मेधा सूक्तं

मेधासूक्तम्

ओं नमः परमात्मने, श्री महागणपतये नमः,

श्री गुरुभ्यो नमः⁠। ह॒रिः॒ ओं⁠॥

ॐ
तै.आ.६.४१.१
मे॒धा दे॒वी जु॒षमा॑णा न॒ आगा᳚द् वि॒श्वाची॑ भ॒द्रा सु॑मन॒स्यमा॑ना⁠। त्वया॒ जुष्टा॑ नु॒दमा॑ना (जु॒षमा॑णा) दु॒रुक्ता᳚न् बृ॒हद्व॑देम वि॒दथे॑ सु॒वीराः᳚⁠॥ त्वया॒ जुष्ट॑ ऋ॒षिर् भ॑वति देवि॒ त्वया॒ ब्रह्मा॑ऽऽग॒तश्री॑रु॒त त्वया᳚⁠। त्वया॒ जुष्ट॑श्चि॒त्रव्ँवि॑न्दते वसु॒ सा नो॑ जुषस्व॒ द्रवि॑णो न मेधे⁠॥ मे॒धां म॒ इन्द्रो॑ ददातु मे॒धां दे॒वी सर॑स्वती⁠। मे॒धां मे॑ अ॒श्विना॑वु॒भावाध॑त्तां॒ पुष्क॑रस्रजा⁠॥ अ॒फ्स॒रासु॑ च॒ या मे॒धा ग॑न्ध॒र्वेषु॑ च॒ यन्मनः॑⁠। दैवीं᳚ मे॒धा मनुष्यजा सा मां᳚ मे॒धा सु॒रभि॑र् जुषतां⁠॥ (दैवीं᳚ मे॒धा सर॑स्वती॒ सा मां᳚ मे॒धा सु॒रभि॑र् जुषता॒ꣴ ॒ स्वाहा᳚ ) आमां᳚ मे॒धा सु॒रभि॑र् वि॒श्वरू॑पा॒ हिर॑ण्यवर्णा॒ जग॑ती जग॒म्या⁠। ऊर्ज॑स्वती॒ पय॑सा॒ पिन्व॑माना॒ सा मां᳚ मे॒धा सु॒प्रती॑का जुषन्तां⁠॥ मयि॑ मे॒धां मयि॑ प्र॒जां मय्य॒ग्निस्तेजो॑ दधातु॒ , मयि॑ मे॒धां मयि॑ प्र॒जां मयीन्द्र॑ इन्द्रि॒यं द॑धातु॒ , मयि॑ मे॒धां मयि॑ प्र॒जां मयि॒ सूर्यो॒ भ्राजो॑ दधातु⁠॥हं॒स हं॒साय॑ वि॒द्महे॑ परम हं॒साय॑ धीमहि⁠। तन्नो॑ हंसः प्रचो॒दया᳚त्⁠॥

॥ ओं शान्तिः॒ शान्तिः॒ शान्तिः॑ ॥

Sections१
Mantras१
Version5.0