अघमर्‌षण सूक्तं

अघमर्षणसूक्तम्

ओं नमः परमात्मने, श्री महागणपतये नमः,

श्री गुरुभ्यो नमः⁠। ह॒रिः॒ ओं⁠॥

ॐ
तै.आ.६.१.१२
हिर॑ण्यशृङ्ग॒व्ँवरु॑णं॒ प्रप॑द्ये ती॒र्त्थं मे॑ देहि॒ याचि॑तः⁠। य॒न्मया॑ भु॒क्तम॒साधू॑नां पा॒पेभ्य॑श्च प्र॒तिग्र॑हः⁠। यन्मे॒ मन॑सा वा॒चा॒ क॒र्म॒णा वा दु॑ष्कृतं॒ कृतं⁠। तन्न॒ इन्द्रो॒ वरु॑णो॒ बृह॒स्पति॑स्सवि॒ता च॑ पुनन्तु॒ पुनः॑पुनः⁠। नमो॒ऽग्नये᳚ ऽफ्सु॒मते॒ नम॒ इन्द्रा॑य॒ नमो॒ वरु॑णाय॒ नमो वारुण्यै॑ नमो॒ऽद्भ्यः⁠॥ १ यद॒पां क्रू॒रय्ँयद॑मे॒द्ध्यय्ँयद॑शा॒न्तं तदप॑गच्छतात्⁠। अ॒त्या॒श॒नाद॑तीपा॒ना॒द्य॒च्च उ॒ग्रात् प्र॑ति॒ग्रहा᳚त्⁠। तन्नो॒ वरु॑णो रा॒जा॒ पा॒णिना᳚ ह्यव॒मर्‌श॑तु⁠। सो॑ऽहम॑पा॒पो वि॒रजो॒ निर्मु॒क्तो मु॑क्तकि॒ल्बिषः॑⁠। नाक॑स्य पृ॒ष्ठ मारु॑ह्य॒ गच्छे॒द् ब्रह्म॑ सलो॒कतां⁠। यश्चा॒फ्सु वरु॑ण॒स्स पु॒नात्व॑घमर्‌ष॒णः⁠। इ॒मं मे॑ गंगे यमुने सरस्वति॒ शुतु॑द्रि॒ स्तोम॑ꣳ सचता॒ परु॒ष्णिया⁠। अ॒सि॒क्नि॒या म॑रुद्वृधे वि॒तस्त॒या ऽऽर्जी॑कीये श्रुणु॒ह्या सु॒षोम॑या⁠। ऋ॒तं च॑ स॒त्यं चा॒भी॒᳚द्धा॒त्तप॒सोऽद्ध्य॑जायत⁠। ततो॒ रात्रि॑रजायत॒ तत॑स्समु॒द्रो अ॑र्ण॒वः⁠॥ २ स॒मु॒द्राद॑र्ण॒वादधि॑ सव्ँवथ्स॒रो अ॑जायत⁠। अ॒हो॒रा॒त्राणि॑ वि॒दध॒द्विश्व॑स्य मिष॒तो व॒शी⁠। सू॒र्या॒च॒न्द्र॒मसौ॑ धा॒ता य॑थापू॒र्वम॑कल्पयत्⁠। दिवं॑ च पृथि॒वीं चा॒न्तरि॑ख्‍ष॒मथो॒ सुवः॑⁠। यत्पृ॑थि॒व्याꣳ रजः॑ स्व॒मान्तरि॑ख्‍षे वि॒ रोद॑सी⁠। इ॒माꣴ स्तदा॒पो वरु॑णः पु॒नात्व॑घमर्‌ष॒णः⁠। पु॒नन्तु॒ वस॑वः पु॒नातु॒ वरु॑णः पु॒नात्व॑घमर्‌ष॒णः⁠। ए॒ष भू॒तस्य॑ म॒द्ध्ये भुव॑नस्य गो॒प्ता⁠। ए॒ष पु॒ण्यकृ॑ताल्ँलो॒का॒ने॒ष मृ॒त्योर्‌हि॑र॒ण्मयं᳚⁠। द्यावा॑पृथि॒व्योर्‌हि॑र॒ण्मय॒ꣳ॒ सꣴश्रि॑त॒ꣳ॒ सुवः॑⁠॥ ३ स न॒ स्सुवः॒ सꣳशि॑शाधि⁠। आर्द्रं॒ ज्वल॑ति॒ ज्योति॑र॒हम॑स्मि⁠। ज्योति॒र् ज्वल॑ति॒ ब्रह्मा॒हम॑स्मि⁠। यो॑ऽहम॑स्मि॒ ब्रह्मा॒हम॑स्मि⁠। अ॒हम॑स्मि॒ ब्रह्मा॒हम॑स्मि⁠। अ॒हमे॒वाहं मां जु॑होमि॒ स्वाहा᳚⁠। अ॒का॒र्य॒का॒र्य॑वकी॒र्णी स्ते॒नो भ्रू॑ण॒हा गु॑रुत॒ल्पगः⁠। वरु॑णो॒ऽपाम॑घमर्‌ष॒णस्तस्मा᳚त् पा॒पात् प्रमु॑च्यते⁠। र॒जोभूमि॑स्त्व॒ माꣳ रोद॑यस्व॒ प्रव॑दन्ति॒ धीराः᳚⁠। आक्रा᳚न् थ्समु॒द्रः प्र॑थ॒मे विध॑र्मञ्ज॒नय॑न् प्र॒जा भुव॑नस्य॒ राजा᳚⁠। वृषा॑ प॒वित्रे॒ अधि॒सानो॒ अव्ये॑ बृ॒हथ् सोमो॑ वावृधे सुवा॒न इन्दुः॑⁠॥
Sections१
Mantras१
Version5.0