कृष्ण यजुर्वेदीय तैत्तिरीय संहिता
प्रथमकाण्डे तृतीयः प्रश्नः

कांड १ प्रश्न ३
अग्निष्टोमे पशुः

ओं नमः परमात्मने, श्री महागणपतये नमः

श्री गुरुभ्यो नमः, ह॒रिः॒ ओं

ॐ
दे॒वस्य॑ त्वा सवि॒तुः प्र॑स॒वे᳚ऽश्विनो᳚र् बा॒हुभ्या᳚म्पू॒ष्णो हस्ता᳚भ्या॒माद॒देऽभ्रि॑रसि॒ नारि॑रसि॒ परि॑लिखित॒ꣳ॒ रख्‍षः॒ परि॑लिखिता॒ अरा॑तय इ॒दम॒हꣳ रख्‍ष॑सो ग्री॒वा अपि॑ कृन्तामि॒ यो᳚ऽस्मान् द्वेष्टि॒ यञ्च॑ व॒यन्द्वि॒ष्म इ॒दम॑स्य ग्री॒वा अपि॑ कृन्तामि दि॒वे त्वा॒ऽन्तरि॑ख्‍षाय त्वा पृथि॒व्यै त्वा॒ शुन्ध॑ताल्ँलो॒कः पि॑तृ॒षद॑नो॒ यवो॑ऽसि य॒वया॒स्मद्द्वेषो॑ [१] य॒वयारा॑तीः पितृ॒णाꣳ सद॑नम॒स्युद्दिव॑ꣴ स्तभा॒नाऽन्तरि॑ख्‍षम्पृण पृथि॒वीन्दृ॑ꣳह द्युता॒नस्त्वा॑ मारु॒तो मि॑नोतु मि॒त्रावरु॑णयोर् ध्रु॒वेण॒ धर्म॑णा ब्रह्म॒वनि॑न्त्वा ख्‍षत्र॒वनि॑ꣳ सुप्रजा॒वनि॑ꣳ रायस्पोष॒वनि॒म्पर्यू॑हामि॒ ब्रह्म॑ दृꣳह ख्‍ष॒त्रन्दृ॑ꣳह प्र॒जान्दृ॑ꣳह रा॒यस्पोष॑न्दृꣳह घृ॒तेन॑ द्यावापृथिवी॒ आ पृ॑णेथा॒मिन्द्र॑स्य॒ सदो॑ऽसि विश्वज॒नस्य॑ छा॒या परि॑ त्वा गिर्वणो॒ गिर॑ इ॒मा भ॑वन्तु वि॒श्वतो॑ वृ॒द्धायु॒मनु॒ वृद्ध॑यो॒ जुष्टा॑ भवन्तु॒ जुष्ट॑य॒ इन्द्र॑स्य॒ स्यूर॒सीन्द्र॑स्य ध्रु॒वम॑स्यै॒न्द्रम॒सीन्द्रा॑य त्वा⁠ [२] (द्वेष॑ इ॒मा अ॒ष्टाद॑श च) ॥१॥
र॒ख्‍षो॒हणो॑ वलग॒हनो॑ वैष्ण॒वान् ख॑नामी॒दम॒हन्तव्ँव॑ल॒गमुद्व॑पामि॒ यन्न॑स्समा॒नो यमस॑मानो निच॒खाने॒दमे॑न॒मध॑रङ्करोमि॒ यो न॑स्समा॒नो योऽस॑मानोऽराती॒यति॑ गाय॒त्रेण॒ छन्द॒साऽव॑बाढो वल॒गः किमत्र॑ भ॒द्रन्तन्नौ॑ स॒ह वि॒राड॑सि सपत्न॒हा स॒म्राड॑सि भ्रातृव्य॒हा स्व॒राड॑स्यभिमाति॒हा वि॑श्वा॒राड॑सि॒ विश्वा॑सान्ना॒ष्ट्राणा॑ꣳ ह॒न्ता [३] र॑ख्‍षो॒हणो॑ वलग॒हनः॒ प्रोख्‍षा॑मि वैष्ण॒वान् र॑ख्‍षो॒हणो॑ वलग॒हनोऽव॑ नयामि वैष्ण॒वान् यवो॑ऽसि य॒वया॒स्मद्द्वेषो॑ य॒वयारा॑ती रख्‍षो॒हणो॑ वलग॒हनोऽव॑ स्तृणामि वैष्ण॒वान् र॑ख्‍षो॒हणो॑ वलग॒हनो॒ऽभि जु॑होमि वैष्ण॒वान् र॑ख्‍षो॒हणौ॑ वलग॒हना॒वुप॑ दधामि वैष्ण॒वी र॑ख्‍षो॒हणौ॑ वलग॒हनौ॒ पर्यू॑हामि वैष्ण॒वी र॑ख्‍षो॒हणौ॑ वलग॒हनौ॒ परि॑ स्तृणामि वैष्ण॒वी र॑ख्‍षो॒हणौ॑ वलग॒हनौ॑ वैष्ण॒वी बृ॒हन्न॑सि बृ॒हद्ग्रा॑वा बृह॒तीमिन्द्रा॑य॒ वाच॑व्ँवद⁠ [४] (ह॒न्तेन्द्रा॑य॒ द्वे च॑) ॥२॥
वि॒भूर॑सि प्र॒वाह॑णो॒ वह्नि॑रसि हव्य॒वाह॑नः श्वा॒त्रो॑ऽसि॒ प्रचे॑तास्तु॒थो॑ऽसि वि॒श्ववे॑दा उ॒शिग॑सि क॒विरङ्घा॑रिरसि॒ बंभा॑रिरव॒स्युर॑सि॒ दुव॑स्वाञ्छु॒न्ध्यूर॑सि मार्जा॒लीय॑स्स॒म्राड॑सि कृ॒शानुः॑ परि॒षद्यो॑ऽसि॒ पव॑मानः प्र॒तक्वा॑ऽसि॒ नभ॑स्वा॒नसं॑मृष्टोऽसि हव्य॒सूद॑ ऋ॒तधा॑माऽसि॒ सुव॑र्ज्योति॒र् ब्रह्म॑ज्योतिरसि॒ सुव॑र्द्धामा॒ऽजो᳚ऽस्येक॑पा॒दहि॑रसि बु॒द्ध्नियो॒ रौद्रे॒णानी॑केन पा॒हि मा᳚ऽग्ने पिपृ॒हि मा॒ मा मा॑ हिꣳसीः⁠ [५] (अनी॑केना॒ष्टौ च॑) ॥३॥
त्वꣳ सो॑म तनू॒कृद्भ्यो॒ द्वेषो᳚भ्यो॒ऽन्यकृ॑तेभ्य उ॒रु य॒न्ताऽसि॒ वरू॑थ॒ꣴ॒ स्वाहा॑ जुषा॒णो अ॒प्तुराज्य॑स्य वेतु॒ स्वाहा॒ऽयन्नो॑ अ॒ग्निर्वरि॑वः कृणोत्व॒यम्मृधः॑ पु॒र ए॑तु प्रभि॒न्दन्न्⁠। अ॒यꣳ शत्रू᳚ञ्जयतु॒ जर्‌हृ॑षाणो॒ऽयव्ँवाज॑ञ्जयतु॒ वाज॑सातौ⁠। उ॒रु वि॑ष्णो॒ वि क्र॑मस्वो॒रु ख्‍षया॑य नः कृधि⁠। घृ॒तङ्घृ॑तयोने पिब॒ प्रप्र॑ य॒ज्ञप॑तिन्तिर⁠। सोमो॑ जिगाति गातु॒विद् [६] दे॒वाना॑मेति निष्कृ॒तमृ॒तस्य॒ योनि॑मा॒सद॒मदि॑त्या॒स्सदो॒ऽस्यदि॑त्या॒स्सद॒ आ सी॑दै॒ष वो॑ देव सवित॒स्सोम॒स्तꣳ र॑ख्‍षद्ध्व॒म्मा वो॑ दभदे॒तत्त्वꣳ सो॑म दे॒वो दे॒वानुपा॑गा इ॒दम॒हम्म॑नु॒ष्यो॑ मनु॒ष्या᳚न्थ्स॒ह प्र॒जया॑ स॒ह रा॒यस्पोषे॑ण॒ नमो॑ दे॒वेभ्य॑स्स्व॒धा पि॒तृभ्य॑ इ॒दम॒हन्निर्वरु॑णस्य॒ पाशा॒थ्सुव॑र॒भि [७] वि ख्ये॑षव्ँवैश्वान॒रञ्ज्योति॒रग्ने᳚ व्रतपते॒ त्वव्ँव्र॒ताना᳚व्ँव्र॒तप॑तिरसि॒ या मम॑ त॒नूस्त्वय्यभू॑दि॒यꣳ सा मयि॒ या तव॑ त॒नूर् मय्यभू॑दे॒षा सा त्वयि॑ यथाय॒थं नौ᳚ व्रतपते व्र॒तिनो᳚र् व्र॒तानि॑⁠ [८] (गा॒तु॒विद॒भ्येक॑त्रिꣳशच्च) ॥४॥
अत्य॒न्यानगा॒न्नान्यानुपा॑गाम॒र्वाक्त्वा॒ परै॑रविदम्प॒रोऽव॑रै॒स्तन्त्वा॑ जुषे वैष्ण॒वन्दे॑वय॒ज्यायै॑ दे॒वस्त्वा॑ सवि॒ता मद्ध्वा॑ऽन॒क्त्वोष॑धे॒ त्राय॑स्वैन॒ꣴ॒ स्वधि॑ते॒ मैन॑ꣳ हिꣳसी॒र् दिव॒मग्रे॑ण॒ मा ले॑खीर॒न्तरि॑ख्‍ष॒म्मद्ध्ये॑न॒ मा हि॑ꣳसीः पृथि॒व्या सम्भ॑व॒ वन॑स्पते श॒तव॑ल्‌शो॒ वि रो॑ह स॒हस्र॑वल्‌शा॒ वि व॒यꣳ रु॑हेम॒ यन्त्वा॒ऽयꣴ स्वधि॑ति॒स्तेति॑जानः प्रणि॒नाय॑ मह॒ते सौभ॑गा॒याच्छि॑न्नो॒ रायः॑ सु॒वीरः॑⁠ [९] (यंदश॑ च) ॥५॥
पृ॒थि॒व्यै त्वा॒न्तरि॑ख्‍षाय त्वा दि॒वे त्वा॒ शुन्ध॑ताल्ँलो॒कः पि॑तृ॒षद॑नो॒ यवो॑ऽसि य॒वया॒स्मद् द्वेषो॑ य॒वयारा॑तीः पितृ॒णाꣳ सद॑नमसि स्वावे॒शो᳚ऽस्यग्रे॒गा ने॑तृ॒णाव्ँवन॒स्पति॒रधि॑ त्वा स्थास्यति॒ तस्य॑ वित्ताद् दे॒वस्त्वा॑ सवि॒ता मद्ध्वा॑ऽनक्तु सुपिप्प॒लाभ्य॒स्त्वौष॑धीभ्य॒ उद्दिव॑ꣴ स्तभा॒नाऽन्तरि॑ख्‍षम्पृण पृथि॒वीमुप॑रेण दृꣳह॒ ते ते॒ धामा᳚न्युश्मसी [१०] ग॒मद्ध्ये॒ गावो॒ यत्र॒ भूरि॑शृङ्गा अ॒यासः॑⁠। अत्राह॒ तदु॑रुगा॒यस्य॒ विष्णोः᳚ पर॒मम्प॒दमव॑ भाति॒ भूरेः᳚⁠॥ विष्णोः॒ कर्मा॑णि पश्यत॒ यतो᳚ व्र॒तानि॑ पस्प॒शे⁠। इन्द्र॑स्य॒ युज्यः॒ सखा᳚⁠॥ तद्विष्णोः᳚ पर॒मम्प॒दꣳ सदा॑ पश्यन्ति सू॒रयः॑⁠। दि॒वीव॒ चख्‍षु॒रात॑तम्⁠॥ ब्र॒ह्म॒वनि॑न्त्वा ख्‍षत्र॒वनि॑ꣳ सुप्रजा॒वनि॑ꣳ रायस्पोष॒वनि॒म्पर्यू॑हामि॒ ब्रह्म॑ दृꣳह ख्‍ष॒त्रं दृ॑ꣳह प्र॒जान्दृ॑ꣳह रा॒यस्पोष॑न्दृꣳह परि॒वीर॑सि॒ परि॑ त्वा॒ दैवी॒र्विशो᳚ व्ययन्ता॒म्परी॒मꣳ रा॒यस्पोषो॒ यज॑मानम्मनु॒ष्या॑ अ॒न्तरि॑ख्‍षस्य त्वा॒ साना॒वव॑ गूहामि⁠ [११] (उ॒श्म॒सी॒पोष॒मेका॒न्नवि॑ꣳश॒तिश्च॑) ॥६॥
इ॒षे त्वो॑प॒वीर॒स्युपो॑ दे॒वान् दैवी॒र् विशः॒ प्रागु॒र् वह्नी॑रु॒शिजो॒ बृह॑स्पते धा॒रया॒ वसू॑नि ह॒व्या ते᳚ स्वदन्ता॒न्देव॑ त्वष्ट॒र्वसु॑ रण्व॒ रेव॑ती॒ रम॑द्ध्वम॒ग्नेर् ज॒नित्र॑मसि॒ वृष॑णौ स्थ उ॒र्वश्य॑स्या॒युर॑सि पुरू॒रवा॑ घृ॒तेना॒क्ते वृष॑णन्दधाथाङ्गाय॒त्रञ्छन्दोऽनु॒ प्र जा॑यस्व॒ त्रैष्टु॑भ॒ञ्जाग॑त॒ञ्छन्दोऽनु॒ प्र जा॑यस्व॒ भव॑तं [१२] नः॒ सम॑नसौ॒ समो॑कसावरे॒पसौ᳚⁠। मा य॒ज्ञꣳ हि॑ꣳसिष्ट॒म्मा य॒ज्ञप॑तिञ्जातवेदसौ शि॒वौ भ॑वतम॒द्य नः॑⁠॥ अ॒ग्नाव॒ग्निश्च॑रति॒ प्रवि॑ष्ट॒ ऋषी॑णाम्पु॒त्रो अ॑धिरा॒ज ए॒षः⁠। स्वा॒हा॒कृत्य॒ ब्रह्म॑णा ते जुहोमि॒ मा दे॒वाना᳚म्मिथु॒या क॑र्भाग॒धेय᳚म्⁠ [१३] (भव॑त॒मेक॑त्रिꣳशच्च) ॥७॥
आ द॑द ऋ॒तस्य॑ त्वा देवहविः॒ पाशे॒नाऽऽर॑भे॒ धर्‌षा॒ मानु॑षान॒द्भ्यस्त्वौष॑धीभ्यः॒ प्रोख्‍षा᳚म्य॒पाम्पे॒रुर॑सि स्वा॒त्तञ्चि॒थ् सदे॑वꣳ ह॒व्यमापो॑ देवीः॒ स्वद॑तैन॒ꣳ॒ सन्ते᳚ प्रा॒णो वा॒युना॑ गच्छता॒ꣳ॒ सय्ँयज॑त्रै॒रङ्गा॑नि॒ सय्ँय॒ज्ञप॑तिरा॒शिषा॑ घृ॒तेना॒क्तौ प॒शुन्त्रा॑येथा॒ꣳ॒ रेव॑तीर् य॒ज्ञप॑तिम्प्रिय॒धाऽऽ* वि॑श॒तोरो॑ अन्तरिख्‍ष स॒जूर् दे॒वेन॒ [१४] वाते॑ना॒स्य ह॒विषः॒ त्मना॑ यज॒ सम॑स्य त॒नुवा॑ भव॒ वर्‌षी॑यो॒ वर्‌षी॑यसि य॒ज्ञे य॒ज्ञप॑तिन्धाः पृ॑थि॒व्याः सं॒पृचः॑ पाहि॒ नम॑स्त आतानाऽन॒र्वा प्रेहि॑ घृ॒तस्य॑ कु॒ल्यामनु॑ स॒ह प्र॒जया॑ स॒ह रा॒यस्पोषे॒णाऽऽपो॑ देवीः शुद्धायुवः शु॒द्धा यू॒यन्दे॒वाꣳ ऊ᳚ढ्वꣳ शु॒द्धा व॒यम्परि॑विष्टाः परिवे॒ष्टारो॑ वो भूयास्म⁠ [१५] (दे॒वेन॒चतु॑श्चत्वारिꣳशच्च) ॥८॥
वाक्त॒ आ प्या॑यताम्प्रा॒णस्त॒ आ प्या॑यता॒ञ्चख्‍षु॑स्त॒ आ प्या॑यता॒ꣴ॒ श्रोत्र॑न्त॒ आ प्या॑यता॒य्ँया ते᳚ प्रा॒णाञ्छुग्ज॒गाम॒ या चख्‍षु॒र्या श्रोत्र॒य्ँयत्ते᳚ क्रू॒रय्ँयदास्थि॑त॒न्तत्त॒ आ प्या॑यता॒न्तत्त॑ ए॒तेन॑ शुन्धता॒न्नाभि॑स्त॒ आ प्या॑यताम्पा॒युस्त॒ आ प्या॑यताꣳ शु॒द्धाश्च॒रित्राः॒ शम॒द्भ्यः [१६] शमोष॑धीभ्यः॒ शम्पृ॑थि॒व्यै शमहो᳚भ्या॒मोष॑धे॒ त्राय॑स्वैन॒ꣴ॒ स्वधि॑ते॒ मैन॑ꣳ हिꣳसी॒ रख्‍ष॑साम्भा॒गो॑ऽसी॒दम॒हꣳ रख्‍षो॑ऽध॒मन्तमो॑ नयामि॒ यो᳚ऽस्मान् द्वेष्टि॒ यञ्च॑ व॒यन्द्वि॒ष्म इ॒दमे॑नमध॒मन्तमो॑ नयामी॒षे त्वा॑ घृ॒तेन॑ द्यावापृथिवी॒ प्रोर्ण्वा॑था॒मच्छि॑न्नो॒ रायः॑ सु॒वीर॑ उ॒र्व॑न्तरि॑ख्‍ष॒मन्वि॑हि॒ वायो॒ वीहि॑ स्तो॒काना॒ꣴ॒ स्वाहो॒र्द्ध्वन॑भसम्मारु॒तङ्ग॑च्छतम्⁠ [१७] (अ॒द्भ्योवीहि॒पञ्च॑ च) ॥९॥
सन्ते॒ मन॑सा॒ मनः॒ सम्प्रा॒णेन॑ प्रा॒णो जुष्ट॑न्दे॒वेभ्यो॑ ह॒व्यङ्घृ॒तव॒थ् स्वाहै॒न्द्रः प्रा॒णो अङ्गे॑अङ्गे॒ नि दे᳚द्ध्यदै॒न्द्रो॑ऽपा॒नो अङ्गे॑अङ्गे॒ वि बो॑भुव॒द्देव॑ त्वष्ट॒र्भूरि॑ ते॒ सꣳस॑मेतु॒ विषु॑रूपा॒ यथ् सल॑ख्‍ष्माणो॒ भव॑थ देव॒त्रा यन्त॒मव॑से॒ सखा॒योऽनु॑ त्वा मा॒ता पि॒तरो॑ मदन्तु॒ श्रीर॑स्य॒ग्निस्त्वा᳚ श्रीणा॒त्वापः॒ सम॑रिण॒न् वात॑स्य [१८] त्वा॒ ध्रज्यै॑ पू॒ष्णो रꣴह्या॑ अ॒पामोष॑धीना॒ꣳ॒ रोहि॑ष्यै घृ॒तङ्घृ॑तपावानः पिबत॒ वसा᳚व्ँवसापावानः पिबता॒ऽन्तरि॑ख्‍षस्य ह॒विर॑सि॒ स्वाहा᳚ त्वा॒ऽन्तरि॑ख्‍षाय॒ दिशः॑ प्र॒दिश॑ आ॒दिशो॑ वि॒दिश॑ उ॒द्दिशः॒ स्वाहा॑ दि॒ग्भ्यो नमो॑ दि॒ग्भ्यः⁠ [१९] (वात॑स्या॒ष्टावि॑ꣳशतिश्च) ॥१०॥
स॒मु॒द्रङ्ग॑च्छ॒ स्वाहा॒ऽन्तरि॑ख्‍षङ्गच्छ॒ स्वाहा॑ दे॒वꣳ स॑वि॒तार॑ङ्गच्छ॒ स्वाहा॑ऽहोरा॒त्रे ग॑च्छ॒ स्वाहा॑ मि॒त्रावरु॑णौ गच्छ॒ स्वाहा॒ सोम॑ङ्गच्छ॒ स्वाहा॑ य॒ज्ञङ्ग॑च्छ॒ स्वाहा॒ छन्दा॑ꣳसि गच्छ॒ स्वाहा॒ द्यावा॑पृथि॒वी ग॑च्छ॒ स्वाहा॒ नभो॑ दि॒व्यङ्ग॑च्छ॒ स्वाहा॒ऽग्निव्ँवै᳚श्वान॒रङ्ग॑च्छ॒ स्वाहा॒ऽद्भ्यस्त्वौष॑धीभ्यो॒ मनो॑ मे॒ हार्दि॑ यच्छ त॒नून्त्वच॑म्पु॒त्रन्नप्ता॑रमशीय॒ शुग॑सि॒ तम॒भि शो॑च॒ यो᳚ऽस्मान् द्वेष्टि॒ यञ्च॑ व॒यन्द्वि॒ष्मो धाम्नो॑धाम्नो राजन्नि॒तो व॑रुण नो मुञ्च॒ यदापो॒ अघ्नि॑या॒ वरु॒णेति॒ शपा॑महे॒ ततो॑ वरुण नो मुञ्च⁠ [२०] (अ॒सि॒षड्वि॑ꣳशतिश्च) ॥११॥
ह॒विष्म॑तीरि॒मा आपो॑ ह॒विष्मा᳚न् दे॒वो अ॑द्ध्व॒रो ह॒विष्मा॒ꣳ॒ आ वि॑वासति ह॒विष्मा॑ꣳ अस्तु॒ सूर्यः॑⁠॥ अ॒ग्नेर्वोऽप॑न्नगृहस्य॒ सद॑सि सादयामि सु॒म्नाय॑ सुम्निनीः सु॒म्ने मा॑ धत्तेन्द्राग्नि॒योर् भा॑ग॒धेयीः᳚ स्थ मि॒त्रावरु॑णयोर् भाग॒धेयीः᳚ स्थ॒ विश्वे॑षान्दे॒वाना᳚म्भाग॒धेयीः᳚ स्थ य॒ज्ञे जा॑गृत⁠ [२१] (ह॒विष्म॑ती॒श्चतु॑स्त्रिꣳशत्) ॥१२॥
हृ॒दे त्वा॒ मन॑से त्वा दि॒वे त्वा॒ सूर्या॑य त्वो॒र्द्ध्वमि॒मम॑द्ध्व॒रङ्कृ॑धि दि॒वि दे॒वेषु॒ होत्रा॑ यच्छ॒ सोम॑ राज॒न्नेह्यव॑ रोह॒ मा भेर्मा सव्ँवि॑क्था॒ मा त्वा॑ हिꣳसिषम्प्र॒जास्त्वमु॒पाव॑रोह प्र॒जास्त्वामु॒पाव॑रोहन्तु शृ॒णोत्व॒ग्निः स॒मिधा॒ हव॑म्मे शृ॒ण्वन्त्वापो॑ धि॒षणा᳚श्च दे॒वीः⁠। शृ॒णोत॑ ग्रावाणो वि॒दुषो॒ नु [२२] य॒ज्ञꣳ शृ॒णोतु॑ दे॒वः स॑वि॒ता हव॑म्मे⁠। देवी॑रापो अपान्नपा॒द्य ऊ॒र्मिर्ह॑वि॒ष्य॑ इन्द्रि॒यावा᳚न् म॒दिन्त॑म॒स्तन्दे॒वेभ्यो॑ देव॒त्रा ध॑त्त शु॒क्रꣳ शु॑क्र॒पेभ्यो॒ येषा᳚म्भा॒गः स्थ स्वाहा॒ कार्‌षि॑र॒स्यपा॒ऽपाम्मृ॒द्ध्रꣳ स॑मु॒द्रस्य॒ वोऽख्‍षि॑त्या॒ उन्न॑ये⁠। यम॑ग्ने पृ॒थ्सु मर्त्य॒मावो॒ वाजे॑षु॒ यञ्जु॒नाः⁠। स यन्ता॒ शश्व॑ती॒रिषः॑⁠ [२३] (नुस॒प्तच॑त्वारिꣳशच्च) ॥१३॥
त्वम॑ग्ने रु॒द्रो असु॑रो म॒हो दि॒वस्त्वꣳ शर्द्धो॒ मारु॑तम्पृ॒ख्‍ष ई॑शिषे⁠। त्वव्ँवातै॑ररु॒णैर्या॑सि शंग॒यस्त्वम्पू॒षा वि॑ध॒तः पा॑सि॒ नुत्मना᳚⁠॥ आ वो॒ राजा॑नमद्ध्व॒रस्य॑ रु॒द्रꣳ होता॑रꣳ सत्य॒यज॒ꣳ॒ रोद॑स्योः⁠। अ॒ग्निम्पु॒रा त॑नयि॒त्नो र॒चित्ता॒द्धिर॑ण्यरूप॒मव॑से कृणुद्ध्वम्⁠॥ अ॒ग्निर्होता॒ निष॑सादा॒ यजी॑यानु॒पस्थे॑ मा॒तुः सु॑र॒भावु॑ लो॒के⁠। युवा॑ क॒विः पु॑रुनि॒ष्ठ [२४] ऋ॒तावा॑ ध॒र्ता कृ॑ष्टी॒नामु॒त मद्ध्य॑ इ॒द्धः⁠॥ सा॒द्ध्वीम॑कर् दे॒ववी॑तिन्नो अ॒द्य य॒ज्ञस्य॑ जि॒ह्वाम॑विदाम॒ गुह्या᳚म्⁠। स आयु॒राऽगा᳚थ् सुर॒भिर्वसा॑नो भ॒द्राम॑कर् दे॒वहू॑तिन्नो अ॒द्य⁠॥ अक्र॑न्दद॒ग्निः स्त॒नय॑न्निव॒ द्यौः ख्‍षामा॒ रेरि॑हद्वी॒रुधः॑ सम॒ञ्जन्न्⁠। स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्य॒न्तः⁠॥ त्वे वसू॑नि पुर्वणीक [२५] होतर्दो॒षा वस्तो॒रेरि॑रे य॒ज्ञिया॑सः⁠। ख्‍षामे॑व॒ विश्वा॒ भुव॑नानि॒ यस्मि॒न्थ् सꣳ सौभ॑गानि दधि॒रे पा॑व॒के⁠॥ तुभ्य॒न्ता अ॑ङ्गिरस्तम॒ विश्वाः᳚ सुख्‍षि॒तयः॒ पृथ॑क्⁠। अग्ने॒ कामा॑य येमिरे⁠॥ अ॒श्याम॒ तङ्काम॑मग्ने॒ तवो॒त्य॑श्याम॑ र॒यिꣳ र॑यिवः सु॒वीर᳚म्⁠। अ॒श्याम॒ वाज॑म॒भि वा॒जय॑न्तो॒ऽश्याम॑ द्यु॒म्नम॑जरा॒जर॑न्ते⁠॥ श्रेष्ठ॑य्ँयविष्ठ भार॒ताग्ने᳚ द्यु॒मन्त॒मा भ॑र⁠ [२६] वसो॑ पुरु॒स्पृह॑ꣳ र॒यिम्⁠॥ स श्वि॑ता॒नस्त॑न्य॒तू रो॑चन॒स्था अ॒जरे॑भि॒र् नान॑दद्भि॒र्यवि॑ष्ठः⁠। यः पा॑व॒कः पु॑रु॒तमः॑ पु॒रूणि॑ पृ॒थून्य॒ग्निर॑नु॒याति॒ भर्व॑न्न्⁠॥ आयु॑ष्टे वि॒श्वतो॑ दधद॒यम॒ग्निर् वरे᳚ण्यः⁠। पुन॑स्ते प्रा॒ण आऽय॑ति॒ परा॒ यख्‍ष्म॑ꣳ सुवामि ते⁠॥ आ॒यु॒र्दा अ॑ग्ने ह॒विषो॑ जुषा॒णो घृ॒तप्र॑तीको घृ॒तयो॑निरेधि⁠। घृ॒तम्पी॒त्वा मधु॒ चारु॒ गव्य॑म्पि॒तेव॑ पु॒त्रम॒भि [२७] र॑ख्‍षतादि॒मम्⁠। तस्मै॑ ते प्रति॒हर्य॑ते॒ जात॑वेदो॒ विच॑र्‌षणे⁠। अग्ने॒ जना॑मि सुष्टु॒तिम्⁠॥ दि॒वस्परि॑ प्रथ॒मञ्ज॑ज्ञे अ॒ग्निर॒स्मद् द्वि॒तीय॒म्परि॑ जा॒तवे॑दाः⁠। तृ॒तीय॑म॒फ्सु नृ॒मणा॒ अज॑स्र॒मिन्धा॑न एनञ्जरते स्वा॒धीः⁠॥ शुचिः॑ पावक॒ वन्द्योऽग्ने॑ बृ॒हद्वि रो॑चसे⁠। त्वङ्घृ॒तेभि॒राहु॑तः⁠॥ दृ॒शा॒नो रु॒क्म उ॒र्व्या व्य॑द्यौद्दु॒र्मर्‌ष॒मायुः॑ श्रि॒ये रु॑चा॒नः⁠। अ॒ग्निर॒मृतो॑ अभव॒द्वयो॑भि॒र् [२८] यदे॑न॒न्द्यौरज॑नयथ् सु॒रेताः᳚⁠॥ आ यदि॒षे नृ॒पति॒न्तेज॒ आन॒ट्छुचि॒ रेतो॒ निषि॑क्त॒न्द्यौर॒भीके᳚⁠। अ॒ग्निः शर्द्ध॑मनव॒द्यय्ँयुवा॑नꣴ स्वा॒धिय॑ञ्जनयथ् सू॒दय॑च्च⁠॥ स तेजी॑यसा॒ मन॑सा॒ त्वोत॑ उ॒त शि॑ख्‍ष स्वप॒त्यस्य॑ शि॒ख्‍षोः⁠। अग्ने॑ रा॒यो नृत॑मस्य॒ प्रभू॑तौ भू॒याम॑ ते सुष्टु॒तय॑श्च॒ वस्वः॑⁠॥ अग्ने॒ सह॑न्त॒मा भ॑र द्यु॒म्नस्य॑ प्रा॒सहा॑ र॒यिम्⁠। विश्वा॒ य [२९] श्च॒॑र्‌ष॒णीर॒भ्या॑सा वाजे॑षु सा॒सह॑त्⁠॥ तम॑ग्ने पृतना॒सह॑ꣳ र॒यिꣳ स॑हस्व॒ आ भ॑र⁠। त्वꣳ हि स॒त्यो अद्भु॑तो दा॒ता वाज॑स्य॒ गोम॑तः⁠॥ उ॒ख्‍षान्ना॑य व॒शान्ना॑य॒ सोम॑पृष्ठाय वे॒धसे᳚⁠। स्तोमै᳚र् विधेमा॒ऽग्नये᳚⁠॥ व॒द्मा हि सू॑नो॒ अस्य॑द्म॒सद्वा॑ च॒क्रे अ॒ग्निर् ज॒नुषाऽज्माऽन्न᳚म्⁠। स त्वन्न॑ ऊर्जसन॒ ऊर्ज॑न्धा॒ राजे॑व जेरवृ॒के ख्‍षे᳚ष्य॒न्तः⁠॥ अग्न॒ आयू॑ꣳषि [३०] पवस॒ आ सु॒वोर्ज॒मिष॑ञ्च नः⁠। आ॒रे बा॑धस्व दु॒च्छुना᳚म्⁠॥ अग्ने॒ पव॑स्व॒ स्वपा॑ अ॒स्मे वर्चः॑ सु॒वीर्य᳚म्⁠। दध॒त्पोष॑ꣳ र॒यिम्मयि॑⁠॥ अग्ने॑ पावक रो॒चिषा॑ म॒न्द्रया॑ देव जि॒ह्वया᳚⁠। आ दे॒वान्‌व॑ख्‍षि॒ यख्‍षि॑ च⁠॥ स नः॑ पावक दीदि॒वोऽग्ने॑ दे॒वाꣳ इ॒हा व॑ह⁠। उप॑ य॒ज्ञꣳ ह॒विश्च॑ नः⁠॥ अ॒ग्निः शुचि॑व्रततमः॒ शुचि॒र् विप्रः॒ शुचिः॑ क॒विः⁠। शुची॑ रोचत॒ आहु॑तः⁠॥ उद॑ग्ने॒ शुच॑य॒स्तव॑ शु॒क्रा भ्राज॑न्त ईरते⁠। तव॒ ज्योती॑ꣴष्य॒र्चयः॑⁠ [३१] (विप्रः॒ शुचि॒श्चतु॑र्दश च) ॥१४॥
(दे॒वस्य॑रख्‍षो॒हणो॑ वि॒भूस्त्वꣳ सो॒माऽत्य॒न्यानगां᳚ पृथि॒व्या इ॒षे त्वा ऽऽद॑दे॒ वाक्ते॒सन्ते॑ समु॒द्रꣳ ह॒विष्म॑तीर्‌हृ॒दे त्वम॑ग्ने रु॒द्रश्चतु॑र्दश)
(दे॒वस्य॑ग॒मध्ये॑ह॒विष्म॑तीःपवस॒एक॑त्रिꣳशत्)
(दे॒वस्या॒र्चयः॑)
अनुवाकाः पञ्चशती
१४ ३१