Ganapati Atharvashirsha with Svara — गणपत्यथर्वशीर्षोपनिषत् (Taittiriya)

ओं भ॒द्रं दधा॑तु⁠। ओं भ॒द्रं कर्णे॑भिश्शृणु॒याम॑ देवाः⁠। भ॒द्रं प॑श्येमा॒ख्‍षभि॒र् यज॑त्राः⁠। स्थि॒रैरङ्गै᳚स्तुष्ठु॒वाꣳ स॑स्त॒नूभिः॑⁠। व्यशे॑म दे॒वहि॑त॒य्ँयदायुः॑⁠। स्व॒स्ति न॒ इन्द्रो॑ वृ॒द्धश्र॑वाः⁠। स्व॒स्तिनः॑ पू॒षावि॒श्ववे॑दाः⁠। स्व॒स्ति न॒स्तार्ख्‍ष्यो॒ अरि॑ष्टनेमिः⁠। स्व॒स्ति नो॒ बृह॒स्पति॑र् दधातु⁠॥ ओं शान्तिः॒ शान्तिः॒ शान्तिः॑⁠॥ अथ गणपत्यथर्व शीर्‌षव्ँव्या᳚ख्यास्स्या॒मः⁠। ओं नम॑स्ते ग॒णप॑तये⁠। त्वमे॒व प्र॒त्यख्‍षं॒ तत्त्व॑मसि⁠। त्वमे॒व के॒वलं॒ कर्त्ता॑ऽसि⁠। त्वमे॒व के॒वलं॒ धर्त्ता॑ऽसि⁠। त्वमे॒व के॒वलं॒ हर्त्ता॑ऽसि⁠। त्वमेवसर्वं खल्विदं॑ ब्रह्मा॒सि⁠। त्वं साख्‍षादात्मा॑ऽसि नि॒त्यं⁠॥ १ ऋ॑तव्ँव॒च्मि⁠। स॑त्यव्ँव॒च्मि⁠॥ २ अव॑ त्वं॒ मां⁠। अव॑ व॒क्तारं᳚⁠। अव॑ श्रो॒तारं᳚⁠। अव॑ दा॒तारं᳚⁠। अव॑ धा॒तारं᳚⁠। अवानूचानम॑व शि॒ष्यं⁠। अव॑ प॒श्चात्ता᳚त्⁠। अव॑ पु॒रस्ता᳚त्⁠। अवोत्त॒रात्ता᳚त्⁠। अव॑ दख्‍षि॒णात्ता᳚त्⁠। अव॑ चो॒र्द्‌ध्वात्ता᳚त्⁠। अवा ध॒रात्ता᳚त्⁠। सर्वतोमां पाहि पाहि॑ सम॒न्तात्⁠॥ ३ त्वव्ँवाङ्मयस्त्वं॑ चिन्म॒यः⁠। त्वमानन्दमयस्त्वं॑ ब्रह्म॒मयः⁠। त्वं सच्चिदानन्दाऽद्वि॑तीयो॒ऽसि⁠। त्वं प्र॒त्यख्‍षं॒ ब्रह्मा॑सि⁠। त्वं ज्ञानमयो विज्ञान॑मयो॒ऽसि⁠॥ ४ सर्वं जगदिदं त्व॑त्तो जा॒यते⁠। सर्वं जगदिदं त्व॑त्तस्ति॒ष्ठति⁠। सर्वं जगदिदं त्वयि लय॑मे॒ष्यति⁠। सर्वं जगदिदं त्वयि॑ प्रत्ये॒ति⁠। त्वं भूमिरापोऽनलोऽनि॑लो न॒भः⁠। त्वं चत्वारि वा᳚क् पदा॒नि⁠॥ ५ त्वं गु॒णत्र॑याती॒तः⁠। त्वं अ॒वस्थात्र॑याती॒तः⁠। त्वं दे॒हत्र॑याती॒तः⁠। त्वं का॒लत्र॑याती॒तः⁠। त्वं मूलाधारस्थितो॑ऽसिनि॒त्यं⁠। त्वं शक्तित्र॑यात्म॒कः⁠। त्वाय्ँयोगिनो ध्याय॑न्ति नि॒त्यं⁠। त्वं ब्रह्मात्वंविष्णुस्त्वंरुद्रस्त्वमिन्द्रस्त्वमग्निस्त्वंवायुस्त्वं सूर्यस्त्वं चन्द्रमास्त्वंब्रह्म॒ भूर्भुव॒स्सु॒वरों⁠॥ ६ ग॒णादिं᳚ (ग॒णादिं॑) पूर्व॑मुच्चा॒र्य॒ व॒र्णादिं᳚ (व॒र्णादिं॑) तदन॒न्तरं⁠। अनुस्वारः प॑रत॒रः⁠। अर्द्धे᳚न्दुल॒सितं⁠। तारे॑ण ऋ॒द्धं⁠। एतत्तवमनु॑स्वरू॒पं⁠। गकारः पू᳚र्व रू॒पं⁠। अकारो मद्ध्य॑म रू॒पं⁠। अनुस्वारश्चा᳚न्त्य रू॒पं⁠। बिन्दुरुत्त॑र रू॒पं⁠। नादः॑ सन्धा॒नं⁠। सꣳहि॑ता स॒न्धिः⁠। सैषा गणे॑शवि॒द्या⁠। गण॑क ऋ॒षिः⁠। निचृद् गाय॑त्रीच्छ॒न्दः⁠। (श्रीमहा) गणपति॑र् देव॒ता⁠॥ ⁠। ७ ओं गं गणपतये॒ नमः॑⁠॥ एकद॒न्ताय॑ वि॒द्महे॑ वक्रतु॒ण्डाय॑ धीमहि⁠। तन्नो॑ दन्तिः (दन्ती) प्रचो॒दया᳚त् ⁠॥ ८ ए॒क॒द॒न्तं च॑तुर्‌ह॒स्तं॒ पा॒शम॑ङ्कुश॒ धारि॑णं⁠। रद॑ञ्च॒ वर॑दं ह॒स्तै॒र् बि॒भ्राणं॑ मूष॒कध्व॑जं⁠। रक्त॑ल्ँलं॒बोद॑रं शू॒र्प॒क॒र्णकं॑ रक्त॒वास॑सं⁠। रक्त॑ग॒न्धानु॑लिप्ता॒ङ्गं॒ र॒क्तपु॑ष्पैः सु॒पूजि॑तं⁠। भक्ता॑नु॒कंपि॑नं दे॒वं॒ ज॒गत्का॑रण॒मच्यु॑तं⁠। आवि॑र् भू॒तं च॑ सृ॒ष्ट्या॒दौ॒ प्र॒कृतेः᳚ पुरु॒षात् प॑रं⁠। एवं॑ ध्या॒यति॑ योनि॒त्यं॒ स॒ योगी॑ योगि॒नाव्ँव॑रः⁠॥ ९ नमो व्रातपतये, नमो गणपतये, नमः प्रमथपतये, नमस्ते अस्तु लंबोदराय, एकदन्ताय, विघ्न(वि)नाशिने, शिवसुताय श्रीवरदमूर्त्तये॒ नमः (नमो॒ नमः॑)⁠॥ १० एतदथर्व शीर्‌ष॑य्ँयोऽधी॒ते⁠। स ब्रह्मभूया॑य क॒ल्पते⁠। स सर्व विघ्नै᳚र् न बा॒द्ध्यते⁠। स सर्वतः सुख॑मेध॒ते⁠। स पञ्च महापापा᳚त् प्रमु॒च्यते⁠। सा॒यम॑धीया॒नो॒ दिवसकृतं पापं॑ नाश॒यति⁠। प्रा॒तर॑धीया॒नो॒ रात्रिकृतं पापं॑ नाश॒यति⁠। सा॒यं प्रा॒तः प्र॑युञ्जा॒नो॒ पापोऽपा॑पो भ॒वति⁠। सर्वत्राधीयानोऽपवि॑घ्नो भ॒वति⁠। धर्मार्त्थकाममोख्‍षं॑ च वि॒न्दति⁠। इदमथर्वशीर्‌षमशिष्याय॑ न दे॒यं⁠। यो यदि मो॑हाद् दा॒स्यति⁠। स पापी॑यान् भ॒वति⁠। सहस्रावर्तनाद्यय्ँयं काम॑मधी॒ते⁠। तं तमने॑न सा॒धयेत्⁠॥ ११ अनेन गणपतिम॑भिषि॒ञ्चति⁠। स वा᳚ग्मी भ॒वति⁠। चतुर्त्थ्या मन॑श्नन् ज॒पति⁠। स विद्या॑वान् भ॒वति⁠। इत्यथर्व॑ण वा॒क्यं⁠। ब्रह्माद्यावर॑णव्ँवि॒द्यात्⁠। न बिभेति कदा॑चने॒ति⁠॥ १२ यो दूर्वाङ्कु॑रैर् य॒जति⁠। स वैश्रवणोप॑मो भ॒वति⁠। यो ला॑जैर् य॒जति⁠। स यशो॑वान् भ॒वति⁠। स मेधा॑वान् भ॒वति⁠। यो मोदकसहस्रे॑ण य॒जति⁠। स वाञ्छितफलम॑वाप्नो॒ति⁠। यः साज्यसमि॑द्भिर् य॒जति⁠। स सर्वल्ँलभते स स॑र्वल्ँल॒भते⁠॥ १३ अष्टौ ब्राह्मणान् सम्यग्ग्रा॑हयि॒त्वा⁠। सूर्य वर्च॑स्वी भ॒वति⁠। सूर्यग्रहे म॑हान॒द्यां॒ प्रतिमासन्निधौ॑ वा ज॒प्त्वा⁠। सिद्ध म॑न्त्रो भ॒वति⁠। महा विघ्ना᳚त् प्रमु॒च्यते⁠। महा दोषा᳚त् प्रमु॒च्यते⁠। महा प्रत्यवाया᳚त् प्रमु॒च्यते⁠। महा पापा᳚त् प्रमु॒च्यते⁠। स सर्व विद्भवति स सर्व॑ विद्भ॒वति⁠। य ए॒वव्ँवेद॑⁠। इत्यु॑प॒निष॑त्⁠॥ १४ स॒ह ना॑ववतु⁠। स॒ह नौ॑ भुनक्तु⁠। स॒ह वी॒र्यं॑ करवावहै⁠। ते॒ज॒स्विना॒ वधीतमस्तु॒ मा वि॑द्विषा॒वहै᳚⁠॥ ओं शान्तिः॒ शान्तिः॒ शान्तिः॑⁠॥ ओं भ॒द्रं दधा॑तु⁠। ओं भ॒द्रं कर्णे॑भिः शृणु॒याम॑ देवाः⁠। भ॒द्रं प॑श्येमा॒ख्‍षभि॒र् यज॑त्राः⁠। स्थि॒रैरङ्गै᳚स्तुष्ठु॒वाꣳ स॑स्त॒नूभिः॑⁠। व्यशे॑म दे॒वहि॑त॒य्ँयदायुः॑⁠। स्व॒स्ति न॒ इन्द्रो॑ वृ॒द्धश्र॑वाः⁠। स्व॒स्ति नः॑ पू॒षा वि॒श्ववे॑दाः⁠। स्व॒स्ति न॒स्तार्ख्‍ष्यो॒ अरि॑ष्टनेमिः⁠। स्व॒स्ति नो॒ बृह॒स्पति॑र् दधातु⁠॥

॥ ओं शान्तिः॒ शान्तिः॒ शान्तिः॑ ॥

Sections	१
Mantras	१
Version	5.0