तै.आ.३.१३.१
अ॒द्भ्यस्संभू॑तः पृथि॒व्यै रसा᳚च्च। वि॒श्वक॑र्मणः॒ सम॑वर्त्त॒ताधि॑। तस्य॒ त्वष्टा॑ वि॒दध॑द् रू॒पमे॑ति। तत्पुरु॑षस्य॒ विश्व॒माजा॑न॒मग्रे᳚। १ वेदा॒हमे॒तं पुरु॑षं म॒हान्तं᳚। आ॒दि॒त्यव॑र्णं॒ तम॑सः॒ पर॑स्तात्। तमे॒वव्ँवि॒द्वान॒मृत॑ इ॒ह भ॑वति। नान्यः पन्था॑ विद्य॒तेऽय॑नाय। २ प्र॒जाप॑तिश्चरति॒ गर्भे॑ अ॒न्तः। अ॒जाय॑मानो बहु॒धा विजा॑यते। तस्य॒ धीराः॒ परि॑जानन्ति॒ योनिं᳚। मरी॑चीनां प॒दमि॑च्छन्ति वे॒धसः॑। ३ यो दे॒वेभ्य॒ आत॑पति। यो दे॒वानां᳚ पु॒रोहि॑तः। पूर्वो॒ यो दे॒वेभ्यो॑ जा॒तः। नमो॑ रु॒चाय॒ ब्राह्म॑ये। ४ रुचं॑ ब्रा॒ह्मञ्ज॒नय॑न्तः। दे॒वा अग्रे॒ तद॑ब्रुवन्न्। यस्त्वै॒वं ब्रा᳚ह्म॒णो वि॒द्यात्। तस्य॑ दे॒वा अस॒न्वशे᳚। ५ ह्रीश्च॑ ते ल॒ख्ष्मीश्च॒ पत्न्यौ᳚। अ॒हो॒रा॒त्रे पा॒र्श्वे। नख्ष॑त्राणि रू॒पं। अ॒श्विनौ॒ व्यात्तं᳚। इ॒ष्टं म॑निषाण। अ॒मुं म॑निषाण। सर्वं॑ मनिषाण॥
१
उत्तर नारायणं
२
महा नारायणं
स॒ह॒स्र॒शी॑र्षं दे॒व॒व्ँवि॒श्वाख्ष॑व्ँवि॒श्व शं॑भुवं। विश्वं॑ ना॒राय॑णं दे॒व॒म॒ख्षरं॑ पर॒मं प॒दं॥ १ वि॒श्वतः॒ पर॑मान्नि॒त्य॒व्ँवि॒श्वं ना॑राय॒णꣳ ह॑रिं। विश्व॑मे॒वेदं पुरु॑ष॒ स्तद्विश्व॒मुप॑जीवति॥ २ पति॒व्ँविश्व॑स्या॒त्मेश्व॑र॒ꣳ॒ शाश्व॑तꣳ शि॒वम॑च्युतं। ना॒राय॒णं म॑हाज्ञे॒य॒व्ँवि॒श्वात्मा॑नं प॒राय॑णं॥ ३ ना॒राय॒ण प॑रो ज्यो॒ति॒रा॒त्मा ना॑रय॒णः प॑रः॥ ४ ना॒राय॒ण प॑रं ब्र॒ह्म॒ त॒त्त्वं ना॑राय॒णः प॑रः। ना॒राय॒ण प॑रो ध्या॒ता॒ ध्या॒नं ना॑राय॒णः प॑रः। यच्च॑ कि॒ञ्चिज्ज॑गथ् स॒र्वं॒ दृ॒श्यते᳚ श्रूय॒तेऽपि॑ वा। अन्त॑र् ब॒हिश्च॑ तथ् स॒र्व॒व्ँव्या॒प्य ना॑राय॒णः स्थि॑तः॥ ५ अन॑न्त॒मव्य॑यं क॒विꣳ स॑मु॒द्रेऽन्त॑व्ँवि॒श्वशं॑भुवं। प॒द्म॒को॒शप्र॑तीका॒श॒ꣳ॒ हृ॒दयं॑ चाप्य॒धोमु॑खं॥ ६ अधो॑ नि॒ष्ट्या वि॑तस्त्या॒न्ते॒ ना॒भ्यामु॑परि॒ तिष्ठ॑ति। ज्वा॒ल॒मा॒लाकु॑लं भा॒ती॒ वि॒श्वस्या॑यत॒नं म॑हत्॥ ७ सन्त॑तꣳ शि॒लाभि॑स्तु॒ लंब॑त्या कोश॒सन्नि॑भं। तस्यान्ते॑ सुषि॒रꣳ सू॒ख्ष्मं तस्मि᳚न्थ् स॒र्वं प्रति॑ष्ठितं॥ ८ तस्य॒ मद्ध्ये॑ म॒हान॑ग्निर् वि॒श्वार्चि॑र् वि॒श्वतो॑ मुखः। सोऽग्र॑भु॒ग् विभ॑जन् ति॒ष्ठ॒न्नाहा॑रमज॒रः क॒विः॥ ९ ति॒र्य॒गू॒र्द्ध्व म॑धश्शा॒यी॒ र॒श्मय॑स्तस्य॒ सन्त॑ता। स॒न्ता॒पय॑ति स्वं दे॒हमापा॑दतल॒ मस्त॑गः। तस्य॒ मद्ध्ये॒ वह्नि॑ शिखा अ॒णीयो᳚र्द्ध्वा व्य॒वस्थि॑तः॥ १० नी॒लतो॑ यद॑ मद्ध्य॒स्था॒द् वि॒द्युल्ले॑खेव॒ भास्व॑रा। नी॒वार॒ शूक॑वत्त॒न्वी॒ पी॒ता भा᳚स्वत्य॒णूप॑मा॥ ११ तस्याः᳚ शिखा॒या म॑द्ध्ये प॒रमा᳚त्मा व्य॒वस्थि॑तः। स ब्रह्म॒ स शिवः॒ स हरिः॒ सेन्द्रः॒ सोऽख्ष॑रः पर॒मः स्व॒राट्॥ १२ ऋ॒तꣳ स॒त्यं प॑रं ब्र॒ह्म॒ पु॒रुषं॑ कृष्ण॒ पिङ्ग॑लं। ऊ॒र्द्ध्वरे॑तव्ँवि॑रूपा॒ख्ष॒व्ँवि॒श्वरू॑पाय॒ वै नमो॒ नमः॑॥ ना॒रा॒य॒णाय॑ वि॒द्महे॑ वासुदे॒वाय॑ धीमहि। तन्नो॑ विष्णुः प्रचो॒दया᳚त्॥ विष्णो॒र्नुक॑व्ँवी॒र्या॑णि॒ प्रवो॑च॒य्ँयः पार्त्थि॑वानि विम॒मे रजा॑ꣳसि॒ यो अस्क॑भाय॒दुत्त॑रꣳ स॒धस्थ॑व्ँविचक्रमा॒ण स्त्रे॒धोरु॑गा॒यो विष्णो॑र॒राट॑मसि॒ विष्णोः᳚ पृ॒ष्ठम॑सि॒ विष्णोः॒ श्ञप्त्रे᳚स्थो॒ विष्णो॒स्स्यूर॑सि॒ विष्णो᳚र् ध्रु॒वम॑सि वैष्ण॒वम॑सि॒ विष्ण॑वे त्वा॥ विष्णवे नारायणाय नमः॥
॥ ओं शान्तिः शान्तिः शान्तिः॑ ॥