कृष्ण यजुर्वेदीय तैत्तिरीय संहिता
षष्ठकाण्डे तृतीयः प्रश्नः

कांड ६ प्रश्न ३
सोममन्त्रब्राह्मणनिरूपणं

ओं नमः परमात्मने, श्री महागणपतये नमः

श्री गुरुभ्यो नमः, ह॒रिः॒ ओं

ॐ
चात्वा॑ला॒द्धिष्णि॑या॒नुप॑ वपति॒ योनि॒र् वै य॒ज्ञस्य॒ चात्वा॑लय्ँय॒ज्ञस्य॑ सयोनि॒त्वाय॑ दे॒वा वै य॒ज्ञम्परा॑ऽजयन्त॒ तमाग्नी᳚द्ध्रा॒त् पुन॒रपा॑जयन्ने॒तद्वै य॒ज्ञस्याप॑राजित॒य्ँयदाग्नी᳚द्ध्र॒य्ँयदाग्नी᳚द्ध्रा॒द् धिष्णि॑यान्‌वि॒हर॑ति॒ यदे॒व य॒ज्ञस्याप॑राजित॒न्तत॑ ए॒वैन॒म्पुन॑स्तनुते परा॒जित्ये॑व॒ खलु॒ वा ए॒ते य॑न्ति॒ ये ब॑हिष्पवमा॒नꣳ सर्प॑न्ति बहिष्पवमा॒ने स्तु॒त [१] आ॒हाग्नी॑द॒ग्नीन्‌वि ह॑र ब॒र्॒‌हिः स्तृ॑णाहि पुरो॒डाशा॒ꣳ॒ अल॑ङ्कु॒र्विति॑ य॒ज्ञमे॒वाप॒जित्य॒ पुन॑स्तन्वा॒ना य॒न्त्यङ्गा॑रै॒र् द्वे सव॑ने॒ वि ह॑रति श॒लाका॑भिस्तृ॒तीय॑ꣳ सशुक्र॒त्वायाथो॒ सम्भ॑रत्ये॒वैन॒द्धिष्णि॑या॒ वा अ॒मुष्मि॑ल्ँलो॒के सोम॑मरख्‍ष॒न् तेभ्योऽधि॒ सोम॒माऽह॑र॒न् तम॑न्व॒वाय॒न् तम्पर्य॑विश॒न्॒‌य ए॒वव्ँवेद॑ वि॒न्दते॑ [२] परिवे॒ष्टार॒न्ते सो॑मपी॒थेन॒ व्या᳚र्द्ध्यन्त॒ ते दे॒वेषु॑ सोमपी॒थमै᳚च्छन्त॒ तान् दे॒वा अ॑ब्रुव॒न् द्वेद्वे॒ नाम॑नी कुरुद्ध्व॒मथ॒ प्र वा॒ऽऽफ्स्यथ॒ न वेत्य॒ग्नयो॒ वा अथ॒ धिष्णि॑या॒स्तस्मा᳚द् द्वि॒नामा᳚ ब्राह्म॒णोऽर्द्धु॑क॒स्तेषा॒य्ँये नेदि॑ष्ठम्प॒र्यवि॑श॒न् ते सो॑मपी॒थम्प्राऽ*प्नु॑वन्नाहव॒नीय॑ आग्नी॒द्ध्रीयो॑ हो॒त्रीयो॑ मार्जा॒लीय॒स्तस्मा॒त् तेषु॑ जुह्वत्यति॒हाय॒ वष॑ट् करोति॒ वि ह्ये॑ [३] ते सो॑मपी॒थेनाऽऽर्द्ध्य॑न्त दे॒वा वै याः प्राची॒राहु॑ती॒रजु॑हवु॒र् ये पु॒रस्ता॒दसु॑रा॒ आस॒न् ताꣴ स्ताभिः॒ प्राणु॑दन्त॒ याः प्र॒तीची॒र् ये प॒श्चादसु॑रा॒ आस॒न् ताꣴ स्ताभि॒रपा॑नुदन्त॒ प्राची॑र॒न्या आहु॑तयो हू॒यन्ते᳚ प्र॒त्यङ्ङासी॑नो॒ धिष्णि॑या॒न् व्याघा॑रयति प॒श्चाच्चै॒व पु॒रस्ता᳚च्च॒ यज॑मानो॒ भ्रातृ॑व्या॒न् प्र णु॑दते॒ तस्मा॒त् परा॑चीः प्र॒जाः प्र वी॑यन्ते प्र॒तीची᳚र् [४] जायन्ते प्रा॒णा वा ए॒ते यद्धिष्णि॑या॒ यद॑द्ध्व॒र्युः प्र॒त्यङ् धिष्णि॑यानति॒सर्पे᳚त् प्रा॒णान्थ् सङ्क॑र्षेत् प्र॒मायु॑कः स्या॒न्नाभि॒र् वा ए॒षा य॒ज्ञस्य॒ यद्धोतो॒र्द्ध्वः खलु॒ वै नाभ्यै᳚ प्रा॒णोऽवा॑ङपा॒नो यद॑द्ध्व॒र्युः प्र॒त्यङ् होता॑रमति॒सर्पे॑दपा॒ने प्रा॒णन्द॑द्ध्यात् प्र॒मायु॑कः स्या॒न्नाद्ध्व॒र्युरुप॑ गाये॒द् वाग्वी᳚र्यो॒ वा अ॑द्ध्व॒र्युर्यद॑द्ध्व॒र्युरु॑प॒गाये॑दुद्गा॒त्रे [५] वाच॒ꣳ॒ सम्प्र य॑च्छेदुप॒दासु॑काऽस्य॒ वाख् स्या᳚द्ब्रह्मवा॒दिनो॑ वदन्ति॒ नास॑ꣴस्थिते॒ सोमे᳚ऽद्ध्व॒र्युः प्र॒त्यङ्ख् सदोऽती॑या॒दथ॑ क॒था दा᳚ख्‍षि॒णानि॒ होतु॑मेति॒ यामो॒ हि स तेषा॒ङ्कस्मा॒ अह॑ दे॒वा याम॒व्ँवाऽया॑म॒व्ँवाऽनु॑ ज्ञास्य॒न्तीत्युत्त॑रे॒णाऽऽग्नी᳚द्ध्रम्प॒रीत्य॑ जुहोति दाख्‍षि॒णानि॒ न प्रा॒णान्थ् सङ्क॑र्‌षति॒ न्य॑न्ये धिष्णि॑या उ॒प्यन्ते॒ नान्ये यान् नि॒वप॑ति॒ तेन॒ तान् प्री॑णाति॒ यान् न नि॒वप॑ति॒ यद॑नुदि॒शति॒ तेन॒ तान्⁠ [६] (स्तु॒ते वि॒न्दते॒ हि वी॑यन्ते प्र॒तीची॑ रुद्ग्रा॒त्र उ॒प्यन्ते॒ चतु॑र्दश च) ॥१॥
सु॒व॒र्गाय॒ वा ए॒तानि॑ लो॒काय॑ हूयन्ते॒ यद् वै॑सर्ज॒नानि॒ द्वाभ्या॒ङ्गार्‌ह॑पत्ये जुहोति द्वि॒पाद् यज॑मानः॒ प्रति॑ष्ठित्या॒ आग्नी᳚द्ध्रे जुहोत्य॒न्तरि॑ख्‍ष ए॒वाऽऽक्र॑मत आहव॒नीये॑ जुहोति सुव॒र्गमे॒वैन॑ल्ँलो॒कङ्ग॑मयति दे॒वान्‌वै सु॑व॒र्गल्ँलो॒कय्ँय॒तो रख्‍षा॑ꣴस्यजिघाꣳस॒न् ते सोमे॑न॒ राज्ञा॒ रख्‍षा॑ꣴस्यप॒हत्या॒प्तुमा॒त्मान॑ङ्कृ॒त्वा सु॑व॒र्गल्ँलो॒कमा॑य॒न् रख्‍ष॑सा॒मनु॑पलाभा॒याऽऽत्तः॒ सोमो॑ भव॒त्यथ॑ [७] वैसर्ज॒नानि॑ जुहोति॒ रख्‍ष॑सा॒मप॑हत्यै॒ त्वꣳ सो॑म तनू॒कृद्भ्य॒ इत्या॑ह तनू॒कृद्धे॑ष द्वेषो᳚भ्यो॒ऽन्यकृ॑तेभ्य॒ इत्या॑हा॒न्यकृ॑तानि॒ हि रख्‍षा॑ꣴस्यु॒रु य॒न्ताऽसि॒ वरू॑थ॒मित्या॑हो॒रु ण॑ स्कृ॒धीति॒ वावैतदा॑ह जुषा॒णो अ॒प्तुराज्य॑स्य वे॒त्वित्या॑हा॒प्तुमे॒व यज॑मानङ्कृ॒त्वा सु॑व॒र्गल्ँलो॒कङ्ग॑मयति॒ रख्‍ष॑सा॒मनु॑पलाभा॒याऽऽसोम॑न्ददत॒ [८] आ ग्राव्‌ण्ण॒ आ वा॑य॒व्या᳚न्या द्रो॑णकल॒शमुत् पत्नी॒मा न॑य॒न्त्यन्वना॑ꣳसि॒ प्र व॑र्तयन्ति॒ याव॑दे॒वास्यास्ति॒ तेन॑ स॒ह सु॑व॒र्गल्ँलो॒कमे॑ति॒ नय॑वत्य॒र्चाऽऽग्नी᳚द्ध्रे जुहोति सुव॒र्गस्य॑ लो॒कस्या॒भिनी᳚त्यै॒ ग्राव्‌ण्णो॑ वाय॒व्या॑नि द्रोणकल॒शमाग्नी᳚द्ध्र॒ उप॑ वासयति॒ वि ह्ये॑न॒न्तैर् गृ॒ह्णते॒ यथ् स॒होप॑वा॒सये॑दपुवा॒येत॑ सौ॒म्यर्चा प्र पा॑दयति॒ स्वयै॒ [९] वैन॑न्दे॒वत॑या॒ प्र पा॑दय॒त्यदि॑त्याः॒ सदो॒ऽस्यदि॑त्याः॒ सद॒ आ सी॒देत्या॑ह यथाय॒जुरे॒वैतद्यज॑मानो॒ वा ए॒तस्य॑ पु॒रा गो॒प्ता भ॑वत्ये॒ष वो॑ देव सवितः॒ सोम॒ इत्या॑ह सवि॒तृप्र॑सूत ए॒वैन॑न्दे॒वता᳚भ्यः॒ सम्प्र य॑च्छत्ये॒तत् त्वꣳ सो॑म दे॒वो दे॒वानुपा॑गा॒ इत्या॑ह दे॒वो ह्ये॑ष सन् [१०] दे॒वानु॒पैती॒दम॒हम्म॑नु॒ष्यो॑ मनु॒ष्या॑नित्या॑ह मनु॒ष्यो᳚(१॒) ह्ये॑ष सन् म॑नु॒ष्या॑नु॒पैति॒ यदे॒तद् यजु॒र्न ब्रू॒यादप्र॑जा अप॒शुर्यज॑मानः स्याथ् स॒ह प्र॒जया॑ स॒ह रा॒यस्पोषे॒णेत्या॑ह प्र॒जयै॒व प॒शुभिः॑ स॒हेमल्ँलो॒कमु॒पाव॑र्तते॒ नमो॑ दे॒वेभ्य॒ इत्या॑ह नमस्का॒रो हि दे॒वाना॑ꣴ स्व॒धा पि॒तृभ्य॒ इत्या॑ह स्वधाका॒रो हि [११] पि॑तृ॒णामि॒दम॒हन्निर् वरु॑णस्य॒ पाशा॒दित्या॑ह वरुणपा॒शादे॒व निर् मु॑च्य॒तेऽग्ने᳚ व्रतपत आ॒त्मनः॒ पूर्वा॑ त॒नूरा॒देयेत्या॑हुः॒ को हि तद्वेद॒ यद् वसी॑या॒न्थ् स्वे वशे॑ भू॒ते पुन॑र् वा॒ ददा॑ति॒ न वति॒ ग्रावा॑णो॒ वै सोम॑स्य॒ राज्ञो॑ मलिम्लुसे॒ना य ए॒वव्ँवि॒द्वान् ग्राव्‌ण्ण॒ आग्नी᳚द्ध्र उपवा॒सय॑ति॒ नैन॑म्मलिम्लुसे॒ना वि॑न्दति⁠ [१२] (अथ॑ ददते॒ स्वया॒ सन्थ् स्व॑धाका॒रो हि वि॑न्दति) ॥२॥
वै॒ष्ण॒व्यर्चा हु॒त्वा यूप॒मच्छै॑ति वैष्ण॒वो वै दे॒वत॑या॒ यूपः॒ स्वयै॒वैन॑न्दे॒वत॒याऽच्छै॒त्यत्य॒न्यानगा॒न्नान्यानुपा॑गा॒मित्या॒हाति॒ ह्य॑न्यानेति॒ नान्यानु॒पैत्य॒र्वाक् त्वा॒ परै॑रविदम्प॒रोऽव॑रै॒रित्या॑हा॒र्वाग्घ्ये॑न॒म्परै᳚र् वि॒न्दति॑ प॒रोऽव॑रै॒स्तन्त्वा॑ जुषे [१३] वैष्ण॒वन्दे॑वय॒ज्याया॒ इत्या॑ह देवय॒ज्यायै॒ ह्ये॑नञ्जु॒षते॑ दे॒वस्त्वा॑ सवि॒ता मद्ध्वा॑ऽन॒क्त्वित्या॑ह॒ तेज॑सै॒वैन॑मन॒क्त्योष॑धे॒ त्राय॑स्वैन॒ꣴ॒ स्वधि॑ते॒ मैन॑ꣳ हिꣳसी॒रित्या॑ह॒ वज्रो॒ वै स्वधि॑तिः॒ शान्त्यै॒ स्वधि॑तेर् वृ॒ख्‍षस्य॒ बिभ्य॑तः प्रथ॒मेन॒ शक॑लेन स॒ह तेजः॒ परा॑ पतति॒ यः प्र॑थ॒मः शक॑लः परा॒पते॒त् तमप्या ह॑रे॒थ् सते॑जस [१४] मे॒वैन॒मा ह॑रती॒मे वै लो॒का यूपा᳚त् प्रय॒तो बि॑भ्यति॒ दिव॒मग्रे॑ण॒ मा ले॑खीर॒न्तरि॑ख्‍ष॒म्मद्ध्ये॑न॒ मा हि॑ꣳसी॒रित्या॑है॒भ्य ए॒वैन॑ल्ँलो॒केभ्यः॑ शमयति॒ वन॑स्पते श॒तव॑ल्‌शो॒ वि रो॒हेत्या॒व्रश्च॑ने जुहोति॒ तस्मा॑दा॒व्रश्च॑नाद्वृ॒ख्‍षाणा॒म्भूया॑ꣳस॒ उत् ति॑ष्ठन्ति स॒हस्र॑वल्‌शा॒ वि व॒यꣳ रु॑हे॒मेत्या॑हा॒ऽऽ*शिष॑मे॒वैतामा शा॒स्तेऽन॑ख्‍षसङ्ग [१५] व्ँवृश्चे॒द्यद॑ख्‍षस॒ङ्गव्ँवृ॒श्चेद॑धी॒षय्ँयज॑मानस्य प्र॒मायु॑कꣴ स्या॒द्यङ्का॒मये॒ताप्र॑तिष्ठितः स्या॒दित्या॑रो॒हन्तस्मै॑ वृश्चेदे॒ष वै वन॒स्पती॑ना॒मप्र॑तिष्ठि॒तोऽप्र॑तिष्ठित ए॒व भ॑वति॒ यङ्का॒मये॑ताप॒शुः स्या॒दित्य॑प॒र्णन्तस्मै॒ शुष्का᳚ग्रव्ँवृश्चेदे॒ष वै वन॒स्पती॑नामपश॒व्यो॑ऽप॒शुरे॒व भ॑वति॒ यङ्का॒मये॑त पशु॒मान्थ् स्या॒दिति॑ बहुप॒र्णन्तस्मै॑ बहुशा॒खव्ँवृ॑श्चेदे॒ष वै [१६] वन॒स्पती॑नाम्पश॒व्यः॑ पशु॒माने॒व भ॑वति॒ प्रति॑ष्ठितव्ँवृश्चेत् प्रति॒ष्ठाका॑मस्यै॒ष वै वन॒स्पती॑नां॒ प्रति॑ष्ठितो॒ यः स॒मे भूम्यै॒ स्वाद्योने॑ रू॒ढः प्रत्ये॒व ति॑ष्ठति॒ यः प्र॒त्यङ्ङुप॑नत॒स्तव्ँवृ॑श्चे॒थ् स हि मेध॑म॒भ्युप॑नतः॒ पञ्चा॑रत्नि॒न्तस्मै॑ वृश्चे॒द्यङ्का॒मये॒तोपै॑न॒मुत्त॑रो य॒ज्ञो न॑मे॒दिति॒ पञ्चा᳚ख्‍षरा प॒ङ्क्तिः पाङ्क्तो॑ य॒ज्ञ उपै॑न॒मुत्त॑रो य॒ज्ञो [१७] न॑मति॒ षड॑रत्निम्प्रति॒ष्ठाका॑मस्य॒ षड्वा ऋ॒तव॑ ऋ॒तुष्वे॒व प्रति॑ तिष्ठति स॒प्तार॑त्निम्प॒शुका॑मस्य स॒प्तप॑दा॒ शक्व॑री प॒शवः॒ शक्व॑री प॒शूने॒वाव॑ रुन्धे॒ नवा॑रत्नि॒न्तेज॑स्कामस्य त्रि॒वृता॒ स्तोमे॑न॒ सम्मि॑त॒न्तेज॑ स्त्रि॒वृत् ते॑ज॒स्व्ये॑व भ॑व॒त्येका॑दशारत्निमिन्द्रि॒यका॑म॒स्यैका॑दशाख्‍षरा त्रि॒ष्टुगि॑न्द्रि॒यं त्रि॒ष्टुगि॑न्द्रिया॒व्ये॑व भ॑वति॒ पञ्च॑दशारत्नि॒म्भ्रातृ॑व्यवतः पञ्चद॒शो वज्रो॒ भ्रातृ॑व्याभिभूत्यै स॒प्तद॑शारत्निम्प्र॒जाका॑मस्य सप्तद॒शः प्र॒जाप॑तिः प्र॒जाप॑ते॒राप्त्या॒ एक॑विꣳशत्यरत्निम्प्रति॒ष्ठाका॑मस्यैकवि॒ꣳ॒शः स्तोमा॑नाम्प्रति॒ष्ठा प्रति॑ष्ठित्या अ॒ष्टाश्रि॑र् भवत्य॒ष्टाख्‍ष॑रा गाय॒त्री तेजो॑ गाय॒त्री गा॑य॒त्री य॑ज्ञमु॒खन्तेज॑सै॒व गा॑यत्रि॒या य॑ज्ञमु॒खेन॒ सम्मि॑तः⁠ [१८] (जु॒षे॒ सते॑जस॒ मन॑ख्‍षसङ्गं बहुशा॒खव्ँवृ॑श्चेदे॒ष वै य॒ज्ञ उपै॑न॒मुत्त॑रो य॒ज्ञ आप्त्या॒ एका॒न्नवि॑ꣳश॒तिश्च॑) ॥३॥
पृ॒थि॒व्यै त्वा॒ऽन्तरि॑ख्‍षाय त्वा दि॒वे त्वेत्या॑है॒भ्य ए॒वैन॑ल्ँलो॒केभ्यः॒ प्रोख्‍ष॑ति॒ परा᳚ञ्च॒म्प्रोख्‍ष॑ति॒ परा॑ङिव॒ हि सु॑व॒र्गो लो॒कः क्रू॒रमि॑व॒ वा ए॒तत् क॑रोति॒ यत् खन॑त्य॒पोऽव॑ नयति॒ शान्त्यै॒ यव॑मती॒रव॑ नय॒त्यूर्ग्वै यवो॒ यज॑मानेन॒ यूपः॒ सम्मि॑तो॒ यावा॑ने॒व यज॑मान॒स्ताव॑तीमे॒वास्मि॒न्नूर्ज॑न्दधाति [१९] पितृ॒णाꣳ सद॑नम॒सीति॑ ब॒र्॒‌हिरव॑ स्तृणाति पितृदेव॒त्या᳚(१॒)ꣴ॒ ह्ये॑तद्यन्निखा॑त॒य्ँयद्ब॒र्॒‌हिरन॑वस्तीर्य मिनु॒यात् पि॑तृदेव॒त्यो॑ निखा॑तः स्याद् ब॒र्॒‌हिर॑व॒स्तीर्य॑ मिनोत्य॒स्यामे॒वैन॑म्मिनोति यूपशक॒लमवा᳚स्यति॒ सते॑जसमे॒वैन॑म्मिनोति दे॒वस्त्वा॑ सवि॒ता मद्ध्वा॑ऽन॒क्त्वित्या॑ह॒ तेज॑सै॒वैन॑मनक्ति सुपिप्प॒लाभ्य॒स्त्वौष॑धीभ्य॒ इति॑ च॒षाल॒म्प्रति॑ [२०] मुञ्चति॒ तस्मा᳚च्छीर्‌ष॒त ओष॑धयः॒ फल॑ङ्गृह्णन्त्य॒नक्ति॒ तेजो॒ वा आज्य॒य्ँयज॑मानेनाग्नि॒ष्ठाऽश्रिः॒ सम्मि॑ता॒ यद॑ग्नि॒ष्ठामश्रि॑म॒नक्ति॒ यज॑मानमे॒व तेज॑साऽनक्त्या॒न्तम॑नक्त्या॒न्तमे॒व यज॑मान॒न्तेज॑साऽनक्ति स॒र्वतः॒ परि॑ मृश॒त्यप॑रिवर्गमे॒वास्मि॒न् तेजो॑ दधा॒त्युद् दिव॑ꣴ स्तभा॒नाऽन्तरि॑ख्‍षम्पृ॒णेत्या॑है॒षाल्ँलो॒काना॒व्ँविधृ॑त्यै वैष्ण॒व्यर्चा [२१] क॑ल्पयति वैष्ण॒वो वै दे॒वत॑या॒ यूपः॒ स्वयै॒वैन॑न्दे॒वत॑या कल्पयति॒ द्वाभ्या᳚ङ्कल्पयति द्वि॒पाद् यज॑मानः॒ प्रति॑ष्ठित्यै॒ यङ्का॒मये॑त॒ तेज॑सैनन्दे॒वता॑भिरिन्द्रि॒येण॒ व्य॑र्द्धयेय॒मित्य॑ग्नि॒ष्ठान्तस्याश्रि॑माहव॒नीया॑दि॒त्थव्ँवे॒त्थव्ँवाऽति॑ नावये॒त् तेज॑सै॒वैन॑न्दे॒वता॑भिरिन्द्रि॒येण॒ व्य॑र्द्धयति॒ यङ्का॒मये॑त॒ तेज॑सैनन्दे॒वता॑भिरिन्द्रि॒येण॒ सम॑र्द्धयेय॒मित्य॑ [२२] ग्नि॒ष्ठान्तस्याश्रि॑माहव॒नीये॑न॒ सम्मि॑नुया॒त् तेज॑सै॒वैन॑न्दे॒वता॑भिरिन्द्रि॒येण॒ सम॑र्द्धयति ब्रह्म॒वनि॑न्त्वा ख्‍षत्र॒वनि॒मित्या॑ह यथाय॒जुरे॒वैतत् परि॑ व्यय॒त्यूर्ग्वै र॑श॒ना यज॑मानेन॒ यूपः॒ सम्मि॑तो॒ यज॑मानमे॒वोर्जा सम॑र्द्धयति नाभिद॒घ्ने परि॑ व्ययति नाभिद॒घ्न ए॒वास्मा॒ ऊर्ज॑न्दधाति॒ तस्मा᳚न्नाभिद॒घ्न ऊ॒र्जा भु॑ञ्जते॒ यङ्का॒मये॑तो॒र्जैन॒ [२३] व्ँव्य॑र्द्धयेय॒मित्यू॒र्द्ध्वाव्ँवा॒ तस्यावा॑ची॒व्ँवाऽवो॑हेदू॒र्जैवैन॒व्ँव्य॑र्द्धयति॒ यदि॑ का॒मये॑त॒ वर्‌षु॑कः प॒र्जन्यः॑ स्या॒दित्यवा॑ची॒मवो॑हे॒द् वृष्टि॑मे॒व नि य॑च्छति॒ यदि॑ का॒मये॒ताव॑र्‌षुकः स्या॒दित्यू॒र्द्ध्वामुदू॑हे॒द् वृष्टि॑मे॒वोद् य॑च्छति पितृ॒णान्निखा॑तम्मनु॒ष्या॑णामू॒र्द्ध्वन्निखा॑ता॒दा र॑श॒नाया॒ ओष॑धीनाꣳ रश॒ना विश्वे॑षां [२४] दे॒वाना॑मू॒र्द्ध्वꣳ र॑श॒नाया॒ आ च॒षाला॒दिन्द्र॑स्य च॒षाल॑ꣳ सा॒द्ध्याना॒मति॑रिक्त॒ꣳ॒ स वा ए॒ष स॑र्वदेव॒त्यो॑ यद्यूपो॒ यद्यूप॑म्मि॒नोति॒ सर्वा॑ ए॒व दे॒वताः᳚ प्रीणाति य॒ज्ञेन॒ वै दे॒वाः सु॑व॒र्गल्ँलो॒कमा॑य॒न् ते॑ऽमन्यन्त मनु॒ष्या॑ नो॒ऽन्वाभ॑विष्य॒न्तीति॒ ते यूपे॑न योपयि॒त्वा सु॑व॒र्गल्ँलो॒कमा॑य॒न् तमृष॑यो॒ यूपे॑नै॒वानु॒ प्राजा॑न॒न् तद् यूप॑स्य यूप॒त्व [२५] य्ँयद् यूप॑म्मि॒नोति॑ सुव॒र्गस्य॑ लो॒कस्य॒ प्रज्ञा᳚त्यै पु॒रस्ता᳚न् मिनोति पु॒रस्ता॒द्धि य॒ज्ञस्य॑ प्रज्ञा॒यतेऽप्र॑ज्ञात॒ꣳ॒ हि तद् यदति॑पन्न आ॒हुरि॒दङ्का॒र्य॑मासी॒दिति॑ सा॒द्ध्या वै दे॒वा य॒ज्ञमत्य॑मन्यन्त॒ तान्‌य॒ज्ञो नास्पृ॑श॒त् तान्‌यद् य॒ज्ञस्याति॑रिक्त॒मासी॒त् तद॑स्पृश॒दति॑रिक्त॒व्ँवा ए॒तद् य॒ज्ञस्य॒ यद॒ग्नाव॒ग्निम्म॑थि॒त्वा प्र॒हर॒त्यति॑रिक्तमे॒तद् [२६] यूप॑स्य॒ यदू॒र्द्ध्वञ्च॒षाला॒त् तेषा॒न्तद् भा॑ग॒धेय॒न्ताने॒व तेन॑ प्रीणाति दे॒वा वै सꣴस्थि॑ते॒ सोमे॒ प्र स्रुचोऽह॑र॒न् प्र यूप॒न्ते॑ऽमन्यन्त यज्ञवेश॒सव्ँवा इ॒दङ्कु॑र्म॒ इति॒ ते प्र॑स्त॒रꣴ स्रु॒चान्नि॒ष्क्रय॑णमपश्य॒न्थ् स्वरु॒य्ँयूप॑स्य॒ सꣴस्थि॑ते॒ सोमे॒ प्र प्र॑स्त॒रꣳ हर॑ति जु॒होति॒ स्वरु॒मय॑ज्ञवेशसाय⁠ [२७] (द्विच॑त्वारिꣳशच्च) ॥४॥
सा॒द्ध्या वै दे॒वा अ॒स्मिन् लो॒क आ॑स॒न् नान्यत् किञ्च॒न मि॒षत् ते᳚ऽग्निमे॒वाग्नये॒ मेधा॒याऽल॑भन्त॒ न ह्य॑न्यदा॑लं॒भ्य॑मवि॑न्द॒न् ततो॒ वा इ॒माः प्र॒जाः प्राजा॑यन्त॒ यद॒ग्नाव॒ग्निम्म॑थि॒त्वा प्र॒हर॑ति प्र॒जानां᳚ प्र॒जन॑नाय रु॒द्रो वा ए॒ष यद॒ग्निर्यज॑मानः प॒शुर्यत् प॒शुमा॒लभ्या॒ग्निम्मन्थे᳚द् रु॒द्राय॒ यज॑मान॒ [२८] मपि॑ दद्ध्यात् प्र॒मायु॑कः स्या॒दथो॒ खल्वा॑हुर॒ग्निः सर्वा॑ दे॒वता॑ ह॒विरे॒तद्यत् प॒शुरिति॒ यत् प॒शुमा॒लभ्या॒ग्निम्मन्थ॑ति ह॒व्यायै॒वाऽऽस॑न्नाय॒ सर्वा॑ दे॒वता॑ जनयत्युपा॒कृत्यै॒व मन्थ्य॒स्तन्नेवाऽऽल॑ब्ध॒न्नेवाना॑लब्धम॒ग्नेर्ज॒नित्र॑म॒सीत्या॑हा॒ग्नेर् ह्ये॑तज्ज॒नित्र॒व्ँवृष॑णौ स्थ॒ इत्या॑ह॒ वृष॑णौ॒ [२९] ह्ये॑तावु॒र्वश्य॑स्या॒युर॒सीत्या॑ह मिथुन॒त्वाय॑ घृ॒तेना॒क्ते वृष॑णन्दधाथा॒मित्या॑ह॒ वृष॑ण॒ꣴ॒ ह्ये॑ते दधा॑ते॒ ये अ॒ग्निङ्गा॑य॒त्रञ्छन्दोऽनु॒ प्र जा॑य॒स्वेत्या॑ह॒ छन्दो॑भिरे॒वैन॒म्प्र ज॑नयत्य॒ग्नये॑ म॒थ्यमा॑ना॒यानु॑ ब्रू॒हीत्या॑ह सावि॒त्रीमृच॒मन्वा॑ह सवि॒तृप्र॑सूत ए॒वैन॑म्मन्थति जा॒तायानु॑ ब्रूहि [३०] प्रह्रि॒यमा॑णा॒यानु॑ ब्रू॒हीत्या॑ह॒ काण्डे॑काण्ड ए॒वैन॑ङ्क्रि॒यमा॑णे॒ सम॑र्द्धयति गाय॒त्रीः सर्वा॒ अन्वा॑ह गाय॒त्रछ॑न्दा॒ वा अ॒ग्निः स्वेनै॒वैन॒ञ्छन्द॑सा॒ सम॑र्द्धयत्य॒ग्निः पु॒रा भव॑त्य॒ग्निम्म॑थि॒त्वा प्र ह॑रति॒ तौ सं॒भव॑न्तौ॒ यज॑मानम॒भि सम्भ॑वतो॒ भव॑तन्नः॒ सम॑नसा॒वित्या॑ह॒ शान्त्यै᳚ प्र॒हृत्य॑ जुहोति जा॒तायै॒वास्मा॒ अन्न॒मपि॑ दधा॒त्याज्ये॑न जुहोत्ये॒तद्वा अ॒ग्नेः प्रि॒यन्धाम॒ यदाज्य॑म्प्रि॒येणै॒वैन॒न्धाम्ना॒ सम॑र्द्धय॒त्यथो॒ तेज॑सा⁠ [३१] (यज॑मानमाह॒ वृष॑णौजा॒तायानु॑ ब्रू॒ह्यप्य॒ष्टाद॑श च) ॥५॥
इ॒षे त्वेति॑ ब॒र्॒‌हिरा द॑त्त इ॒च्छत॑ इव॒ ह्ये॑ष यो यज॑त उप॒वीर॒सीत्या॒होप॒ ह्ये॑नानाक॒रोत्युपो॑ दे॒वान् दैवी॒र्विशः॒ प्रागु॒रित्या॑ह॒ दैवी॒र् ह्ये॑ता विशः॑ स॒तीर् दे॒वानु॑प॒यन्ति॒ वह्नी॑रु॒शिज॒ इत्या॑ह॒र्त्विजो॒ वै वह्न॑य उ॒शिज॒स्तस्मा॑दे॒वमा॑ह॒ बृह॑स्पते धा॒रया॒ वसू॒नीत्या॑ [३२] ह॒ ब्रह्म॒ वै दे॒वाना॒म्बृह॒स्पति॒र् ब्रह्म॑णै॒वास्मै॑ प॒शूनव॑ रुन्धे ह॒व्या ते᳚ स्वदन्ता॒मित्या॑ह स्व॒दय॑त्ये॒वैना॒न् देव॑ त्वष्ट॒र्वसु॑ र॒ण्वेत्या॑ह॒ त्वष्टा॒ वै प॑शू॒नाम्मि॑थु॒नाना॑ꣳ रूप॒कृद् रू॒पमे॒व प॒शुषु॑ दधाति॒ रेव॑ती॒ रम॑द्ध्व॒मित्या॑ह प॒शवो॒ वै रे॒वतीः᳚ प॒शूने॒वास्मै॑ रमयति दे॒वस्य॑ त्वा सवि॒तुः प्र॑स॒व इति॑ [३३] रश॒नामा द॑त्ते॒ प्रसू᳚त्या अ॒श्विनो᳚र्बा॒हुभ्या॒मित्या॑हा॒श्विनौ॒ हि दे॒वाना॑मद्ध्व॒र्यू आस्ता᳚म्पू॒ष्णो हस्ता᳚भ्या॒मित्या॑ह॒ यत्या॑ ऋ॒तस्य॑ त्वा देवहविः॒ पाशे॒नाऽऽर॑भ॒ इत्या॑ह स॒त्यव्ँवा ऋ॒तꣳ स॒त्येनै॒वैन॑मृ॒तेनाऽऽर॑भतेऽख्‍ष्ण॒या परि॑ हरति॒ वद्ध्य॒ꣳ॒ हि प्र॒त्यञ्च॑म्प्रतिमु॒ञ्चन्ति॒ व्यावृ॑त्त्यै॒ धर्‌षा॒ मानु॑षा॒निति॒ नि यु॑नक्ति॒ धृत्या॑ अ॒द्भ्य [३४] स्त्वौष॑धीभ्यः॒ प्रोख्‍षा॒मीत्या॑हा॒द्भ्यो ह्ये॑ष ओष॑धीभ्यः सं॒भव॑ति॒ यत् प॒शुर॒पाम्पे॒रुर॒सीत्या॑है॒ष ह्य॑पाम्पा॒ता यो मेधा॑याऽऽर॒भ्यते᳚ स्वा॒त्तञ्चि॒थ् सदे॑वꣳ ह॒व्यमापो॑ देवीः॒ स्वद॑तैन॒मित्या॑ह स्व॒दय॑त्ये॒वैन॑मु॒परि॑ष्टा॒त् प्रोख्‍ष॑त्यु॒परि॑ष्टादे॒वैन॒म्मेद्ध्य॑ङ्करोति पा॒यय॑त्यन्तर॒त ए॒वैनं॒ मेद्ध्य॑ङ्करोत्य॒धस्ता॒दुपो᳚ख्‍षति स॒र्वत॑ ए॒वैन॒म्मेद्ध्य॑ङ्करोति⁠ [३५] (वसू॒नीति॑ प्रस॒व इत्य॒द्भ्यो᳚ ऽन्तर॒त ए॒वैनं॒ दश॑ च) ॥६॥
अ॒ग्निना॒ वै होत्रा॑ दे॒वा असु॑रान॒भ्य॑भवन्न॒ग्नये॑ समि॒द्ध्यमा॑ना॒यानु॑ ब्रू॒हीत्या॑ह॒ भ्रातृ॑व्याभिभूत्यै स॒प्तद॑श सामिधे॒नीरन्वा॑ह सप्तद॒शः प्र॒जाप॑तिः प्र॒जाप॑ते॒राप्त्यै॑ स॒प्तद॒शान्वा॑ह॒ द्वाद॑श॒ मासाः॒ पञ्च॒र्तवः॒ स स॑व्ँवथ्स॒रः स॑व्ँवथ्स॒रम्प्र॒जा अनु॒ प्र जा॑यन्ते प्र॒जाना᳚म्प्र॒जन॑नाय दे॒वा वै सा॑मिधे॒नीर॒नूच्य॑ य॒ज्ञन्नान्व॑पश्य॒न्थ् स प्र॒जाप॑तिस्तू॒ष्णीमा॑घा॒र [३६] माऽघा॑रय॒त् ततो॒ वै दे॒वा य॒ज्ञमन्व॑पश्य॒न्॒‌यत् तू॒ष्णीमा॑घा॒रमा॑घा॒रय॑ति य॒ज्ञस्यानु॑ख्यात्या॒ असु॑रेषु॒ वै य॒ज्ञ आ॑सी॒त् तन्दे॒वा स्तू᳚ष्णीꣳहो॒मेना॑वृञ्जत॒ यत् तू॒ष्णीमा॑घा॒रमा॑घा॒रय॑ति॒ भ्रातृ॑व्यस्यै॒व तद् य॒ज्ञव्ँवृ॑ङ्क्ते परि॒धीन्थ् सम्मा᳚र्ष्टि पु॒नात्ये॒वैना॒न् त्रिस्त्रिः॒ सम्मा᳚र्ष्टि॒ त्य्रा॑वृ॒द्धि य॒ज्ञोऽथो॒ रख्‍ष॑सा॒मप॑हत्यै॒ द्वाद॑श॒ सम्प॑द्यन्ते॒ द्वाद॑श॒ [३७] मासाः᳚ सव्ँवथ्स॒रः स॑व्ँवथ्स॒रमे॒व प्री॑णा॒त्यथो॑ सव्ँवथ्स॒रमे॒वास्मा॒ उप॑ दधाति सुव॒र्गस्य॑ लो॒कस्य॒ सम॑ष्ट्यै॒ शिरो॒ वा ए॒तद् य॒ज्ञस्य॒ यदा॑घा॒रो᳚ऽग्निः सर्वा॑ दे॒वता॒ यदा॑घा॒रमा॑घा॒रय॑ति शीर्‌ष॒त ए॒व य॒ज्ञस्य॒ यज॑मानः॒ सर्वा॑ दे॒वता॒ अव॑ रुन्धे॒ शिरो॒ वा ए॒तद् य॒ज्ञस्य॒ यदा॑घा॒र आ॒त्मा प॒शुरा॑घा॒र मा॒घार्य॑ प॒शुꣳ सम॑नक्त्या॒त्मन्ने॒व य॒ज्ञस्य॒ [३८] शिरः॒ प्रति॑ दधाति॒ सन्ते᳚ प्रा॒णो वा॒युना॑ गच्छता॒मित्या॑ह वायुदेव॒त्यो॑ वै प्रा॒णो वा॒यावे॒ वास्य॑ प्रा॒णञ्जु॑होति॒ सय्ँयज॑त्रै॒रङ्गा॑नि॒ सय्ँय॒ज्ञप॑तिरा॒शिषेत्या॑ह य॒ज्ञप॑तिमे॒वास्या॒ऽऽशिष॑ङ्गमयति वि॒श्वरू॑पो॒ वै त्वा॒ष्ट्र उ॒परि॑ष्टात् प॒शुम॒भ्य॑वमी॒त् तस्मा॑दु॒परि॑ष्टात् प॒शोर् नाव॑ द्यन्ति॒ यदु॒परि॑ष्टात् प॒शुꣳ स॑म॒नक्ति॒ मेद्ध्य॑मे॒वै [३९] न॑ङ्करोत्यृ॒त्विजो॑ वृणीते॒ छन्दा॑ꣴस्ये॒व वृ॑णीते स॒प्त वृ॑णीते स॒प्त ग्रा॒म्याः प॒शवः॑ स॒प्ताऽऽर॒ण्याः स॒प्त छन्दा॑ꣴस्यु॒भय॒स्याव॑रुद्ध्या॒ एका॑दश प्रया॒जान्‌य॑जति॒ दश॒ वै प॒शोः प्रा॒णा आ॒त्मैका॑द॒शो यावा॑ने॒व प॒शुस्तम्प्र य॑जति व॒पामेकः॒ परि॑ शय आ॒त्मैवाऽऽत्मान॒म्परि॑ शये॒ वज्रो॒ वै स्वधि॑ति॒र् वज्रो॑ यूपशक॒लो घृ॒तं खलु॒ वै दे॒वा वज्र॑ङ्कृ॒त्वा सोम॑मघ्नन् घृ॒तेना॒क्तौ प॒शुन्त्रा॑येथा॒मित्या॑ह॒ वज्रे॑णै॒वैन॒व्ँवशे॑ कृ॒त्वाऽऽल॑भते⁠ [४०] (आ॒घा॒रं प॑द्यन्ते॒ द्वाद॑शा॒ त्मन्ने॒व य॒ज्ञस्य॒मेद्ध्य॑मे॒वखलु॒ वा अ॒ष्टाद॑श च) ॥७॥
पर्य॑ग्नि करोति सर्व॒हुत॑मे॒वैन॑ङ्करो॒त्यस्क॑न्दा॒या स्क॑न्न॒ꣳ॒ हि तद् यद् धु॒तस्य॒ स्कन्द॑ति॒ त्रिः पर्य॑ग्नि करोति॒ त्य्रा॑वृ॒द्धि य॒ज्ञोऽथो॒ रख्‍ष॑सा॒मप॑हत्यै ब्रह्मवा॒दिनो॑ वदन्त्यन्वा॒रभ्यः॑ प॒शू(३)र् नान्वा॒रभ्या(३) इति॑ मृ॒त्यवे॒ वा ए॒ष नी॑यते॒ यत् प॒शुस्तय्ँयद॑न्वा॒रभे॑त प्र॒मायु॑को॒ यज॑मानः स्या॒दथो॒ खल्वा॑हुः सुव॒र्गाय॒ वा ए॒ष लो॒काय॑ नीयते॒ यत् [४१] प॒शुरिति॒ यन्नान्वा॒रभे॑त सुव॒र्गाल्लो॒काद् यज॑मानो हीयेत वपा॒श्रप॑णीभ्याम॒न्वार॑भते॒ तन्नेवा॒न्वार॑ब्ध॒न्नेवान॑न्वारब्ध॒मुप॒ प्रेष्य॑ होतर्‌ह॒व्या दे॒वेभ्य॒ इत्या॑हेषि॒तꣳ हि कर्म॑ क्रि॒यते॒ रेव॑तीर् य॒ज्ञप॑तिम्प्रिय॒धाऽऽवि॑श॒तेत्या॑ह यथाय॒जुरे॒वैतद॒ग्निना॑ पु॒रस्ता॑देति॒ रख्‍ष॑सा॒मप॑हत्यै पृथि॒व्याः सं॒पृचः॑ पा॒हीति॑ ब॒र्॒‌हि [४२] रुपा᳚स्य॒त्यस्क॑न्दा॒यास्क॑न्न॒ꣳ॒ हि तद् यद् ब॒र्॒‌हिषि॒ स्कन्द॒त्यथो॑ बर्‌हि॒षद॑मे॒वैन॑ङ्करोति॒ परा॒ङा व॑र्ततेऽद्ध्व॒र्युः प॒शोः सं᳚ज्ञ॒प्यमा॑नात् प॒शुभ्य॑ ए॒व तन्नि ह्नु॑त आ॒त्मनोऽना᳚व्रस्काय॒ गच्छ॑ति॒ श्रिय॒म्प्र प॒शूना᳚प्नोति॒ य ए॒वव्ँवेद॑ प॒श्चाल्लो॑का॒ वा ए॒षा प्राच्यु॒दानी॑यते॒ यत् पत्नी॒ नम॑स्त आता॒नेत्या॑हाऽऽदि॒त्यस्य॒ वै र॒श्मय॑ [४३] आता॒नास्तेभ्य॑ ए॒व नम॑स्करोत्यन॒र्वा प्रेहीत्या॑ह॒ भ्रातृ॑व्यो॒ वा अर्वा॒ भ्रातृ॑व्यापनुत्त्यै घृ॒तस्य॑ कु॒ल्यामनु॑ स॒ह प्र॒जया॑ स॒ह रा॒यस्पोषे॒णेत्या॑हा॒ऽऽशिष॑मे॒वैतामा शा᳚स्त॒ आपो॑ देवीः शुद्धायुव॒ इत्या॑ह यथाय॒जुरे॒वैतत्⁠ [४४] (लो॒काय॑ नीयते॒ यद् ब॒र्॒‌ही र॒श्मयः॑ स॒प्तत्रि॑ꣳशच्च) ॥८॥
प॒शोर्वा आल॑ब्धस्य प्रा॒णाञ्छुगृ॑च्छति॒ वाक् त॒ आ प्या॑यताम्प्रा॒णस्त॒ आ प्या॑यता॒मित्या॑ह प्रा॒णेभ्य॑ ए॒वास्य॒ शुच॑ꣳ शमयति॒ सा प्रा॒णेभ्योऽधि॑ पृथि॒वीꣳ शुक् प्र वि॑शति॒ शमहो᳚भ्या॒मिति॒ नि न॑यत्यहोरा॒त्राभ्या॑मे॒व पृ॑थि॒व्यै शुच॑ꣳ शमय॒त्योष॑धे॒ त्राय॑स्वैन॒ꣴ॒ स्वधि॑ते॒ मैन॑ꣳ हिꣳसी॒रित्या॑ह॒ वज्रो॒ वै स्वधि॑तिः॒ [४५] शान्त्यै॑ पार्श्व॒त आ च्छ्य॑ति मद्ध्य॒तो हि म॑नु॒ष्या॑ आ॒च्छ्यन्ति॑ तिर॒श्चीन॒मा च्छ्य॑त्यनू॒चीन॒ꣳ॒ हि म॑नु॒ष्या॑ आ॒च्छ्यन्ति॒ व्यावृ॑त्त्यै॒ रख्‍ष॑साम्भा॒गो॑ऽसीति॑ स्थविम॒तो ब॒र्॒‌हिर॒क्त्वाऽपा᳚स्यत्य॒स्नैव रख्‍षा॑ꣳसि नि॒रव॑दयत इ॒दम॒हꣳ रख्‍षो॑ऽध॒मन्तमो॑ नयामि॒ यो᳚ऽस्मान् द्वेष्टि॒ यञ्च॑ व॒यन्द्वि॒ष्म इत्या॑ह॒ द्वौ वाव पुरु॑षौ॒ यञ्चै॒व [४६] द्वेष्टि॒ यश्चै॑न॒न्द्वेष्टि॒ तावु॒भाव॑ध॒मन्तमो॑ नयती॒षे त्वेति॑ व॒पामुत् खि॑दती॒च्छत॑ इव॒ ह्ये॑ष यो यज॑ते॒ यदु॑पतृ॒न्द्याद्रु॒द्रो᳚ऽस्य प॒शून् घातु॑कः स्या॒द् यन्नोप॑तृ॒न्द्यादय॑ता स्याद॒न्ययो॑पतृ॒णत्त्य॒न्यया॒ न धृत्यै॑ घृ॒तेन॑ द्यावापृथिवी॒ प्रोर्ण्वा॑था॒मित्या॑ह॒ द्यावा॑पृथि॒वी ए॒व रसे॑नान॒क्त्यच्छि॑न्नो॒ [४७] रायः॑ सु॒वीर॒ इत्या॑ह यथाय॒जुरे॒वैतत् क्रू॒रमि॑व॒ वा ए॒तत् क॑रोति॒ यद् व॒पामु॑त्खि॒दत्यु॒र्व॑न्तरि॑ख्‍ष॒ मन्वि॒हीत्या॑ह॒ शान्त्यै॒ प्र वा ए॒षो᳚ऽस्माल्लो॒काच्च्य॑वते॒ यः प॒शुम्मृ॒त्यवे॑ नी॒यमा॑नमन्वा॒रभ॑ते वपा॒श्रप॑णी॒ पुन॑र॒न्वार॑भते॒ऽस्मिन्ने॒व लो॒के प्रति॑ तिष्ठत्य॒ग्निना॑ पु॒रस्ता॑देति॒ रख्‍ष॑सा॒मप॑हत्या॒ अथो॑ दे॒वता॑ ए॒व ह॒व्येना [४८] न्वे॑ति॒ नान्त॒ममङ्गा॑र॒मति॑ हरे॒द् यद॑न्त॒ममङ्गा॑रमति॒हरे᳚द्दे॒वता॒ अति॑ मन्येत॒ वायो॒ वीहि॑ स्तो॒काना॒मित्या॑ह॒ तस्मा॒द् विभ॑क्ताः स्तो॒का अव॑ पद्य॒न्तेऽग्र॒व्ँवा ए॒तत् प॑शू॒नाय्ँयद् व॒पा ऽग्र॒मोष॑धीनाम्ब॒र्॒‌हि॒रग्रे॑णै॒वाग्र॒ꣳ॒ सम॑र्द्धय॒त्यथो॒ ओष॑धीष्वे॒व प॒शून् प्रति॑ ष्ठापयति॒ स्वाहा॑कृतीभ्यः॒ प्रेष्येत्या॑ह [४९] य॒ज्ञस्य॒ समि॑ष्ट्यै प्राणापा॒नौ वा ए॒तौ प॑शू॒नाय्ँयत् पृ॑षदा॒ज्यमा॒त्मा व॒पा पृ॑षदा॒ज्यम॑भि॒घार्य॑ व॒पाम॒भि घा॑रयत्या॒त्मन्ने॒व प॑शू॒नाम्प्रा॑णापा॒नौ द॑धाति॒ स्वाहो॒र्द्ध्वन॑भसम्मारु॒तङ्ग॑च्छत॒मित्या॑हो॒र्द्ध्वन॑भा ह स्म॒ वै मा॑रु॒तो दे॒वाना᳚व्ँवपा॒श्रप॑णी॒ प्र ह॑रति॒ तेनै॒वैने॒ प्र ह॑रति॒ विषू॑ची॒ प्र ह॑रति॒ तस्मा॒द् विष्व॑ञ्चौ प्राणापा॒नौ⁠ [५०] (स्वधि॑ति श्चै॒वा च्छि॑न्नो ह॒व्येने॒ ष्येत्या॑ह॒ षट्च॑त्वारिꣳशच्च) ॥९॥
प॒शुमा॒लभ्य॑ पुरो॒डाश॒न्निर् व॑पति॒ समे॑धमे॒वैन॒मा ल॑भते व॒पया᳚ प्र॒चर्य॑ पुरो॒डाशे॑न॒ प्र च॑र॒त्यूर्ग् वै पु॑रो॒डाश॒ ऊर्ज॑मे॒व प॑शू॒नाम्म॑द्ध्य॒तो द॑धा॒त्यथो॑ प॒शोरे॒व छि॒द्रमपि॑ दधाति पृषदा॒ज्यस्यो॑प॒हत्य॒ त्रिः पृ॑च्छति शृ॒तꣳ ह॒वी(३)ः श॑मित॒रिति॒ त्रिष॑त्या॒ हि दे॒वा योऽशृ॑तꣳ शृ॒तमाह॒ स एन॑सा प्राणापा॒नौ वा ए॒तौ प॑शू॒ना [५१] य्ँयत् पृ॑षदा॒ज्यम्प॒शोः खलु॒ वा आल॑ब्धस्य॒ हृद॑यमा॒त्माऽभि समे॑ति॒ यत् पृ॑षदा॒ज्येन॒ हृद॑यमभिघा॒रय॑त्या॒त्मन्ने॒व प॑शू॒नाम्प्रा॑णापा॒नौ द॑धाति प॒शुना॒ वै दे॒वाः सु॑व॒र्गल्ँलो॒कमा॑य॒न् ते॑ऽमन्यन्त मनु॒ष्या॑ नो॒ऽन्वाभ॑विष्य॒न्तीति॒ तस्य॒ शिरः॑ छि॒त्त्वा मेध॒म्प्राख्‍षा॑रय॒न्थ् स प्र॒ख्‍षो॑ऽभव॒त् तत् प्र॒ख्‍षस्य॑ प्रख्‍ष॒त्वय्ँयत् प्ल॑ख्‍षशा॒खोत्त॑रब॒र्॒‌हिर् भव॑ति॒ समे॑धस्यै॒व [५२] प॒शोरव॑ द्यति प॒शुव्ँवै ह्रि॒यमा॑ण॒ꣳ॒ रख्‍षा॒ꣴ॒स्यनु॑ सचन्तेऽन्त॒रा यूप॑ञ्चाऽऽहव॒नीय॑ञ्च हरति॒ रख्‍ष॑सा॒मप॑हत्यै प॒शोर् वा आल॑ब्धस्य॒ मनोऽप॑ क्रामति म॒नोता॑यै ह॒विषो॑ऽवदी॒यमा॑न॒स्यानु॑ ब्रू॒हीत्या॑ह॒ मन॑ ए॒वास्याव॑ रुन्ध॒ एका॑दशाव॒दाना॒न्यव॑ द्यति॒ दश॒ वै प॒शोः प्रा॒णा आ॒त्मैका॑द॒शो यावा॑ने॒व प॒शुस्तस्याव॑ [५३] द्यति॒ हृद॑य॒स्याग्रेऽव॑ द्य॒त्यथ॑ जि॒ह्वाया॒ अथ॒ वख्‍ष॑सो॒ यद्वै हृद॑येनाभि॒गच्छ॑ति॒ तज्जि॒ह्वया॑ वदति॒ यज्जि॒ह्वया॒ वद॑ति॒ तदुर॒सोऽधि॒ निर् व॑दत्ये॒तद्वै प॒शोर् य॑थापू॒र्वय्ँयस्यै॒वम॑व॒दाय॑ यथा॒काम॒मुत्त॑रेषामव॒द्यति॑ यथा पू॒र्वमे॒वास्य॑ प॒शोरव॑त्तम्भवति मद्ध्य॒तो गु॒दस्याव॑ द्यति मद्ध्य॒तो हि प्रा॒ण उ॑त्त॒मस्याव॑ द्यत्यु [५४] त्त॒मो हि प्रा॒णो यदीत॑र॒य्ँयदीत॑रमु॒भय॑मे॒वाजा॑मि॒ जाय॑मानो॒ वै ब्रा᳚ह्म॒णस्त्रि॒भिर्‌ऋ॑ण॒वा जा॑यते ब्रह्म॒चर्ये॒णर्‌षि॑भ्यो य॒ज्ञेन॑ दे॒वेभ्यः॑ प्र॒जया॑ पि॒तृभ्य॑ ए॒ष वा अ॑नृ॒णो यः पु॒त्री यज्वा᳚ ब्रह्मचारिवा॒सी तद॑व॒दानै॑रे॒वाव॑ दयते॒ तद॑व॒दाना॑नामवदान॒त्वन्दे॑वासु॒राः सय्ँय॑त्ता आस॒न् ते दे॒वा अ॒ग्निम॑ब्रुव॒न् त्वया॑ वी॒रेणासु॑रान॒भि भ॑वा॒मेति॒ [५५] सो᳚ऽब्रवी॒द् वर॑व्ँवृणै प॒शोरु॑द्धा॒रमुद्ध॑रा॒ इति॒ स ए॒तमु॑द्धा॒रमुद॑हरत॒ दोः पू᳚र्वा॒र्द्धस्य॑ गु॒दं म॑द्ध्य॒तः श्रोणि॑ञ्जघना॒र्द्धस्य॒ ततो॑ दे॒वा अभ॑व॒न् पराऽसु॑रा॒ यत् त्य्र॒ङ्गाणा॑ꣳ समव॒द्यति॒ भ्रातृ॑व्याभिभूत्यै॒ भव॑त्या॒त्मना॒ परा᳚ऽस्य॒ भ्रातृ॑व्यो भवत्यख्‍ष्ण॒याऽव॑ द्यति॒ तस्मा॑दख्‍ष्ण॒या प॒शवोऽङ्गा॑नि॒ प्र ह॑रन्ति॒ प्रति॑ष्ठित्यै⁠ [५६] (ए॒तौ प॑शू॒नाꣳ समे॑धस्यै॒व तस्याऽवो᳚ त्त॒मस्याव॑ द्य॒ती ति॒ पञ्च॑चत्वारिꣳशच्च) ॥१०॥
मेद॑सा॒ स्रुचौ॒ प्रोर्णो॑ति॒ मेदो॑रूपा॒ वै प॒शवो॑ रू॒पमे॒व प॒शुषु॑ दधाति यू॒षन्न॑व॒धाय॒ प्रोर्णो॑ति॒ रसो॒ वा ए॒ष प॑शू॒नाय्ँयद्यू रस॑मे॒व प॒शुषु॑ दधाति पा॒र्श्वेन॑ वसाहो॒मम्प्र यौ॑ति॒ मद्ध्य॒व्ँवा ए॒तत् प॑शू॒नाय्ँयत् पा॒र्श्वꣳ रस॑ ए॒ष प॑शू॒नाय्ँयद्वसा॒ यत् पा॒र्श्वेन॑ वसाहो॒मम्प्र॒यौति॑ मद्ध्य॒त ए॒व प॑शू॒नाꣳ रस॑न्दधाति॒ घ्नन्ति॒ [५७] वा ए॒तत् प॒शुय्ँयथ् सं᳚ज्ञ॒पय॑न्त्यै॒न्द्रः खलु॒ वै दे॒वत॑या प्रा॒ण ऐ॒न्द्रो॑ऽपा॒न ऐ॒न्द्रः प्रा॒णो अङ्गे॑अङ्गे॒ नि दे᳚द्ध्य॒दित्या॑ह प्राणापा॒नावे॒व प॒शुषु॑ दधाति॒ देव॑ त्वष्ट॒र् भूरि॑ ते॒ सꣳस॑मे॒त्वित्या॑ह त्वा॒ष्ट्रा हि दे॒वत॑या प॒शवो॒ विषु॑रूपा॒ यथ् सल॑ख्‍ष्माणो॒ भव॒थेत्या॑ह॒ विषु॑रूपा॒ ह्ये॑ते सन्तः॒ सल॑ख्‍ष्माण ए॒तर्‌हि॒ भव॑न्ति देव॒त्रा यन्त॒ [५८] मव॑से॒ सखा॒योऽनु॑ त्वा मा॒ता पि॒तरो॑ मद॒न्त्वित्या॒हा नु॑मतमे॒वैन॑म्मा॒त्रा पि॒त्रा सु॑व॒र्गल्ँलो॒कङ्ग॑मयत्यर्द्ध॒र्चे व॑साहो॒मञ्जु॑होत्य॒सौ वा अ॑र्द्ध॒र्च इ॒यम॑र्द्ध॒र्च इ॒मे ए॒व रसे॑नानक्ति॒ दिशो॑ जुहोति॒ दिश॑ ए॒व रसे॑नान॒क्त्यथो॑ दि॒ग्भ्य ए॒वोर्ज॒ꣳ॒ रस॒मव॑ रुन्धे प्राणापा॒नौ वा ए॒तौ प॑शू॒नाय्ँयत् पृ॑षदा॒ज्यव्ँवा॑नस्प॒त्याः खलु॒ [५९] वै दे॒वत॑या प॒शवो॒ यत् पृ॑षदा॒ज्यस्यो॑प॒हत्याऽऽह॒ वन॒स्पत॒येऽनु॑ ब्रूहि॒ वन॒स्पत॑ये॒ प्रेष्येति॑ प्राणापा॒नावे॒व प॒शुषु॑ दधात्य॒न्यस्या᳚न्यस्य समव॒त्तꣳ स॒मव॑द्यति॒ तस्मा॒न्नाना॑रूपाः प॒शवो॑ यू॒ष्णोप॑ सिञ्चति॒ रसो॒ वा ए॒ष प॑शू॒नाय्ँयद्यू रस॑मे॒व प॒शुषु॑ दधा॒तीडा॒मुप॑ ह्वयते प॒शवो॒ वा इडा॑ प॒शूने॒वोप॑ ह्वयते च॒तुरुप॑ ह्वयते॒ [६०] चतु॑ष्पादो॒ हि प॒शवो॒ यङ्का॒मये॑ताप॒शुः स्या॒दित्य॑मे॒दस्क॒न्तस्मा॒ आ द॑द्ध्या॒न्मेदो॑रूपा॒ वै प॒शवो॑ रू॒पेणै॒वैन॑म्प॒शुभ्यो॒ निर् भ॑जत्यप॒शुरे॒व भ॑वति॒ यङ्का॒मये॑त पशु॒मान्थ् स्या॒दिति॒ मेद॑स्व॒त् तस्मा॒ आ द॑द्ध्या॒न्मेदो॑रूपा॒ वै प॒शवो॑ रू॒पेणै॒वास्मै॑ प॒शूनव॑ रुन्धे पशु॒माने॒व भ॑वति प्र॒जाप॑तिर् य॒ज्ञम॑सृजत॒ स आज्यं॑ [६१] पु॒रस्ता॑दसृजत प॒शुम्म॑द्ध्य॒तः पृ॑षदा॒ज्यम्प॒श्चात् तस्मा॒दाज्ये॑न प्रया॒जा इ॑ज्यन्ते प॒शुना॑ मद्ध्य॒तः पृ॑षदा॒ज्येना॑नूया॒जास्तस्मा॑दे॒तन्मि॒श्रमि॑व पश्चाथ्सृ॒ष्टꣴ ह्येका॑दशानूया॒जान्‌य॑जति॒ दश॒ वै प॒शोः प्रा॒णा आ॒त्मैका॑द॒शो यावा॑ने॒व प॒शुस्तमनु॑ यजति॒ घ्नन्ति॒ वा ए॒तत् प॒शुय्ँयथ् सं᳚ज्ञ॒पय॑न्ति प्राणापा॒नौ खलु॒ वा ए॒तौ प॑शू॒नाय्ँयत् पृ॑षदा॒ज्यय्ँयत् पृ॑षदा॒ज्येना॑ नूया॒जान्‌यज॑ति प्राणापा॒नावे॒व प॒शुषु॑ दधाति⁠ [६२] (घ्नन्ति॒ यन्तं॒खलु॑ च॒तुरुप॑ ह्वयत॒ आज्यं॒ यत् पृ॑षदा॒ज्येन॒ षट् च॑) ॥११॥
(चात्वा॑लाथ् सुव॒र्गाय॒ यद् वै॑सर्ज॒नानि॑ वैष्ण॒व्यर्चा पृ॑थि॒व्यै सा॒द्ध्या इ॒षे त्वे त्य॒ग्निना॒ पर्य॑ग्नि प॒शोः प॒शुमा॒लभ्य॒ मेद॑सा॒ स्रुचा॒ वेका॑दश)
(चात्वा॑लाद् दे॒वानु॒पैति॑ मुञ्चति प्रह्रि॒यमा॑णाय॒ पर्य॑ग्नि प॒शुमा॒लभ्य॒ चतु॑ष्पादो॒ द्विष॑ष्टिः)
(चात्वा॑लात् प॒शुषु॑ दधाति)
अनुवाकाः पञ्चशती
११ ६२