाष्टकं

ॐ
अनुवाकेषु नवसु लेखासु नाभ्यां चेष्टकोपधानं स्वयमातृण्णोपधानं चोच्यते
सं॒ज्ञान॑व्ँवि॒ज्ञानं॑ प्र॒ज्ञानं॑ जा॒नद॑भिजा॒नत्⁠। स॒कंल्प॑मानं प्र॒कल्प॑मानमुप॒कल्प॑मान॒मुप॑क्लृप्तं क्लृ॒प्तम्⁠। श्रेयो॒ वसी॑य आ॒यथ्संभू॑तं भू॒तम्⁠॥ चि॒त्रः के॒तुः प्र॒भाना॒भान्थ् स॒भांन्⁠। ज्योति॑ष्मा॒ꣴ॒स्तेज॑स्वाना॒तप॒ꣴ॒स्तप॑न्नभि॒तप॑न्न्⁠। रो॒च॒नो रोच॑मानःशोभ॒नःशोभ॑मानः क॒ल्याणः॑⁠॥ दर्‌शा॑ दृ॒ष्टा द॑र्‌श॒ता वि॒श्वरू॑पा सुदर्‌श॒ना⁠। आ॒प्याय॑माना॒ प्याय॑माना॒प्याया॑ सू॒नृतेरा᳚⁠। आ॒पूर्य॑माणा॒ पूर्य॑माणा पू॒रय॑न्ती पू॒र्णा पौ᳚र्णमा॒सी⁠॥ दा॒ता प्र॑दा॒ताऽऽन॒न्दो मोदः॑ प्रमो॒दः⁠ ॥ [१] (१०) आ॒वे॒शय॑न्निवे॒शय᳚न्थ्स॒व्ँवेश॑नः॒ सꣴशा᳚न्तः शा॒न्तः⁠। आ॒भव॑न् प्र॒भव᳚न्थ्स॒भंव॒न्थ्संभू॑तो भू॒तः⁠॥ प्रस्तु॑त॒व्ँविष्टु॑त॒ꣳ॒ सꣴस्तु॑तं क॒ल्याण॑व्ँवि॒श्वरू॑पम्⁠। शु॒क्रम॒मृतं॑ तेज॒स्वि तेजः॒ समि॑द्धम्⁠। अ॒रु॒णं भा॑नु॒मन् मरी॑चिमदभि॒तप॒त् तप॑स्वत्⁠॥ स॒वि॒ता प्र॑सवि॒ता दी॒प्तो दी॒पय॒न् दीप्य॑मानः⁠। ज्वलं॑ ज्वलि॒ता तप॑न् वि॒तप᳚न्थ्स॒न्तप॑न्न्⁠। रो॒च॒नो रोच॑मानः शु॒भूंः शुंभ॑मानो वा॒मः⁠॥ सु॒ता सु॑न्व॒ती प्रसु॑ता सू॒यमा॑नाऽभिषू॒यमा॑णा⁠। पीती᳚ प्र॒पा स॒पां तृप्ति॑स्त॒र्पय॑न्ती⁠ ॥ [२] (१०) का॒न्ता का॒म्या का॒मजा॒ताऽऽयु॑ष्मती काम॒दुघा᳚⁠॥ अ॒भि॒शा॒स्ताऽनु॑म॒न्ताऽऽन॒न्दो मोदः॑ प्रमो॒दः⁠। आ॒सा॒दय॑न् निषा॒दय᳚न्थ्स॒ꣳ॒साद॑नः॒ सꣳस॑न्नः स॒न्नः⁠। आ॒भू र्वि॒भूः प्र॒भूः श॒भूं र्भुवः॑⁠॥ प॒वित्रं॑ पवियि॒ष्यन् पू॒तो मेद्ध्यः॑⁠। यशो॒ यश॑स्वाना॒युर॒मृतः॑⁠। जी॒वो जी॑वि॒ष्यन् थ्स्व॒र्गो लो॒कः⁠॥ सह॑स्वा॒न् थ्सही॑या॒नोज॑स्वा॒न् थ्सह॑मानः⁠। जय॑न्नभि॒जय᳚न्थ्सु॒द्रवि॑णो द्रविणो॒दाः⁠। आ॒र्द्रप॑वित्रो॒ हरि॑केशो॒ मोदः॑ प्रमो॒दः⁠ ॥ [३] (१०) अ॒रु॒णो॑ऽरु॒णर॑जाः पु॒ण्डरी॑को विश्व॒जिद॑भि॒जित्⁠। आ॒र्द्रः पिन्व॑मा॒नोऽन्न॑वा॒न्रस॑वा॒निरा॑वान्⁠। स॒र्वौ॒ष॒धः स॑भं॒रो मह॑स्वान्⁠॥ ए॒ज॒त्का जो॑व॒त्काः⁠। ख्‍षु॒ल्ल॒काः शि॑पिविष्ट॒काः⁠। स॒रि॒स्त्र॒राः सु॒शेर॑वः⁠। अ॒जि॒रासो॑ गमि॒ष्णवः॑⁠॥ इ॒दानीं᳚ त॒दानी॑मे॒तर्‌हि॑ ख्‍षि॒प्रम॑जि॒रम्⁠। आ॒शु र्नि॑मे॒षः फ॒णो द्रव॑न्नति॒द्रव॑न्न्⁠। त्वर॒ꣴ॒ स्त्वर॑माण आ॒शुराशी॑याञ्ज॒वः {आ॒शुराशी॑यान् ज॒वः}⁠॥ अ॒ग्नि॒ष्टो॒म उ॒क्थ्यो॑ऽतिरा॒त्रो द्वि॑रा॒त्रस्त्रि॑रा॒त्रश्च॑तूरा॒त्रः⁠। अ॒ग्निर्‌ऋ॒तुः सूर्य॑ ऋ॒तुश्च॒न्द्रमा॑ ऋ॒तुः⁠॥ प्र॒जाप॑तिः सव्ँवथ्स॒रो म॒हान्कः⁠ ॥ [४] (१३) (प्र॒मो॒द स्त॒र्पय॑न्ती प्रमो॒दो ज॒वस्त्रीणि॑ च) ॥१॥
अनुवाकेषु नवसु लेखासु नाभ्यां चेष्टकोपधानं
भूर॒ग्निं च॑ पृथि॒वीं च॒ मां च॑⁠। त्रीꣴश्च॑ लो॒कान् थ्स॑व्ँवथ्स॒रं च॑⁠। प्र॒जाप॑तिस्त्वा सादयतु⁠। तया॑ दे॒वत॑याऽङ्गिंर॒स्वद्ध्रु॒वा सी॑द⁠॥ भुवो॑ वा॒युं चा॒न्तरि॑ख्‍षं च॒ मां च॑⁠। त्रीꣴश्च॑ लो॒कान् थ्स॑व्ँवथ्स॒रं च॑⁠। प्र॒जाप॑तिस्त्वा सादयतु⁠। तया॑ दे॒वत॑याऽ ङ्गिंर॒स्वद् ध्रु॒वा सी॑द⁠। स्व॑रादि॒त्यं च॒ दिवं॑ च॒ मां च॑⁠। त्रीꣴश्च॑ लो॒कान् थ्स॑व्ँवथ्स॒रं च॑⁠। प्र॒जाप॑तिस्त्वा सादयतु⁠। तया॑ दे॒वत॑याऽङ्गिंर॒स्वद् ध्रु॒वा सी॑द⁠। भूर्भुवः॒ स्व॑श्च॒न्द्रम॑सं च॒ दिश॑श्च॒ मां च॑⁠। त्रीꣴश्च॑ लो॒कान् थ्स॑वंथ्स॒रं च॑⁠। प्र॒जाप॑तिस्त्वा सादयतु⁠। तया॑ दे॒वत॑याऽङ्गिर॒स्वद् ध्रु॒वा सी॑द⁠ ॥ [५] (१६) (स॒व्ँव॒थ्स॒रं॒ च॒ षट् च॑) ॥२॥
अनुवाकेषु नवसु लेखासु नाभ्यां चेष्टकोपधानं स्वयमातृण्णोपधानं चोच्यते
त्वमे॒व त्वाव्ँवे᳚त्थ॒ यो॑ऽसि॒ सोऽसि॑⁠। त्वमे॒व त्वाम॑चैषीः⁠। चि॒तश्चासि॒ संचि॑तश्चास्यग्ने⁠। ए॒तावा॒ꣴ॒श्चासि॒ भूया॑ꣴश्चास्यग्ने⁠। यत्ते॑ अग्ने॒ न्यू॑न॒य्ँयदु॒ तेऽति॑रिक्तम्⁠। आ॒दि॒त्यास्तदंङ्गि॑रसश्चिन्वन्तु⁠। विश्वे॑ ते दे॒वाश्चिति॒मापू॑रयन्तु⁠। चि॒तश्चासि॒ संचि॑तश्चास्यग्ने⁠। ए॒तावा॒ꣴ॒श्चासि॒ भूया॑ꣴश्चास्यग्ने⁠। मा ते॑ अग्नेऽच॒येन॒ माऽति॑ च॒ येनायु॒रावृ॑ख्‍षि⁠। सव॑र्षां॒ ज्योति॑षां॒ ज्योति॒ र्यद॒दावु॒देति॑⁠। तप॑सो जा॒तमनि॑भृष्ट॒मोजः॑⁠। तत्ते॒ ज्योति॑रिष्टके⁠। तेन॑ मे तप⁠। तेन॑ मे ज्वल⁠। तेन॑ मे दीदिहि⁠। याव॑द्दे॒वाः⁠। याव॒दसा॑ति॒ सूर्यः॑⁠। याव॑दु॒तापि॒ ब्रह्म॑⁠ ॥ [६] (१९) (आवृ॑ख्‍षि॒ नव॑ च) ॥३॥
अनुवाकेषु नवसु लेखासु नाभ्यां चेष्टकोपधानं स्वयमातृण्णोपधानं चोच्यते
स॒व्ँव॒थ्स॒रो॑ऽसि परिवथ्स॒रो॑ऽसि⁠। इ॒दा॒व॒थ्स॒रो॑ऽसीदुवथ्स॒रो॑ऽसि⁠। इ॒द्व॒थ्स॒रो॑ऽसि वथ्स॒रो॑ऽसि⁠। तस्य॑ ते वस॒न्तः शिरः॑⁠। ग्री॒ष्मो दख्‍षि॑णः प॒ख्‍षः⁠। व॒र॒षाः पुच्छ᳚म्⁠। श॒रदुत्त॑रः प॒ख्‍षः⁠। हे॒म॒न्तो मद्ध्य᳚म्⁠। पू॒र्व॒प॒ख्‍षाश्चित॑यः⁠। अ॒प॒र॒प॒ख्‍षाः पुरी॑षम्⁠ ॥ [७] (१०) अ॒हो॒रा॒त्राणीष्ट॑काः⁠। ऋ॒ष॒भो॑ऽसि स्व॒र्गो लो॒कः⁠। यस्यां᳚ दि॒शि म॒हीय॑से⁠। ततो॑ नो॒ मह॒ आव॑ह⁠। वा॒यु र्भू॒त्वा सर्वा॒ दिश॒ आवा॑हि⁠। सर्वा॒ दिशोऽनु॒ विवा॑हि⁠। सर्वा॒ दिशोऽनु॒ सव्ँवा॑हि⁠। चित्त्या॒ चिति॒मापृ॑ण⁠। अचि॑त्त्या॒ चिति॒मापृ॑ण⁠। चिद॑सि समु॒द्रयो॑निः⁠ ॥ [८] (१०) इन्दु॒ र्दख्‍षः॑ श्ये॒न ऋ॒तावा᳚⁠। हिर॑ण्यपख्‍षः शकु॒नो भु॑र॒ण्युः⁠। म॒हान् थ्स॒धस्थे᳚ ध्रु॒व आनिष॑त्तः⁠। नम॑स्ते अस्तु॒ मा मा॑ हिꣳसीः⁠। एति॒ प्रेति॒ वीति॒ समित्युदिति॑⁠। दिवं॑ मे यच्छ⁠। अ॒न्तरि॑ख्‍षं मे यच्छ⁠। पृ॒थि॒वीं मे॑ यच्छ⁠। पृ॒थि॒वीं मे॑ यच्छ⁠। अ॒न्तरि॑ख्‍षं मे यच्छ⁠। दिवं॑ मे यच्छ⁠। अह्ना॒ प्रसा॑रय⁠। रात्र्या॒ सम॑च⁠। रात्र्या॒ प्रसा॑रय⁠। अह्ना॒ सम॑च⁠। कामं॒ प्रसा॑रय⁠। काम॒ꣳ॒ सम॑च⁠ ॥ [९] (१७) (पुरी॑षꣳ समु॒द्रयो॑निः पृथि॒वीं मे॑ यच्छा॒न्तरि॑ख्‍षं मे यच्छ स॒प्त च॑) ॥४॥
अनुवाकेषु नवसु लेखासु नाभ्यां चेष्टकोपधानं
भूर्भुवः॒ स्वः॑⁠। ओजो॒ बल᳚म्⁠। ब्रह्म॑ ख्‍ष॒त्रम्⁠। यशो॑ म॒हत्⁠। स॒त्यं तपो॒ नाम॑⁠। रू॒पम॒मृत᳚म्⁠। चख्‍षुः॒ श्रोत्र᳚म्⁠। मन॒ आयुः॑⁠। विश्व॒य्ँयशो॑ म॒हः⁠। स॒मं तपो॒ हरो॒ भाः⁠। जा॒तवे॑दा॒ यदि॑ वा पाव॒कोऽसि॑⁠। वै॒श्वा॒न॒रो यदि॑ वा वैद्यु॒तोऽसि॑⁠। शं प्र॒जाभ्यो॒ यज॑मानाय लो॒कम्⁠। ऊर्जं॒ पुष्टिं॒ दद॑द॒भ्याव॑वृथ्स्व⁠ ॥ [१०] (१४) (भाश्च॒त्वारि॑ च) ॥५॥
अनुवाकेषु नवसु लेखासु नाभ्यां चेष्टकोपधानं
राज्ञी॑ विराज्ञी᳚⁠। स॒म्राज्ञी᳚ स्व॒राज्ञी᳚⁠। अ॒र्चिः शो॒चिः⁠। तपो॒ हरो॒ भाः⁠। अ॒ग्निरिन्द्रो॒ बृह॒स्पतिः॑⁠। विश्वे॑ दे॒वा भुव॑नस्य गो॒पाः⁠। ते मा॒ सर्वे॒ यश॑सा॒ सꣳसृ॑जन्तु⁠ ॥ [११] (७) ॥६॥
अनुवाकेषु नवसु लेखासु नाभ्यां चेष्टकोपधानं स्वयमातृण्णोपधानं चोच्यते
अस॑वे॒ स्वाहा॒ वस॑वे॒ स्वाहा᳚⁠। विभु॑वे॒ स्वाहा॒ विव॑स्वते॒ स्वाहा᳚⁠। अ॒भि॒भुवे॒ स्वाहाऽधि॑पतये॒ स्वाहा᳚⁠। दि॒वांपत॑ये॒ स्वाहा॑ऽꣳहस्प॒त्याय॒ स्वाहा᳚⁠। चा॒ख्‍षु॒ष्म॒त्याय॒ स्वाहा᳚ ज्योतिष्म॒त्याय॒ स्वाहा᳚⁠। राज्ञे॒ स्वाहा॑ वि॒राज्ञे॒ स्वाहा᳚⁠। स॒म्राज्ञे॒ स्वाहा᳚ स्व॒राज्ञे॒ स्वाहा᳚⁠। शूषा॑य॒ स्वाहा॒ सूर्या॑य॒ स्वाहा᳚⁠। च॒न्द्रम॑से॒ स्वाहा॒ ज्योति॑षे॒ स्वाहा᳚⁠। स॒ꣳ॒सर्पा॑य॒ स्वाहा॑ क॒ल्याणा॑य॒ स्वाहा᳚⁠। अर्जु॑नाय॒ स्वाहा᳚⁠ ॥ [१२] (११) (क॒ल्याणा॑य॒ स्वाहैकं॑ च) ॥७॥
अनुवाकेषु नवसु लेखासु नाभ्यां चेष्टकोपधानं स्वयमातृण्णोपधानं चोच्यते
वि॒प॒श्चिते॒ पव॑मानाय गायत⁠। म॒ही न धाराऽत्यन्धो॑ अर्‌षति⁠। अहि॑र्‌ह जी॒र्णामति॑सर्पति॒ त्वच᳚म्⁠। अत्यो॒ न क्रीड॑न्न सर॒द्वृषा॒ हरिः॑⁠। उ॒प॒या॒मगृ॑हीतोऽसि मृ॒त्यवे᳚ त्वा॒ जुष्टं॑ गृह्णामि⁠। ए॒ष ते॒ योनि॑र्मृ॒त्यवे᳚ त्वा⁠॥ अप॑ मृ॒त्युमप॒ख्‍षुध᳚म्⁠। अपे॒तः श॒पथं॑ जहि⁠। अधा॑ नो अग्न॒ आव॑ह⁠। रा॒यस्पोष॑ꣳ सह॒स्रिण᳚म्⁠ ॥ [१३] (१०) ये ते॑ स॒हस्र॑म॒युतं॒ पाशाः᳚⁠। मृत्यो॒ मर्त्या॑य॒ हन्त॑वे⁠। तान्‌य॒ज्ञस्य॑ मा॒यया᳚⁠। सर्वा॒नव॑ यजामहे⁠॥ भ॒ख्‍षो᳚ऽस्यमृत भ॒ख्‍षः⁠। तस्य॑ ते मृ॒त्युपी॑तस्या॒मृत॑वतः⁠। स्व॒गाकृ॑तस्य॒ मधु॑मतः⁠। उप॑हूत॒स्योप॑हूतो भख्‍षयामि⁠॥ म॒न्द्राऽभिभू॑तिः के॒तु र्य॒ज्ञाना॒व्ँवाक्⁠। असा॒वेहि॑⁠ ॥ [१४] (१०) अ॒न्धो जागृ॑विः प्राण⁠। असा॒वेहि॑⁠। ब॒धि॒र आ᳚क्रन्दयितरपान⁠। असा॒वेहि॑⁠। अ॒ह॒स्तोस्त्वा॒ चख्‍षुः॑⁠। असा॒वेहि॑⁠। अ॒पा॒दाशो॒ मनः॑⁠। असा॒वेहि॑⁠। कवे॒ विप्र॑चित्ते॒ श्रोत्र॑⁠। असा॒वेहि॑⁠ ॥ [१५] (१०) सु॒ह॒स्तः सु॑वा॒साः⁠। शू॒षो नामा᳚स्य॒मृतो॒ मर्त्ये॑षु⁠। तन्त्वा॒ऽहं तथा॒ वेद॑⁠। असा॒वेहि॑⁠। अ॒ग्निर्मे॑ वा॒चि श्रि॒तः⁠। वाग्घृद॑ये⁠। हृद॑यं॒ मयि॑⁠। अ॒हम॒मृते᳚⁠। अ॒मृतं॒ ब्रह्म॑णि⁠। वा॒युर्मे᳚ प्रा॒णे श्रि॒तः⁠ ॥ [१६] (१०) प्रा॒णो हृद॑ये⁠। हृद॑यं॒ मयि॑⁠। अ॒हम॒मृते᳚⁠। अ॒मृतं॒ ब्रह्म॑णि⁠। सूर्यो॑ मे॒ चख्‍षु॑षि श्रि॒तः⁠। चख्‍षु॒र्॒‌हृद॑ये⁠। हृद॑यं॒ मयि॑⁠। अ॒हम॒मृते᳚⁠। अ॒मृतं॒ ब्रह्म॑णि⁠। च॒न्द्रमा॑ मे॒ मन॑सि श्रि॒तः⁠ ॥ [१७] (१०) मनो॒ हृद॑ये⁠। हृद॑यं॒ मयि॑⁠। अ॒हम॒मृते᳚⁠। अ॒मृतं॒ ब्रह्म॑णि⁠। दिशो॑ मे॒ श्रोत्रे᳚ श्रि॒ताः⁠। श्रोत्र॒ꣳ॒ हृद॑ये⁠। हृद॑यं॒ मयि॑⁠। अ॒हम॒मृते᳚⁠। अ॒मृतं॒ ब्रह्म॑णि⁠। आपो॑ मे॒ रेत॑सि श्रि॒ताः⁠ ॥ [१८] (१०) रेतो॒ हृद॑ये⁠। हृद॑यं॒ मयि॑⁠। अ॒हम॒मृते᳚⁠। अ॒मृतं॒ ब्रह्म॑णि⁠। पृ॒थि॒वी मे॒ शरी॑रे श्रि॒ता⁠। शरी॑र॒ꣳ॒ हृद॑ये⁠। हृद॑यं॒ मयि॑⁠। अ॒हम॒मृते᳚⁠। अ॒मृतं॒ ब्रह्म॑णि⁠। ओ॒ष॒धि॒व॒न॒स्प॒तयो॑ मे॒ लोम॑सु श्रि॒ताः⁠ ॥ [१९] (१०) लोमा॑नि॒ हृद॑ये⁠। हृद॑यं॒ मयि॑⁠। अ॒हम॒मृते᳚⁠। अ॒मृतं॒ ब्रह्म॑णि⁠। इन्द्रो॑ मे॒ बले᳚ श्रि॒तः⁠। बल॒ꣳ॒ हृद॑ये⁠। हृद॑यं॒ मयि॑⁠। अ॒हम॒मृते᳚⁠। अ॒मृतं॒ ब्रह्म॑णि⁠। प॒र्जन्यो॑ मे मू॒र्द्ध्नि श्रि॒तः⁠ ॥ [२०] (१०) मू॒द्‌र्धा हृद॑ये⁠। हृद॑यं॒ मयि॑⁠। अ॒हम॒मृते᳚⁠। अ॒मृतं॒ ब्रह्म॑णि⁠। ईशा॑नो मे म॒न्यौ श्रि॒तः⁠। म॒न्युर्‌हृद॑ये⁠। हृद॑यं॒ मयि॑⁠। अ॒हम॒मृते᳚⁠। अ॒मृतं॒ ब्रह्म॑णि⁠। आ॒त्मा म॑ आ॒त्मनि॑ श्रि॒तः⁠ ॥ [२१] (१०) आ॒त्मा हृद॑ये⁠। हृद॑यं॒ मयि॑⁠। अ॒हम॒मृते᳚⁠। अ॒मृतं॒ ब्रह्म॑णि⁠। पुन॑र्म आ॒त्मा पुन॒रायु॒रागा᳚त्⁠। पुनः॑ प्रा॒णः पुन॒राकू॑त॒मागा᳚त्⁠। वै॒श्वा॒न॒रो र॒श्मिभि॑ र्वावृधा॒नः⁠। अ॒न्तस्ति॑ष्ठत्व॒मृत॑स्य गो॒पाः⁠ ॥ [२२] (८) (अ॒ग्निर् वा॒युः सूर्य॑ श्च॒न्द्रमा॒ दिश॒ आपः॑ पृथि॒ व्यो॑षधिवनस्प॒तय॒ इन्द्रः॑ प॒र्जन्य॒ ईशा॑न आ॒त्मा पुन॑र्मे॒ त्रयो॑दश) ॥८॥
अनुवाकेषु नवसु लेखासु नाभ्यां चेष्टकोपधानं स्वयमातृण्णोपधानं चोच्यते
प्र॒जाप॑ति र्दे॒वान॑सृजत⁠। ते पा॒प्मना॒ संदि॑ता अजायन्त⁠। तान् व्य॑द्यत्⁠। यद् व्य॒द्यत्⁠। तस्मा᳚द् वि॒द्युत्⁠। तम॑वृश्चत्⁠। यदवृ॑श्चत्⁠। तस्मा॒द् वृष्टिः॑⁠। तस्मा॒द् यत्रै॒ते दे॒वते॑ अभि॒प्राप्नु॑तः⁠। विच॑ है॒वास्य॒ तत्र॑ पा॒प्मान॒न्द्यतः॑⁠ ॥ [२३] (१०) वृ॒श्चत॑श्च⁠॥ सैषा मी॑मा॒ꣳ॒साऽग्नि॑हो॒त्र ए॒व स॑पंन्ना⁠। अथो॑ आहुः⁠। सर्वे॑षु यज्ञक्र॒तुष्विति॑⁠॥ होष्य॑न्न॒प उप॑स्पृशेत्⁠। विद्यु॑दसि॒ विद्य॑मे पा॒प्मान॒मिति॑⁠। अथ॑ हु॒त्वोप॑स्पृशेत्⁠। वृष्टि॑रसि॒ वृश्च॑ मे पा॒प्मान॒मिति॑⁠। य॒ख्‍ष्यमा॑णो वे॒ष्ट्वा वा᳚⁠। वि च॑ है॒वास्यै॒ते दे॒वते॑ पा॒प्मानं॒ द्यतः॑⁠ ॥ [२४] (१०) वृ॒श्चत॑श्च⁠॥ अ॒त्य॒ꣳ॒हो हारु॑णिः⁠। ब्र॒ह्म॒चा॒रिणे᳚ प्र॒श्नान् प्रोच्य॒ प्रजि॑घाय⁠। परे॑हि⁠। प्ल॒ख्‍षं दैयां᳚ (दैय्यां᳚) पातिं पृच्छ⁠। वेत्थ॑ सावि॒त्रां(३) न वे॒त्था(३) इति॑⁠। तमा॒गत्य॑ पप्रच्छ⁠। आ॒चार्यो॑ मा॒ प्राहै॑षीत्⁠। वेत्थ॑ सावि॒त्रां(३) न वे॒त्था(३) इति॑⁠। सहो॑वाच॒ वेदेति॑⁠ ॥ [२५] (१०) स कस्मि॒न् प्रति॑ष्ठित॒ इति॑⁠। प॒रोर॑ज॒सीति॑⁠। कस्तद्यत् प॒रोर॑जा॒ इति॑⁠। ए॒ष वाव स प॒रोर॑जा॒ इति॑ होवाच⁠। य ए॒ष तप॑ति⁠। ए॒षो᳚ऽर्वाग्र॑जा॒ इति॑⁠। स कस्मि॑न् त्वे॒ष इति॑⁠। स॒त्य इति॑⁠। किं तथ्स॒त्यमिति॑⁠। तप॒ इति॑⁠ ॥ [२६] (१०) कस्मि॒न्नु तप॒ इति॑⁠। बल॒ इति॑⁠। किं तद् ब॒लमिति॑⁠। प्रा॒ण इति॑⁠। मास्म॑ प्रा॒णमति॑ पृच्छ॒ इति॑ माऽऽचा॒र्यो᳚ऽब्रवी॒दिति॑ होवाच ब्रह्मचा॒री⁠॥ सहो॑वाच प्ल॒ख्‍षो दैयां᳚ (दैय्यां᳚) पातिः⁠। यद्वै ब्र॑ह्मचारिन् प्रा॒णमत्य॑प्रख्‍ष्यः⁠। मू॒द्‌र्धा ते॒ व्यप॑तिष्यत्⁠। अ॒हमु॑त आचा॒र्याच्छ्रेया᳚न् भविष्यामि⁠। यो मा॑ सावि॒त्रे स॒मवा॑दि॒ष्टेति॑⁠ ॥ [२७] (१०) तस्मा᳚थ् सावि॒त्रे न सव्ँव॑देत⁠॥ स यो ह॒वै सा॑वि॒त्रव्ँवि॒दुषा॑ सावि॒त्रे स॒व्ँवद॑ते⁠। सहा᳚स्मि॒ञ्छ्रियं॑ दधाति⁠। अनु॑ ह॒वा अ॑स्मा अ॒सौ तप॒ञ्छ्रियं॑ मन्यते⁠। अन्व॑स्मै॒ श्रीस्तपो॑ मन्यते⁠। अन्व॑स्मै॒ तपो॒ बलं॑ मन्यते⁠। अन्व॑स्मै॒ बलं॑ प्रा॒णं म॑न्यते⁠॥ स यदाह॑⁠। स॒ज्ञांन॑व्ँवि॒ज्ञानं॒ दर्‌शा॑ दृ॒ष्टेति॑⁠। ए॒ष ए॒व तत्⁠ ॥ [२८] (१०) अथ॒ यदाह॑⁠। प्रस्तु॑त॒व्ँविष्टु॑तꣳ सु॒ता सु॑न्व॒तीति॑⁠। ए॒ष ए॒व तत्⁠॥ ए॒ष ह्ये॑व तान्यहा॑नि⁠। ए॒ष रात्र॑यः⁠॥ अथ॒ यदाह॑⁠। चि॒त्रः के॒तु र्दा॒ता प्र॑दा॒ता स॑वि॒ता प्र॑सवि॒ताऽभि॑शा॒स्ताऽनु॑म॒न्तेति॑⁠। ए॒ष ए॒व तत्⁠। ए॒ष ह्ये॑व तेऽह्नो॑ मुहू॒र्ताः⁠। ए॒ष रात्रेः᳚⁠ ॥ [२९] (१०) अथ॒ यदाह॑⁠। प॒वित्रं॑ पवयि॒ष्यन्थ्सह॑स्वा॒न्थ्सही॑यानरु॒णो॑ ऽरु॒णर॑जा॒ इति॑⁠। ए॒ष ए॒व तत्⁠। ए॒ष ह्ये॑व ते᳚ऽद्‌र्धमा॒साः⁠। ए॒ष मासाः᳚⁠॥ अथ॒ यदाह॑⁠। अ॒ग्नि॒ष्टो॒म उ॒क्थ्यो᳚ऽग्निर्‌ऋ॒तुः प्र॒जाप॑तिः सव्ँवथ्स॒र इति॑⁠। ए॒ष ए॒व तत्⁠। ए॒ष ह्ये॑व ते य॑ज्ञक्र॒तवः॑⁠। ए॒ष ऋ॒तवः॑⁠ ॥ [३०] (१०) ए॒ष स॑व्ँवथ्स॒रः⁠॥ अथ॒ यदाह॑⁠। इ॒दानीं᳚ त॒दानी॒मिति॑⁠। ए॒ष ए॒व तत्⁠। ए॒ष ह्ये॑व ते मु॑हू॒र्तानां᳚ मुहू॒र्ताः⁠॥ ज॒न॒को ह॒ वै दे॑हः⁠। अ॒हो॒रा॒त्रैः स॒माज॑गाम⁠। तꣳ हो॑चुः⁠। यो वा अ॒स्मान्‌वेद॑⁠। वि॒जह॑त्पा॒प्मान॑मेति⁠ ॥ [३१] (१०) सर्व॒मायु॑रेति⁠। अ॒भि स्व॒र्गल्ँलो॒कं ज॑यति⁠। नास्या॒मुष्मि॑ल्ँलो॒केऽन्नं॑ ख्‍षीयत॒ इति॑⁠॥ वि॒जह॑द्ध॒ वै पा॒प्मान॑मेति⁠। सर्व॒मायु॑रेति⁠। अ॒भि स्व॒र्गल्ँलो॒कं ज॑यति⁠। नास्या॒मुष्मि॑ल्ँलो॒केऽन्नं॑ ख्‍षीयते⁠। य ए॒वव्ँवेद॑⁠॥ अही॑ना॒ हाश्व॑त्थ्यः⁠। सा॒वि॒त्रव्ँवि॒दां च॑कार⁠ ॥ [३२] (१०) स ह॑ ह॒ꣳ॒सो हि॑र॒ण्मयो॑ भू॒त्वा⁠। स्व॒र्गल्ँलो॒कमि॑याय⁠। आ॒दि॒त्यस्य॒ सायु॑ज्यम्⁠॥ ह॒ꣳ॒सो ह॒वै हि॑र॒ण्मयो॑ भू॒त्वा⁠। स्व॒र्गल्ँलो॒कमे॑ति⁠। आ॒दि॒त्यस्य॒ सायु॑ज्यम्⁠। य ए॒वव्ँवेद॑⁠॥ दे॒व॒भा॒गो ह॑ श्रौत॒र्॒‌षः⁠। सा॒वि॒त्रव्ँवि॒दां च॑कार⁠। तꣳ ह॒ वागदृ॑श्यमा॒नाऽभ्यु॑वाच⁠ ॥ [३३] (१०) सर्व॑म्बत गौत॒मो वे॑द⁠। यः सा॑वि॒त्रव्ँवेदेति॑⁠। स हो॑वाच⁠। कैषा वाग॒सीति॑⁠। अ॒यम॒हꣳ सा॑वि॒त्रः⁠। दे॒वाना॑मुत्त॒मो लो॒कः⁠। गुह्यं॒ महो॒ बिभ्र॒दिति॑⁠। ए॒ताव॑ति ह गौत॒मः⁠। य॒ज्ञो॒प॒वी॒तं कृ॒त्वाऽधो निप॑पात⁠। नमो॒ नम॒ इति॑⁠ ॥ [३४] (१०) स हो॑वाच⁠। मा भै॑षी र्गौतम⁠। जि॒तो वै ते॑ लो॒क इति॑⁠॥ तस्मा॒द्ये के च॑ सावि॒त्रव्ँवि॒दुः⁠। सर्वे॒ ते जि॒तलो॑काः⁠॥ स यो ह॒वै सा॑वि॒त्रस्या॒ष्टाख्‍ष॑रं प॒दꣴ श्रि॒याऽभिषि॑क्त॒व्ँवेद॑⁠। श्रि॒या है॒वाभिषि॑च्यते⁠। घृणि॒रिति॒ द्वे अ॒ख्‍षरे᳚⁠। सूर्य॒ इति॒ त्रीणि॑⁠। आ॒दि॒त्य इति॒ त्रीणि॑⁠ ॥ [३५] (१०) ए॒तद्वै सा॑वि॒त्रस्या॒ष्टाख्‍ष॑रं प॒दꣴ श्रि॒याभिषि॑क्तम्⁠। य ए॒वव्ँवेद॑⁠। श्रि॒या है॒वाभिषि॑च्यते⁠॥ तदे॒तदृ॒चाऽभ्यु॑क्तम्⁠। ऋ॒चो अ॒ख्‍षरे॑ पर॒मे व्यो॑मन्न्⁠। यस्मि॑न् दे॒वा अधि॒ विश्वे॑ निषे॒दुः⁠। यस्तन्न वेद॒ किमृ॒चा क॑रिष्यति⁠। य इत् तद्वि॒दुस्त इ॒मे समा॑सत॒ इति॑⁠॥ न ह॒वा ए॒तस्य॒र्चा न यजु॑षा॒ न साम्नाऽर्थो᳚ऽस्ति⁠। यः सा॑वि॒त्रव्ँवेद॑⁠ ॥ [३६] (१०) तदे॒तत् प॑रि॒ यद्दे॑वच॒क्रम्⁠। आ॒र्द्रं पिन्व॑मानꣴ स्व॒र्गे लो॒क ए॑ति⁠। वि॒जह॒द् विश्वा॑ भू॒तानि॑ स॒पंश्य॑त्⁠॥ आ॒र्द्रो ह॒ वै पिन्व॑मानः स्व॒र्गे लो॒क ए॑ति⁠। वि॒जह॒न् विश्वा॑ भू॒तानि॑ स॒पंश्य॑न्न्⁠। य ए॒वव्ँवेद॑⁠॥ शू॒षो ह॒वै वा᳚र्ष्णे॒यः⁠। आ॒दि॒त्येन॑ स॒माज॑गाम⁠। तꣳ हो॑वाच⁠। एहि॑ सावि॒त्रव्ँवि॑द्धि⁠। अ॒यव्ँवै स्व॒र्ग्यो᳚ऽग्निः पा॑रयि॒ष्णुर॒मृता॒थ्संभू॑त॒ इति॑⁠। ए॒ष वाव स सा॑वि॒त्रः⁠। य ए॒ष तप॑ति⁠। एहि॒ माव्ँवि॑द्धि⁠। इति॑ है॒वैनं॒ तदु॑वाच⁠ ॥ [३७] (१५) (प्र॒जाप॑तिर्दे॒वान् स॒ज्ञांनं॒ प्रस्तु॑तं॒ तान्यहा᳚न्ये॒ष रात्र॑यास्चि॒त्र के॒तुस्तेऽह्नो॑ मुहू॒र्तो रात्रेः᳚ प॒वित्रं॒ ते᳚ऽर्ध मा॒सा अ॑ग्निष्टो॒मो य॑ज्ञक्र॒तव॑ इ॒दानीं᳚ मुहू॒र्तानां᳚ जन॒कोऽही॑ना देवभा॒गः कैषा वाङ्म शू॒षो ह॒ वै षोड॑श) ॥९॥
अनुवाकेषु नवसु लेखासु नाभ्यां चेष्टकोपधानं स्वयमातृण्णोपधानं चोच्यते
इ॒यव्ँवाव स॒रघा᳚⁠। तस्या॑ अ॒ग्निरे॒व सा॑र॒घं मधु॑⁠। या ए॒ताः पू᳚र्वपख्‍षापरप॒ख्‍षयो॒ रात्र॑यः⁠। ता म॑धु॒कृतः॑⁠। यान्यहा॑नि⁠। ते म॑धुवृ॒षाः⁠। स यो ह॒ वा ए॒ता म॑धु॒कृत॑श्च मधुवृ॒षाꣴश्च॒ वेद॑⁠। कु॒र्वन्ति॑ हास्यै॒ता अ॒ग्नौ मधु॑⁠। नास्ये᳚ष्टापू॒र्तं ध॑यन्ति⁠॥ अथ॒ यो न वेद॑⁠ ॥ [३८] (१०) न हा᳚स्यै॒ता अ॒ग्नौ मधु॑ कुर्वन्ति⁠। धय॑न्त्यस्येष्टापू॒र्तम्⁠॥ यो ह॒ वा अ॑होरा॒त्राणा᳚न्नाम॒धेया॑नि॒ वेद॑⁠। नाहो॑रा॒त्रेष्वार्ति॒मार्च्छ॑ति⁠। स॒ज्ञांन॑व्ँवि॒ज्ञानं॒ दर्‌शा॑ दृ॒ष्टेति॑⁠। ए॒ताव॑नुवा॒कौ पू᳚र्वप॒ख्‍षस्या॑होरा॒त्राणां᳚ नाम॒धेया॑नि⁠। प्रस्तु॑त॒व्ँविष्टु॑तꣳ सु॒ता सु॑न्व॒तीति॑⁠। ए॒ताव॑नुवा॒काव॑परप॒ख्‍षस्या॑होरा॒त्राणां᳚ नाम॒धेया॑नि⁠। नाहो॑रा॒त्रेष्वार्ति॒मार्च्छ॑ति⁠। य ए॒वव्ँवेद॑⁠ ॥ [३९] (१०) यो ह॒ वै मु॑हू॒र्तानां᳚ नाम॒धेया॑नि॒ वेद॑⁠। न मु॑हू॒र्तेष्वार्ति॒मार्च्छ॑ति⁠। चि॒त्रः के॒तु र्दा॒ता प्र॑दा॒ता स॑वि॒ता प्र॑सवि॒ताऽभि॑शा॒स्ताऽनु॑म॒न्तेति॑⁠। ए॒ते॑ऽनुवा॒का मु॑हू॒र्तानां᳚ नाम॒धेया॑नि⁠। न मु॑हू॒र्तेष्वार्ति॒मार्च्छ॑ति⁠। य ए॒वव्ँवेद॑⁠॥ यो ह॒ वा अ॑द्‌र्धमा॒साना᳚ञ्च॒ मासा॑नाञ्च नाम॒धेया॑नि॒ वेद॑⁠। नाद्‌र्ध॑मा॒सेषु॒ न मासे॒ष्वार्ति॒मार्च्छ॑ति⁠। प॒वित्रं॑ पवयि॒ष्यन्थ्सह॑स्वा॒न्थ्सही॑यानरु॒णो॑ऽरु॒णर॑जा॒ इति॑⁠। ए॒ते॑ऽनुवा॒का अ॑द्‌र्धमा॒साना᳚ञ्च॒ मासा॑नाञ्च नाम॒धेया॑नि⁠ ॥ [४०] (१०) नाद्‌र्ध॑म॒सेषु॒ न मासे॒ष्वार्ति॒मार्च्छ॑ति⁠। य ए॒वव्ँवेद॑⁠॥ यो ह॒ वै य॑ज्ञक्रतू॒नां च॑र्तू॒नां च॑ सव्ँवथ्स॒रस्य॑ च नाम॒धेया॑नि॒ वेद॑⁠। न य॑ज्ञक्र॒तुषु॒ नर्तुषु॒ न स॑व्ँवथ्स॒र आर्ति॒मार्च्छ॑ति⁠। अ॒ग्नि॒ष्टो॒म उ॒क्थ्यो᳚ऽग्निर्‌ऋ॒तुः प्र॒जाप॑तिः सव्ँवथ्स॒र इति॑⁠। ए॒ते॑ऽनुवा॒का य॑ज्ञक्रतू॒नां च॑र्तू॒नां च॑ सव्ँवथ्स॒रस्य॑ च नाम॒धेया॑नि⁠। न य॑ज्ञक्र॒तुषु॒ नर्तुषु॒ न स॑व्ँवथ्स॒र आर्ति॒मार्च्छ॑ति⁠। य ए॒वव्ँवेद॑⁠॥ यो ह॒ वै मु॑हू॒र्तानां᳚ मुहू॒र्तान्‌वेद॑⁠। न मु॑हू॒र्तानां᳚ मुहू॒र्तेष्वार्ति॒ मार्च्छ॑ति⁠ ॥ [४१] (१०) इ॒दानीं᳚ त॒दानी॒मिति॑⁠। ए॒ते वै मु॑हू॒र्तानां᳚ मुहू॒र्ताः⁠। न मु॑हू॒र्तानां᳚ मुहू॒र्तेष्वार्ति॒मार्च्छ॑ति⁠। य ए॒वव्ँवेद॑⁠॥ अथो॒ यथा᳚ ख्‍षेत्र॒ज्ञो भू॒त्वाऽनु॑ प्र॒विश्यान्न॒मत्ति॑⁠। ए॒वमे॒वैतान् ख्‍षे᳚त्र॒ज्ञो भू॒त्वाऽनु॑ प्र॒विश्यान्न॑मत्ति⁠। स ए॒तेषा॑मे॒व स॑लो॒कता॒ꣳ॒ सायु॑ज्यमश्नुते⁠। अप॑ पुनर्मृ॒त्युं ज॑यति⁠। य ए॒वव्ँवेद॑⁠ ॥ [४२] (९) (इ॒यम॑होरा॒त्राणा॑ꣳ स॒ज्ञांनं॑ पूर्वप॒ख्‍षस्य॒ प्रस्तु॑तमपरप॒ख्‍षस्य॑ मुहू॒र्तानां᳚ चि॒त्रः के॒तुर॑द्‌र्धमा॒सानां᳚ प॒वित्र॑य्ँयज्ञक्रतू॒नाम॑ग्निष्टो॒मो य॑ज्ञक्रतू॒नामि॒दानीं᳚ मुहू॒र्तानां᳚ मुहू॒र्तान्‌वे॒देदानी॒मथो॒ द्वाद॑श) ॥१०॥
अनुवाकेषु नवसु लेखासु नाभ्यां चेष्टकोपधानं स्वयमातृण्णोपधानं चोच्यते
कश्चि॑द्ध॒वा अ॒स्माल्लो॒कात् प्रेत्य॑⁠। आ॒त्मान॑व्ँवेद⁠। अ॒यम॒हम॒स्मीति॑⁠। कश्चि॒थ्स्वल्ँलो॒कं न प्रति॒ प्रजा॑नाति⁠॥ अ॒ग्निमु॑ग्धो है॒व धु॒मता᳚न्तः⁠। स्वल्ँलो॒कं न प्रति॒ प्रजा॑नाति⁠। अथ॒ यो है॒वैतम॒ग्निꣳ सा॑वि॒त्रव्ँवेद॑⁠। स ए॒वास्मा ल्लो॒कात् प्रेत्य॑⁠। आ॒त्मान॑व्ँवेद⁠। अ॒यम॒हम॒स्मीति॑⁠ ॥ [४३] (१०) स स्वल्ँलो॒कं प्रति॒ प्रजा॑नाति⁠॥ ए॒ष उ॑ वे॒वैनं॒ तथ्सा॑वि॒त्रः⁠। स्व॒र्गल्ँलो॒कम॒भिव॑हति⁠॥ अ॒हो॒रा॒त्रै र्वा इदꣳ स॒युग्भिः॑ क्रियते⁠। इ॒ति॒ रा॒त्राया॑ दीख्‍षिषत⁠। इ॒ति॒ रा॒त्राय॑ व्र॒तमुपा॑गु॒रिति॑⁠। तानि॒ हाने॑वव्ँवि॒दुषः॑⁠। अ॒मुष्मि॑ल्ँलो॒के शे॑व॒धिं ध॑यन्ति⁠। धी॒तꣳ है॒व स शे॑व॒धिमनु॒परै॑ति⁠॥ अथ॒ यो है॒वैतम॒ग्निꣳ सा॑वि॒त्रव्ँवेद॑⁠ ॥ [४४] (१०) तस्य॑ है॒वाहो॑रा॒त्राणि॑⁠। अ॒मुष्मि॑ल्ँलो॒के शे॑व॒धिं न ध॑यन्ति⁠। अधी॑तꣳ है॒व स शे॑व॒धिमनु॒परै॑ति⁠॥ भ॒रद्वा॑जो ह त्रि॒भिरायु॑र्भि र्ब्रह्म॒चर्य॑मुवास⁠। तꣳ ह॒ जीर्णि॒ꣴ॒ स्थवि॑र॒ꣳ॒ शया॑नम्⁠। इन्द्र॑ उप॒व्रज्यो॑ वाच⁠। भर॑द्वाज⁠। यत्ते॑ चतु॒र्थमायु॑र्द॒द्याम्⁠। किमे॑नेन कुर्या॒ इति॑⁠। ब्र॒ह्म॒चर्य॑मे॒वैने॑न चरेय॒मिति॑ होवाच⁠ ॥ [४५] (१०) तꣳ ह॒ त्रीन् गि॒रिरू॑पा॒न वि॑ज्ञातानिव दर्‌श॒यां च॑कार⁠। तेषा॒ꣳ॒ हैकै॑कस्मान् मु॒ष्टिनाऽऽद॑दे⁠। स हो॑वाच⁠। भर॑द्वा॒जेत्या॒मन्‌त्र्य॑⁠। वेदा॒ वा ए॒ते⁠। अ॒न॒न्ता वै वेदाः᳚⁠। ए॒तद्वा ए॒तै स्त्रि॒भिरायु॑र्भि॒रन्व॑वोचथाः⁠। अथ॑ त॒ इत॑र॒दन॑नूक्तमे॒व⁠। एही॒मव्ँवि॑द्धि⁠। अ॒यव्ँवै स॑र्व वि॒द्येति॑⁠ ॥ [४६] (१०) तस्मै॑ है॒तम॒ग्निꣳ सा॑वि॒त्रमु॑वाच⁠। तꣳ स वि॑दि॒त्वा⁠। अ॒मृतो॑ भू॒त्वा⁠। स्व॒र्गल्ँलो॒कमि॑याय⁠। आ॒दि॒त्यस्य॒ सायु॑ज्यम्⁠॥ अ॒मृतो॑ है॒व भू॒त्वा⁠। स्व॒र्गल्ँलो॒कमे॑ति⁠। आ॒दि॒त्यस्य॒ सायु॑ज्यम्⁠। य ए॒वव्ँवेद॑⁠॥ ए॒षो ए॒व त्रयी॑ वि॒द्या⁠ ॥ [४७] (१०) याव॑न्तꣳ ह॒ वै त्र॒य्या वि॒द्यया॑ लो॒कं ज॑यति⁠। ताव॑न्तल्ँलो॒कं ज॑यति⁠। य ए॒वव्ँवेद॑⁠॥ अ॒ग्ने र्वा ए॒तानि॑ नाम॒धेया॑नि⁠। अ॒ग्नेरे॒व सायु॑ज्यꣳ सलो॒कता॑माप्नोति⁠। य ए॒वव्ँवेद॑⁠। वा॒यो र्वा ए॒तानि॑ नाम॒धेया॑नि⁠। वा॒योरे॒व सायु॑ज्यꣳ सलो॒कता॑माप्नोति⁠। य ए॒वव्ँवेद॑⁠। इन्द्र॑स्य॒ वा ए॒तानि॑ नाम॒धेया॑नि⁠ ॥ [४८] (१०) इन्द्र॑स्यै॒व सायु॑ज्यꣳ सलो॒कता॑माप्नोति⁠। य ए॒वव्ँवेद॑⁠। बृह॒स्पते॒ र्वा ए॒तानि॑ नाम॒धेया॑नि⁠। बृह॒स्पते॑रे॒व सायु॑ज्यꣳ सलो॒कता॑माप्नोति⁠। य ए॒वव्ँवेद॑⁠। प्र॒जाप॑ते॒ र्वा ए॒तानि॑ नाम॒धेया॑नि⁠। प्र॒जाप॑तेरे॒व सायु॑ज्यꣳ सलो॒कता॑माप्नोति⁠। य ए॒वव्ँवेद॑⁠। ब्रह्म॑णो॒ वा ए॒तानि॑ नाम॒धेया॑नि⁠। ब्रह्म॑ण ए॒व सायु॑ज्यꣳ सलो॒कता॑माप्नोति⁠। य ए॒वव्ँवेद॑⁠॥ स वा ए॒षो᳚ऽग्निर॑पख्‍षपु॒च्छो वा॒युरे॒व⁠। तस्या॒ग्नि र्मुख᳚म्⁠। अ॒सावा॑दि॒त्यः शिरः॑⁠। स यदे॒ते दे॒वते॒ अन्त॑रेण⁠। तथ्सर्व॑ꣳ सीव्यति⁠। तस्मा᳚थ् सावि॒त्रः⁠ ॥ [४९] (१७) (अ॒ग्नेर्वा॒योरिन्द्र॑स्य॒ बृह॒स्पतेः᳚ प्र॒जाप॑ते॒र् ब्रह्म॑णः॒ स वै स॒प्त) ॥११॥
अनुवाकाः पञ्चशती
११ ४९