२६.नख्षत्रं उत्तरप्रोष्ठ॒पदा /देवता अहिर्बुद्ध्नियः
अहि॑र् बु॒द्ध्नियः॒ प्रथ॑मान एति। श्रेष्ठो॑ दे॒वाना॑मु॒त मानु॑षाणां। तं ब्रा᳚ह्म॒णास्सो॑म॒पास्सो॒म्यासः॑। प्रो॒ष्ठ॒प॒दासो॑ अ॒भि र॑ख्षन्ति॒ सर्वे᳚। च॒त्वार॒ एक॑म॒भि कर्म॑ दे॒वाः। प्रो॒ष्ठ॒प॒दास॒ इति॒ यान्वद॑न्ति। ते बु॒द्धनियं॑ परि॒षद्य॑ꣴ स्तु॒वन्तः॑। अहि॑ꣳ रख्षन्ति॒ नम॑सोप॒सद्य॑॥पू॒षा रे॒वत्यन्वे॑ति॒ पन्थां᳚। पु॒ष्टि॒पती॑ पशु॒पा वाज॑बस्त्यौ। इ॒मानि॑ ह॒व्या प्रय॑ता जुषा॒णा। सु॒गैर्नो॒ यानै॒रुप॑याताय्ँय॒ज्ञं। ख्षु॒द्रान् प॒शून् र॑ख्षतु रे॒वती॑ नः। गावो॑ नो॒ अश्वा॒ꣳ॒ अन्वे॑तु पू॒षा। अन्न॒ रख्ष॑न्तौ बहु॒धा विरू॑पं। वाज॑ꣳ सनुता॒य्ँयज॑मानाय य॒ज्ञं॥२८ नख्षत्रं अश्विनी देवता अश्विनी देवौ
तद॒श्विना॑वश्व॒युजोप॑यातां। शुभ॒ङ्गमि॑ष्ठौ सु॒यमे॑भि॒रश्वैः᳚। स्वन्नख्ष॑त्र ह॒विषा॒ यज॑न्तौ। मद्ध्वा॒ संपृ॑क्तौ॒ यजु॑षा॒ सम॑क्तौ। यौ दे॒वानां᳚ भि॒षजौ॑ हव्यवा॒हौ। विश्व॑स्य दू॒ताव॒मृत॑स्य गो॒पौ। तौ नख्ष॑त्रं जुजुषा॒णोप॑यातां। नमो॒ऽश्विभ्यां᳚ कृणुमोऽश्व॒युग्भ्यां᳚॥अप॑ पा॒प्मानं॒ भर॑णीर् भरन्तु। तद् य॒मो राजा॒ भग॑वा॒न्॒विच॑ष्टां। लो॒कस्य॒ राजा॑ मह॒तो म॒हान्हि। सु॒गन्नः॒ पन्था॒मभ॑यं कृणोतु। यस्मि॒न् नख्ष॑त्रे य॒म एति॒ राजा᳚। यस्मि॑न्नेनम॒भ्यषि॑ञ्चन्त दे॒वाः। तद॑स्य चि॒त्रꣳ ह॒विषा॑ यजाम। अप॑ पा॒प्मानं॒ भर॑णीर् भरन्तु॥नि॒वेश॑नी स॒ङ्गम॑नी॒ वसू॑ना॒व्ँविश्वा॑ रू॒पाणि॒ वसू᳚न्यावे॒शय॑न्ती। स॒ह॒स्र॒पो॒ष सु॒भगा॒ ररा॑णा॒ सा न॒ आग॒न्॒वर्च॑सा सव्ँविदा॒ना। यत्ते॑ दे॒वा अद॑धुर् भाग॒धेय॒ममा॑वास्ये सं॒वँस॑न्तो महि॒त्वा। सा नो॑ य॒ज्ञं पि॑पृहि विश्ववारे र॒यिन्नो॑ धेहि सुभगे सु॒वीरं᳚॥नवो॑ नवो भवति॒ जाय॑मा॒नोऽह्नां᳚ के॒तुरु॒षसा॑ मे॒त्यग्रे᳚। भा॒गं दे॒वेभ्यो॒ विद॑धात्या॒यन् प्र च॒न्द्रमा᳚स्तिरिति दी॒र्घमायुः॑। यमा॑दि॒त्या अ॒ꣳ॒शुमा᳚प्या॒यय॑न्ति॒ यमख्षि॑त॒मख्षि॑तयः॒ पिब॑न्ति। तेन॑ नो॒ राजा॒ वरु॑णो॒ बृह॒स्पति॒राप्या॑ययन्तु॒ भुव॑नस्य गो॒पाः॥ये विरू॑पे॒ सम॑नसा स॒व्ँव्यय॑न्ती। स॒मा॒नं तन्तुं॑ परि तात॒नाते᳚। वि॒भू प्र॒भू अ॑नु॒भू वि॒श्वतो॑ हुवे। ते नो॒ नख्ष॑त्रे॒ हव॒माग॑मेतं। व॒यं दे॒वी ब्रह्म॑णा सव्ँविदा॒नाः। सु॒रत्ना॑सो दे॒ववी॑तिं॒ दधा॑नाः। अ॒हो॒रा॒त्रे ह॒विषा॑ व॒र्द्धय॑न्तः। अति॑ पा॒प्मान॒मति॑मुक्त्या गमेम॥प्रत्यु॑वदृश्याय॒ती। व्यु॒च्छन्ती॑ दुहि॒ता दि॒वः। अ॒पो म॒ही वृ॑णुते॒ चख्षु॑षा। तमो॒ ज्योति॑ष्कृणोति सू॒नरी᳚। उदु॒स्त्रिया᳚स्सचते॒ सूर्यः॑। सचा॑ उ॒द्यन्नख्ष॑त्र मर्चि॒मत्। तवे दु॑षो॒ व्युषि॒ सूर्य॑स्य च। सं भ॒क्तेन॑ गमेमहि॥तन्नो॒ नख्ष॑त्र मर्चि॒मत्। भा॒नु॒मत्तेज॑ उ॒च्छर॑त्। उप॑य॒ज्ञमि॒हाग॑मत्। प्रनख्ष॑त्राय दे॒वाय॑। इन्द्रा॒येन्दु॑ꣳ हवामहे। स न॑ स्सवि॒ता सु॑वथ् स॒निं। पु॒ष्टि॒दाव्ँवी॒रव॑त्तमं॥उदु॒त्यं जा॒तवे॑दसं दे॒वव्ँव॑हन्ति के॒तवः॑। दृ॒शे विश्वा॑य॒ सूर्यं᳚। चि॒त्रं दे॒वाना॒ मुद॑गा॒दनी॑कं॒ चख्षु॑र् मि॒त्रस्य॒ वरु॑णस्या॒ग्नेः। आऽप्रा॒ द्यावा॑पृथि॒वी अ॒न्तरि॑ख्ष॒ꣳ॒ सूर्य॑ आ॒त्मा जग॑तस्त॒स्थुष॑श्च॥अदि॑तिर् न उरुष्य॒त्वदि॑तिः॒ शर्म॑ यच्छतु। अदि॑तिः पा॒त्वꣳ ह॑सः। म॒हीमू॒षु मा॒तर॑ꣳ सुव्र॒ताना॑मृ॒तस्य॒ पत्नी॒ मव॑से हुवेम। तु॒वि॒ख्ष॒त्राम॒जर॑न्ती मुरू॒चीꣳ सु॒शर्मा॑ण॒मदि॑तिꣳ सु॒प्रणी॑तिं॥इ॒दं विष्णु॒र् विच॑क्रमे त्रे॒धा निद॑धे प॒दं। समू॑ढमस्य पाꣳ सु॒रे। प्रतद्विष्णुः॑ स्तवते वी॒र्या॑य। मृ॒गो न भी॒मः कु॑च॒रो गि॑रि॒ष्ठाः। यस्यो॒रुषु॑ त्रि॒षु वि॒क्रम॑णेषु। अधि॑ख्षि॒यन्ति॒ भुव॑नानि॒ विश्वा᳚॥अ॒ग्निर् मू॒र्द्धा दि॒वः क॒कुत्पतिः॑ पृथि॒व्या अ॒यं। अ॒पाꣳ रेता॑ꣳसि जिन्वति। भुवो॑ य॒ज्ञस्य॒ रज॑सश्च ने॒ता यत्रा॑ नि॒युद्भिः॒ सच॑से शि॒वाभिः॑। दि॒वि मू॒र्द्धानं॑ दधिषे सुव॒र्॒षां जि॒ह्वाम॑ग्ने चकृषे हव्य॒वाहं᳚॥अनु॑नो॒ऽद्यानु॑मतिर् य॒ज्ञं दे॒वेषु॑ मन्यतां। अ॒ग्निश्च॑ हव्य॒वाह॑नो॒ भव॑तां दा॒शुषे॒ मयः॑। अन्विद॑नुमते॒ त्वं मन्या॑सै॒ शंच॑ नः कृधि। क्रत्वे॒ दख्षा॑य नो हिनु॒ प्रण॒ आयू॑ꣳषि तारिषः॥ह॒व्य॒वाह॑मभिमाति॒षाहं᳚। र॒ख्षो॒हणं॒ पृत॑नासु जि॒ष्णुं। ज्योति॑ष्मन्तं॒ दीद्य॑तं॒ पुर॑न्धिं। अ॒ग्निꣴ स्वि॑ष्ट॒ कृत॒माहु॑वेम। स्वि॑ष्ट मग्ने अ॒भितत् पृ॑णाहि। विश्वा॑ देव॒ पृत॑ना अ॒भिष्य। उ॒रुन्नः॒ पन्थां᳚ प्रदि॒शन् विभा॑हि। ज्योति॑ष्मद्धेह्य॒ जर॑न्न॒ आयुः॑॥॥ ओं शान्तिः॒ शान्तिः॒ शान्तिः॑ ॥