भू सूक्तं

भूसूक्तम्

ओं नमः परमात्मने, श्री महागणपतये नमः,

श्री गुरुभ्यो नमः⁠। ह॒रिः॒ ओं⁠॥

ॐ
तै.सं.१.५.३.१
भूमि॑र् भू॒म्ना द्यौर् व॑रि॒णाऽन्तरि॑ख्‍षं महि॒त्वा⁠। उ॒पस्थे॑ ते देव्यदिते॒ऽग्निम॑न्ना॒दम॒न्नाद्या॒याद॑धे⁠। आऽयङ्गौः पृश्ञिरक्रमी॒दस॑नन् मा॒तरं॒ पुनः॑⁠। पि॒तर॑ञ्च प्र॒यन्थ् सुवः॑⁠। त्रि॒ꣳ॒शद्धाम॒ वि रा॑जति॒ वाक् प॑त॒ङ्गाय॑ शिश्रिये⁠। प्र त्य॑स्य वह॒ द्युभिः॑⁠। अ॒स्य प्रा॒णाद॑पान॒त्य॑न्तश्च॑रति रोच॒ना⁠। व्य॑ख्यन् महि॒ष स्सुवः॑⁠॥ १ यत्वा᳚ क्रु॒द्धः प॑रो॒वप॑ म॒न्युना॒ यदव॑र्त्त्या⁠। सु॒कल्प॑मग्ने॒ तत्तव॒ पुन॒स्त्वोद् दी॑पयामसि⁠। यत्ते॑ म॒न्युप॑रोप्तस्य पृथि॒वीमनु॑ दद्ध्व॒से⁠। आ॒दि॒त्या विश्वे॒ तद्दे॒वा वस॑वश्च स॒माभ॑रन्न्⁠। मनो॒ ज्योति॑र् जुषता॒माज्यं॒ विच्छि॑न्नय्ँय॒ज्ञꣳ समि॒मन्द॑धातु⁠। बृह॒स्पति॑स्तनुतामि॒मन्नो॒ विश्वे॑ दे॒वा इ॒ह मा॑दयन्तां⁠॥ २ स॒प्त ते॑ अग्ने स॒मिधः॑ स॒प्त जि॒ह्वाः स॒प्तर्‌ष॑यःस॒प्त धाम॑ प्रि॒याणि॑⁠। स॒प्त होत्रा᳚ स्सप्त॒धा त्वा॑ यजन्ति स॒प्त योनी॒रा पृ॑णस्वा घृ॒तेन॑⁠। पुन॑रू॒र्जा नि व॑र्त्तस्व॒ पुन॑रग्न इ॒हा ऽऽयु॑षा⁠। पुन॑र् नः पाहि वि॒श्वतः॑⁠। स॒ह र॒य्या नि व॑र्त्त॒स्वाग्ने॒ पिन्व॑स्व॒ धार॑या⁠। वि॒श्वफ्स्नि॑या वि॒श्वत॒स्परि॑⁠॥ ३ लेक॒स्सले॑कस्सु॒लेक॒ स्तेन॑ आदि॒त्या आज्यं॑ जुषा॒णा वि॑यन्तु॒, केत॒स्सके॑तस्सु॒केत॒ स्तेन॑ आदि॒त्या आज्यं॑ जुषा॒णा वि॑यन्तु॒ , विव॑स्वा॒ꣳ॒ अधि॑ति॒र् देव॑जूति॒स्तेन॑ आदि॒त्या आज्यं॑ जुषा॒णा वि॑यन्तु⁠॥

॥ ओं शान्तिः॒ शान्तिः॒ शान्तिः॑ ॥

Sections१
Mantras१
Version5.0