Oshadhi Suktam with Svara — ओषधिसूक्तम् (Taittiriya)

तै.सं.४.२.६.१

या जा॒ता ओष॑धयो दे॒वेभ्य॑ स्त्रियु॒गं पु॒रा⁠। मन्दा॑मि ब॒भ्रूणा॑म॒हꣳ श॒तं धामा॑नि स॒प्त च॑⁠। श॒तव्ँवो॑ अंब॒ धामा॑नि स॒हस्र॑मु॒तवो॒ रुहः॑⁠। अथा॑ शतक्रत्वो यू॒यमि॒मं मे॑ अग॒दं कृ॑त⁠। पुष्पा॑वतीः प्र॒सूव॑तीः फ॒लिनी॑रफ॒ला उ॒त⁠। अश्वा॑ इव स॒जित्व॑रीर्वी॒रुधः॑ पारयि॒ष्णवः॑⁠। ओष॑धी॒रिति॑ मातर॒स्तद्वो॑ देवी॒रुप॑ब्रुवे⁠। रपा॑ꣳसि विघ्न॒तीरि॑त॒ रप॑श्चा॒तय॑मानाः⁠॥ १ अ॒श्व॒त्थे वो॑ नि॒षद॑नं प॒र्णे वो॑ वस॒तिः कृ॒ता⁠। गो॒भाज॒ इत् किला॑ऽसथ॒ यथ् स॒नव॑थ॒ पूरु॑षं⁠। यद॒हव्ँवा॒जय॑न्नि॒मा ओष॑धी॒र्॒‌हस्त॑ आद॒धे⁠। आ॒त्मा यख्‍ष्म॑स्य नश्यति पु॒रा जी॑व॒गृभो॑ यथा⁠। यदोष॑धय स्सं॒गच्छ॑न्ते॒ राजा॑न॒ स्समि॑ताविव⁠। विप्र॒ स्स उ॑च्यते भि॒षग्र॑ख्‍षो॒हा ऽमी॑व॒चात॑नः⁠। निष्कृ॑ति॒र् नाम॑ वो मा॒ताऽथा॑ यू॒यꣴ स्थ॒ संकृ॑तीः⁠। स॒राः प॑त॒त्रिणीः᳚ स्थन॒यदा॒मय॑ति॒ नि ष्कृ॑त⁠॥ २ अ॒न्यावो॑ अ॒न्याम॑वत्व॒न्याऽन्यस्या॒ उपा॑वत⁠। तास्सर्वा॒ ओष॑धयस्सव्ँविदा॒ना इ॒दं मे॒ प्राव॑ता॒ वचः॑⁠। उच्छुष्मा॒ ओष॑धीनां॒ गावो॑ गो॒ष्ठादि॑वेरते⁠। धन॑ꣳ सनि॒ष्यन्ती॑नामा॒त्मानं॒ तव॑ पूरुष⁠। अति॒ विश्वाः᳚ परि॒ष्ठाः स्ते॒न इ॑व व्र॒जम॑क्रमुः⁠। ओष॑धयः॒ प्राचु॑च्यवु॒र् यत् किञ्च॑ त॒नुवा॒ꣳ॒ रपः॑⁠। यास्त॑ आत॒स्थुरा॒त्मान॒य्ँया आ॑विवि॒शुः परुः॑परुः⁠। तास्ते॒ यख्‍ष्म॒व्ँवि बा॑धन्तामु॒ग्रो म॑द्ध्यम॒शीरि॑व⁠॥ ३ सा॒कय्ँय॑ख्‍ष्म॒ प्र प॑त श्ये॒नेन॑ किकिदी॒विना᳚⁠। सा॒कव्ँवात॑स्य॒ ध्राज्या॑ सा॒कन्न॑श्य नि॒हाक॑या⁠। अ॒श्वा॒व॒तीꣳ सो॑मव॒तीमू॒र्जय॑न्ती॒ मुदो॑जसं⁠। आ वि॑थ्सि॒ सर्वा॒ ओष॑धीर॒स्मा अ॑रि॒ष्ट ता॑तये⁠। याः फ॒लिनी॒र् या अ॑फ॒ला अ॑पु॒ष्पायाश्च॑ पु॒ष्पिणीः᳚⁠। बृह॒स्पति॑प्रसूता॒ स्तानो॑ मुञ्च॒न्त्वꣳह॑सः⁠। या ओष॑धय॒ स्सोम॑राज्ञीः॒ प्रवि॑ष्टाः पृथि॒वीमनु॑⁠॥ ४ तासां॒ त्वम॑स्युत्त॒मा प्र णो॑ जी॒वात॑वे सुव⁠। अ॒व॒पत॑न्तीरवदन् दि॒व ओष॑धयः॒ परि॑⁠। यं जी॒वम॒श्ञवा॑महै॒ न स रि॑ष्याति॒ पूरु॑षः⁠। याश्चे॒दमु॑पशृ॒ण्वन्ति॒ याश्च॑ दू॒रं परा॑गताः⁠। इ॒ह सं॒गत्य॒ ता स्सर्वा॑ अ॒स्मै सं द॑त्त भेष॒जं⁠। मा वो॑ रिषत् खनि॒ता यस्मै॑ चा॒ऽहं खना॑मि वः⁠। द्वि॒पच्चतु॑ष्पद॒स्माक॒ꣳ॒ सर्व॑म॒स्त्वना॑तुरं⁠। ओष॑धयः॒ सव्ँव॑दन्ते॒ सोमे॑न स॒ह राज्ञा᳚⁠। यस्मै॑ क॒रोति॑ ब्राह्म॒णस्तꣳ रा॑जन् पारयामसि⁠॥

॥ ओं शान्ति॒: शान्ति॒: शान्ति॑: ॥

Sections	१
Mantras	१
Version	5.0