Taittiriya Samhita 4.2 — Devayajanagrahabhidhanam · तैत्तिरीयसंहिता ४.२ with svara

विष्णोः॒ क्रमो᳚ऽस्यभिमाति॒हा गा॑य॒त्रञ्छन्द॒ आ रो॑ह पृथि॒वीमनु॒ वि क्र॑मस्व॒ निर्भ॑क्तः॒ स यन्द्वि॒ष्मो विष्णोः॒ क्रमो᳚ऽस्यभिशस्ति॒हा त्रैष्टु॑भ॒ञ्छन्द॒ आ रो॑हा॒न्तरि॑ख्‍ष॒मनु॒ वि क्र॑मस्व॒ निर्भ॑क्तः॒ स यं द्वि॒ष्मो विष्णोः॒ क्रमो᳚ऽस्यरातीय॒तो ह॒न्ता जाग॑त॒ञ्छन्द॒ आ रो॑ह॒ दिव॒मनु॒ वि क्र॑मस्व॒ निर्भ॑क्तः॒ स यं द्वि॒ष्मो विष्णोः॒ [१೧౧௧१] क्रमो॑ऽसि शत्रूय॒तो ह॒न्ताऽऽनु॑ष्टुभ॒ञ्छन्द॒ आ रो॑ह॒ दिशोऽनु॒ वि क्र॑मस्व॒ निर्भ॑क्तः॒ स यन्द्वि॒ष्मः⁠॥ अक्र॑न्दद॒ग्निः स्त॒नय॑न्निव॒ द्यौः ख्‍षामा॒ रेरि॑हद्वी॒रुधः॑ सम॒ञ्जन्न्⁠। स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्य॒न्तः⁠॥ अग्ने᳚ऽभ्यावर्तिन्न॒भि न॒ आ व॑र्त॒स्वाऽऽयु॑षा॒ वर्च॑सा स॒न्या मे॒धया᳚ प्र॒जया॒ धने॑न⁠॥ अग्ने॑ [२೨౨௨२] अङ्गिरः श॒तन्ते॑ सन्त्वा॒वृतः॑ स॒हस्र॑न्त उपा॒वृतः॑⁠। तासा॒म्पोष॑स्य॒ पोषे॑ण॒ पुन॑र् नो न॒ष्टमा कृ॑धि॒ पुन॑र् नो र॒यिमा कृ॑धि⁠॥ पुन॑रू॒र्जा नि व॑र्तस्व॒ पुन॑रग्न इ॒षाऽऽयु॑षा⁠। पुन॑र् नः पाहि वि॒श्वतः॑⁠॥ स॒ह र॒य्या नि व॑र्त॒स्वाग्ने॒ पिन्व॑स्व॒ धार॑या⁠। वि॒श्वफ्स्नि॑या वि॒श्वत॒स्परि॑⁠॥ उदु॑त्त॒मव्ँव॑रुण॒ पाश॑म॒स्मदवा॑ध॒म [३೩౩௩३] व्ँवि म॑द्ध्य॒मꣴ श्र॑थाय⁠। अथा॑ व॒यमा॑दित्य व्र॒ते तवाना॑गसो॒ अदि॑तये स्याम⁠॥ आ त्वा॑ऽ हार्‌षम॒न्तर॑भूर् ध्रु॒वस्ति॒ष्ठाऽवि॑चाचलिः⁠। विश॑स्त्वा॒ सर्वा॑ वाञ्छन्त्व॒स्मिन् रा॒ष्ट्रमधि॑ श्रय⁠॥ अग्रे॑ बृ॒हन्नु॒षसा॑मू॒र्द्ध्वो अ॑स्थान्निर्जग्मि॒वान्तम॑सो॒ ज्योति॒षाऽऽ*गा᳚त्⁠। अ॒ग्निर् भा॒नुना॒ रुश॑ता॒ स्वङ्ग॒ आ जा॒तो विश्वा॒ सद्मा᳚न्यप्राः⁠॥ सीद॒ त्वम्मा॒तुर॒स्या [४೪౪௪४] उ॒पस्थे॒ विश्वा᳚न्यग्ने व॒युना॑नि वि॒द्वान्⁠। मैना॑म॒र्चिषा॒ मा तप॑सा॒ऽभि शू॑शुचो॒ऽन्तर॑स्याꣳ शु॒क्रज्यो॑ति॒र् वि भा॑हि⁠॥ अ॒न्तर॑ग्ने रु॒चा त्वमु॒खायै॒ सद॑ने॒ स्वे⁠। तस्या॒स्त्वꣳ हर॑सा॒ तप॒ञ्जात॑वेदः शि॒वो भ॑व⁠॥ शि॒वो भू॒त्वा मह्य॑म॒ग्नेऽथो॑ सीद शि॒वस्त्वम्⁠। शि॒वाः कृ॒त्वा दिशः॒ सर्वाः॒ स्वाय्ँयोनि॑मि॒हाऽऽस॑दः⁠॥ ह॒ꣳ॒सः शु॑चि॒षद् वसु॑रन्तरिख्‍ष॒सद्धोता॑ वेदि॒षदति॑थिर् दुरोण॒सत्⁠। नृ॒षद्व॑र॒सद् ऋ॑त॒सद् व्यो॑म॒सद॒ब्जा गो॒जा ऋ॑त॒जा अ॑द्रि॒जा ऋ॒तम्बृ॒हत्⁠ [५೫౫௫५] (दिव॒मनु॒ वि क्र॑मस्व॒ निर्भ॑क्तः॒ स यन्द्वि॒ष्मो विष्णो॒र् द्धने॒नाग्ने॑ ऽध॒म म॒स्याः शु॑चि॒षथ् षोड॑श च) ॥१॥

दि॒वस्परि॑ प्रथ॒मञ्ज॑ज्ञे अ॒ग्निर॒स्मद् द्वि॒तीय॒म्परि॑ जा॒तवे॑दाः⁠। तृ॒तीय॑म॒फ्सु नृ॒मणा॒ अज॑स्र॒मिन्धा॑न एनञ्जरते स्वा॒धीः⁠॥ वि॒द्मा ते॑ अग्ने त्रे॒धा त्र॒याणि॑ वि॒द्मा ते॒ सद्म॒ विभृ॑तम्पुरु॒त्रा⁠। वि॒द्मा ते॒ नाम॑ पर॒मङ्गुहा॒ यद्वि॒द्मा तमुथ्स॒य्ँयत॑ आज॒गन्थ॑⁠॥ स॒मु॒द्रे त्वा॑ नृ॒मणा॑ अ॒फ्स्व॑न्तर् नृ॒चख्‍षा॑ ईधे दि॒वो अ॑ग्न॒ ऊध॑न्⁠। तृ॒तीये᳚ त्वा॒ [६೬౬௬६] रज॑सि तस्थि॒वाꣳस॑मृ॒तस्य॒ योनौ॑ महि॒षा अ॑हिन्वन्न्⁠॥ अक्र॑न्दद॒ग्निः स्त॒नय॑न्निव॒ द्यौः ख्‍षामा॒ रेरि॑हद्वी॒रुधः॑ सम॒ञ्जन्न्⁠। स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्य॒न्तः⁠॥ उ॒शिक् पा॑व॒को अ॑र॒तिः सु॑मे॒धा मर्ते᳚ष्व॒ग्निर॒मृतो॒ नि धा॑यि⁠। इय॑र्ति धू॒मम॑रु॒षम्भरि॑भ्र॒दुच्छु॒क्रेण॑ शो॒चिषा॒ द्यामिन॑ख्‍षत्⁠॥ विश्व॑स्य के॒तुर् भुव॑नस्य॒ गर्भ॒ आ [७೭౭௭७] रोद॑सी अपृणा॒ज्जाय॑मानः⁠। वी॒डुञ्चि॒दद्रि॑मभिनत् परा॒यन् जना॒ यद॒ग्निमय॑जन्त॒ पञ्च॑⁠॥ श्री॒णामु॑दा॒रो ध॒रुणो॑ रयी॒णाम्म॑नी॒षाणा॒म्प्रार्प॑णः॒ सोम॑गोपाः⁠। वसोः᳚ सू॒नुः सह॑सो अ॒फ्सु राजा॒ वि भा॒त्यग्र॑ उ॒षसा॑मिधा॒नः⁠॥ यस्ते॑ अ॒द्य कृ॒णव॑द्भद्रशोचेऽपू॒पन्दे॑व घृ॒तव॑न्तमग्ने⁠। प्र तन्न॑य प्रत॒राव्ँवस्यो॒ अच्छा॒भि द्यु॒म्नन्दे॒वभ॑क्तय्ँयविष्ठ⁠॥ आ [८೮౮௮८] तम्भ॑ज सौश्रव॒सेष्व॑ग्न उ॒क्थौ॑क्थ॒ आ भ॑ज श॒स्यमा॑ने⁠। प्रि॒यः सूर्ये᳚ प्रि॒यो अ॒ग्ना भ॑वा॒त्युज्जा॒तेन॑ भि॒नद॒दुज्जनि॑त्वैः⁠॥ त्वाम॑ग्ने॒ यज॑माना॒ अनु॒ द्यून्‌विश्वा॒ वसू॑नि दधिरे॒ वार्या॑णि⁠। त्वया॑ स॒ह द्रवि॑णमि॒च्छमा॑ना व्र॒जङ्गोम॑न्तमु॒शिजो॒ वि व॑व्रुः⁠॥ दृ॒शा॒नो रु॒क्म उ॒र्व्या व्य॑द्यौद्दु॒र्मर्‌ष॒मायुः॑ श्रि॒ये रु॑चा॒नः⁠। अ॒ग्निर॒मृतो॑ अभव॒द्वयो॑भि॒र् यदे॑ न॒न्द्यौरज॑नयथ् सु॒रेताः᳚⁠ [९೯౯௯९] (तृतिये᳚ त्वा॒ गर्भ॒ आ य॑वि॒ष्ठाऽऽ य च्च॒त्वारि॑ च) ॥२॥

अन्न॑प॒तेऽन्न॑स्य नो देह्यनमी॒वस्य॑ शु॒ष्मिणः॑⁠। प्र प्र॑दा॒तार॑न्तारिष॒ ऊर्ज॑न्नो धेहि द्वि॒पदे॒ चतु॑ष्पदे⁠॥ उदु॑ त्वा॒ विश्वे॑ दे॒वा अग्ने॒ भर॑न्तु॒ चित्ति॑भिः⁠। स नो॑ भव शि॒वत॑मः सु॒प्रती॑को वि॒भाव॑सुः⁠॥ प्रेद॑ग्ने॒ ज्योति॑ष्मान्‌याहि शि॒वेभि॑र॒र्चिभि॒स्त्वम्⁠। बृ॒हद्भि॑र्भा॒नुभि॒र्भास॒न् मा हि॑ꣳसी स्त॒नुवा᳚ प्र॒जाः⁠॥ स॒मिधा॒ऽग्निन्दु॑वस्यत घृ॒तैर् बो॑धय॒ताति॑थिम्⁠। आ [१०೧೦౧౦௧௦१०] ऽस्मि॑न्‌ह॒व्या जु॑होतन⁠॥ प्र प्रा॒यम॒ग्निर् भ॑र॒तस्य॑ शृण्वे॒ वि यथ् सूर्यो॒ न रोच॑ते बृ॒हद् भाः⁠। अ॒भि यः पू॒रुम्पृत॑नासु त॒स्थौ दी॒दाय॒ दैव्यो॒ अति॑थिः शि॒वो नः॑⁠॥ आपो॑ देवीः॒ प्रति॑ गृह्णीत॒ भस्मै॒तथ् स्यो॒ने कृ॑णुद्ध्वꣳ सुर॒भावु॑ लो॒के⁠। तस्मै॑ नमन्ता॒ञ्जन॑यः सु॒पत्नी᳚र् मा॒तेव॑ पु॒त्रम्बि॑भृ॒ता स्वे॑नम्⁠॥ अ॒फ्स्व॑ग्ने॒ सधि॒ष्टव॒ [११೧೧౧౧௧௧११] सौष॑धी॒रनु॑ रुद्ध्यसे⁠। गर्भे॒ सञ्जा॑यसे॒ पुनः॑⁠॥ गर्भो॑ अ॒स्योष॑धीना॒ङ्गर्भो॒ वन॒स्पती॑नाम्⁠। गर्भो॒ विश्व॑स्य भू॒तस्याग्ने॒ गर्भो॑ अ॒पाम॑सि⁠॥ प्र॒सद्य॒ भस्म॑ना॒ योनि॑म॒पश्च॑ पृथि॒वीम॑ग्ने⁠। स॒ꣳ॒सृज्य॑ मा॒तृभि॒स्त्वञ्ज्योति॑ष्मा॒न् पुन॒राऽस॑दः⁠॥ पुन॑रा॒सद्य॒ सद॑नम॒पश्च॑ पृथि॒वीम॑ग्ने⁠। शेषे॑ मा॒तुर् यथो॒पस्थे॒ऽन्तर॒स्याꣳ शि॒वत॑मः⁠॥ पुन॑रू॒र्जा [१२೧೨౧౨௧௨१२] नि व॑र्तस्व॒ पुन॑रग्न इ॒षाऽऽयु॑षा⁠। पुन॑र् नः पाहि वि॒श्वतः॑⁠॥ स॒ह र॒य्या नि व॑र्त॒स्वाग्ने॒ पिन्व॑स्व॒ धार॑या⁠। वि॒श्वफ्स्नि॑या वि॒श्वत॒स्परि॑⁠॥ पुन॑स्त्वाऽऽदि॒त्या रु॒द्रा वस॑वः॒ समि॑न्धतां॒ पुन॑र् ब्र॒ह्माणो॑ वसुनीथ य॒ज्ञैः⁠। घृ॒तेन॒ त्वन्त॒नुवो॑ वर्द्धयस्व स॒त्याः स॑न्तु॒ यज॑मानस्य॒ कामाः᳚⁠॥ बोधा॑ नो अ॒स्य वच॑सो यविष्ठ॒ मꣳहि॑ष्ठस्य॒ प्रभृ॑तस्य स्वधावः⁠। पीय॑ति त्वो॒ अनु॑ त्वो गृणाति व॒न्दारु॑स्ते त॒नुव॑व्ँवन्दे अग्ने⁠॥ स बो॑धि सू॒रिर् म॒घवा॑ वसु॒दावा॒ वसु॑पतिः⁠। यु॒यो॒द्ध्य॑स्मद् द्वेषा॑ꣳसि⁠ [१३೧೩౧౩௧௩१३] (आ तवो॒र् जा ऽनु॒ षोड॑श च) ॥३॥

अपे॑त॒ वीत॒ वि च॑ सर्प॒तातो॒ येऽत्र॒ स्थ पु॑रा॒णा ये च॒ नूत॑नाः⁠। अदा॑दि॒दय्ँय॒मो॑ऽव॒सान॑म्पृथि॒व्या अक्र॑न्नि॒मम्पि॒तरो॑ लो॒कम॑स्मै⁠॥ अ॒ग्नेर् भस्मा᳚स्य॒ग्नेः पुरी॑षमसि सं॒ज्ञान॑मसि काम॒धर॑ण॒म्मयि॑ ते काम॒धर॑णम्भूयात्⁠॥ सय्ँया वः॑ प्रि॒यास्त॒नुवः॒ सम्प्रि॒या हृद॑यानि वः⁠। आ॒त्मा वो॑ अस्तु॒ [१४೧೪౧౪௧௪१४] संप्रि॑यः॒ संप्रि॑यास्त॒नुवो॒ मम॑⁠॥ अ॒यꣳ सो अ॒ग्निर् यस्मि॒न्थ्सोम॒मिन्द्रः॑ सु॒तन्द॒धे ज॒ठरे॑ वावशा॒नः⁠। स॒ह॒स्रिय॒व्ँवाज॒मत्य॒न्न सप्ति॑ꣳ सस॒वान्थ् सन्थ् स्तू॑यसे जातवेदः⁠॥ अग्ने॑ दि॒वो अर्ण॒मच्छा॑ जिगा॒स्यच्छा॑ दे॒वाꣳ ऊ॑चिषे॒ धिष्णि॑या॒ ये⁠। याः प॒रस्ता᳚द्रोच॒ने सूर्य॑स्य॒ याश्चा॒ वस्ता॑दुप॒तिष्ठ॑न्त॒ आपः॑⁠॥ अग्ने॒ यत् ते॑ दि॒वि वर्चः॑ पृथि॒व्याय्ँयदोष॑धीष्व॒ [१५೧೫౧౫௧௫१५] ऽफ्सु वा॑ यजत्र⁠। येना॒न्तरि॑ख्‍षमु॒र्वा॑त॒तन्थ॑ त्वे॒षः स भा॒नुर॑र्ण॒वो नृ॒चख्‍षाः᳚⁠॥ पु॒री॒ष्या॑सो अ॒ग्नयः॑ प्राव॒णेभिः॑ स॒जोष॑सः⁠। जु॒षन्ता॑ꣳ ह॒व्यमाहु॑तमनमी॒वा इषो॑ म॒हीः⁠॥ इडा॑मग्ने पुरु॒दꣳस॑ꣳ स॒निङ्गोः श॑श्वत्त॒मꣳ हव॑मानाय साध⁠। स्यान्नः॑ सू॒नुस्तन॑यो वि॒जावाऽग्ने॒ सा ते॑ सुम॒तिर् भू᳚त्व॒स्मे⁠॥ अ॒यन्ते॒ योनि॑र्‌ऋ॒त्वियो॒ यतो॑ जा॒तो अरो॑चथाः⁠। तञ्जा॒न [१६೧೬౧౬௧௬१६] न्न॑ग्न॒ आ रो॒हाथा॑ नो वर्द्धया र॒यिम्⁠॥ चिद॑सि॒ तया॑ दे॒वत॑याऽङ्गिर॒स्वद् ध्रु॒वा सी॑द परि॒चिद॑सि॒ तया॑ दे॒वत॑याऽङ्गिर॒स्वद् ध्रु॒वा सी॑द लो॒कम्पृ॑ण छि॒द्रम्पृ॒णाथो॑ सीद शि॒वा त्वम्⁠। इ॒न्द्रा॒ग्नी त्वा॒ बृह॒स्पति॑र॒स्मिन् योना॑वसीषदन्न्⁠॥ ता अ॑स्य॒ सूद॑दोहसः॒ सोम॑ꣴ श्रीणन्ति॒ पृश्ञ॑यः⁠। जन्म॑न् दे॒वाना॒व्ँविश॑स्त्रि॒ष्वा रो॑च॒ने दि॒वः⁠ [१७೧೭౧౭௧௭१७] (अ॒स्त्वोष॑धीषु जा॒न न्न॒ष्टाच॑त्वारिꣳशच्च) ॥४॥

समि॑त॒ꣳ॒ सङ्क॑ल्पेथा॒ꣳ॒ संप्रि॑यौ रोचि॒ष्णू सु॑मन॒स्यमा॑नौ⁠। इष॒मूर्ज॑म॒भि स॒व्ँवसा॑नौ॒ सव्ँवा॒म्मना॑ꣳसि॒ सव्ँव्र॒ता समु॑ चि॒त्तान्याऽक॑रम्⁠॥ अग्ने॑ पुरीष्याधि॒पा भ॑वा॒ त्वन्नः॑⁠। इष॒मूर्ज॒य्ँयज॑मानाय धेहि⁠॥ पु॒री॒ष्य॑स्त्वम॑ग्ने रयि॒मान् पु॑ष्टि॒माꣳ अ॑सि⁠। शि॒वाः कृ॒त्वा दिशः॒ सर्वाः॒ स्वाय्ँयोनि॑मि॒हाऽस॑दः⁠॥ भव॑तन्नः॒ सम॑नसौ॒ समो॑कसा [१८೧೮౧౮௧௮१८] वरे॒पसौ᳚⁠। मा य॒ज्ञꣳ हि॑ꣳसिष्ट॒म्मा य॒ज्ञप॑तिञ्जातवेदसौ शि॒वौ भ॑वतम॒द्य नः॑⁠॥ मा॒तेव॑ पु॒त्रम्पृ॑थि॒वी पु॑री॒ष्य॑म॒ग्निꣴ स्वे योना॑वभारु॒खा⁠। ताव्ँविश्वै᳚र् दे॒वैर्‌ऋ॒तुभिः॑ सव्ँविदा॒नः प्र॒जाप॑तिर् वि॒श्वक॑र्मा॒ वि मु॑ञ्चतु⁠॥ यद॒स्य पा॒रे रज॑सः शु॒क्रञ्ज्योति॒रजा॑यत⁠। तन्नः॑ पर्‌ष॒दति॒ द्विषोऽग्ने॑ वैश्वानर॒ स्वाहा᳚⁠॥ नमः॒ सु ते॑ निर्‌ऋते विश्वरूपे [१९೧೯౧౯௧௯१९] ऽय॒स्मय॒व्ँवि चृ॑ता ब॒न्धमे॒तम्⁠। य॒मेन॒ त्वय्ँय॒म्या॑ सव्ँविदा॒नोत्त॒मन्नाक॒मधि॑ रोहये॒मम्⁠॥ यत्ते॑ दे॒वी निर्‌ऋ॑तिराब॒बन्ध॒ दाम॑ ग्री॒वास्व॑ विच॒र्त्यम्⁠। इ॒दन्ते॒ तद् विष्या॒म्यायु॑षो॒ न मद्ध्या॒दथा॑ जी॒वः पि॒तुम॑द्धि॒ प्रमु॑क्तः⁠॥ यस्या᳚स्ते अ॒स्याः क्रू॒र आ॒सन् जु॒होम्ये॒षाम्ब॒न्धाना॑मव॒सर्ज॑नाय⁠। भूमि॒रिति॑ त्वा॒ जना॑ वि॒दुर् निर्‌ऋ॑ति॒ [२०೨೦౨౦௨௦२०] रिति॑ त्वा॒ऽहम्परि॑ वेद वि॒श्वतः॑⁠॥ असु॑न्वन्त॒मय॑जमानमिच्छ स्ते॒नस्ये॒त्यान्तस्क॑र॒स्यान्वे॑षि⁠। अ॒न्यम॒स्मदि॑च्छ॒ सा त॑ इ॒त्या नमो॑ देवि निर्‌ऋते॒ तुभ्य॑मस्तु⁠॥ दे॒वीम॒हन्निर्‌ऋ॑ति॒व्ँवन्द॑मानः पि॒तेव॑ पु॒त्रन्द॑सये॒ वचो॑भिः⁠। विश्व॑स्य॒ या जाय॑मानस्य॒ वेद॒ शिरः॑शिरः॒ प्रति॑ सू॒री वि च॑ष्टे⁠॥ नि॒वेश॑नः स॒ङ्गम॑नो॒ वसू॑ना॒व्ँविश्वा॑ रू॒पाऽभि च॑ष्टे॒ [२१೨೧౨౧௨௧२१] शची॑भिः⁠। दे॒व इ॑व सवि॒ता स॒त्यध॒र्मेन्द्रो॒ न त॑स्थौ सम॒रे प॑थी॒नाम्⁠॥ सव्ँव॑र॒त्रा द॑धातन॒ निरा॑हा॒वान् कृ॑णोतन⁠। सि॒ञ्चाम॑हा अव॒टमु॒द्रिण॑व्ँव॒यव्ँविश्वाऽहाऽद॑स्त॒मख्‍षि॑तम्⁠॥ निष्कृ॑ताहावमव॒टꣳ सु॑वर॒त्रꣳ सु॑षेच॒नम्⁠। उ॒द्रिण॑ꣳ सिञ्चे॒ अख्‍षि॑तम्⁠॥ सीरा॑ युञ्जन्ति क॒वयो॑ यु॒गा वि त॑न्वते॒ पृथ॑क्⁠। धीरा॑ दे॒वेषु॑ सुम्न॒या⁠॥ यु॒नक्त॒ सीरा॒ वि यु॒गा त॑नोत कृ॒ते योनौ॑ वपते॒ह [२२೨೨౨౨௨௨२२] बीज᳚म्⁠। गि॒रा च॑ श्रु॒ष्टिः सभ॑रा॒ अस॑न्नो॒ नेदी॑य॒ इथ् सृ॒ण्या॑ प॒क्वमाऽय॑त्⁠॥ लाङ्ग॑ल॒म्पवी॑रवꣳ सु॒शेव॑ꣳ सुम॒तिथ्स॑रु⁠। उदित् कृ॑षति॒ गामवि॑म्प्रफ॒र्व्य॑ञ्च॒ पीव॑रीम्⁠। प्र॒स्थाव॑द्रथ॒वाह॑नम्⁠॥ शु॒नन्नः॒ फाला॒ वि तु॑दन्तु॒ भूमि॑ꣳ शु॒नङ्की॒नाशा॑ अ॒भि य॑न्तु वा॒हान्⁠। शु॒नम्प॒र्जन्यो॒ मधु॑ना॒ पयो॑भिः॒ शुना॑सीरा शु॒नम॒स्मासु॑ धत्तम्⁠॥ काम॑ङ्कामदुघे धुख्‍ष्व मि॒त्राय॒ वरु॑णाय च⁠। इन्द्रा॑या॒ग्नये॑ पू॒ष्ण ओष॑धीभ्यः प्र॒जाभ्यः॑⁠॥ घृ॒तेन॒ सीता॒ मधु॑ना॒ सम॑क्ता॒ विश्वै᳚र् दे॒वैरनु॑मता म॒रुद्भिः॑⁠। ऊर्ज॑स्वती॒ पय॑सा॒ पिन्व॑माना॒ऽस्मान्थ् सी॑ते॒ पय॑सा॒ऽ भ्याव॑वृथ्स्व⁠ [२३೨೩౨౩௨௩२३] (समो॑कसौ विश्वरूपे वि॒दुर् निर्‌ऋ॑ति र॒भि च॑ष्ट इ॒ह मि॒त्राय॒ द्वावि॑ꣳशतिश्च) ॥५॥

या जा॒ता ओष॑धयो दे॒वेभ्य॑स्त्रियु॒गम्पु॒रा⁠। मन्दा॑मि ब॒भ्रूणा॑म॒हꣳ श॒तन्धामा॑नि स॒प्त च॑⁠॥ श॒तव्ँवो॑ अंब॒ धामा॑नि स॒हस्र॑मु॒त वो॒ रुहः॑⁠। अथा॑ शतक्रत्वो यू॒यमि॒मम्मे॑ अग॒दङ्कृ॑त⁠॥ पुष्पा॑वतीः प्र॒सूव॑तीः फ॒लिनी॑रफ॒ला उ॒त⁠। अश्वा॑ इव स॒जित्व॑रीर् वी॒रुधः॑ पारयि॒ष्णवः॑⁠॥ ओष॑धी॒रिति॑ मातर॒स्तद् वो॑ देवी॒रुप॑ ब्रुवे⁠। रपा॑ꣳसि विघ्न॒तीरि॑त॒ रप॑ [२४೨೪౨౪௨௪२४] श्चा॒तय॑मानाः⁠॥ अ॒श्व॒त्थे वो॑ नि॒षद॑नम्प॒र्णे वो॑ वस॒तिः कृ॒ता⁠। गो॒भाज॒ इत् किला॑सथ॒ यथ् स॒नव॑थ॒ पूरु॑षम्⁠॥ यद॒हव्ँवा॒जय॑न्नि॒मा ओष॑धी॒र्॒‌हस्त॑ आद॒धे⁠। आ॒त्मा यख्‍ष्म॑स्य नश्यति पु॒रा जी॑व॒गृभो॑ यथा⁠॥ यदोष॑धयः सं॒गच्छ॑न्ते॒ राजा॑नः॒ समि॑ताविव⁠। विप्रः॒ स उ॑च्यते भि॒षग्र॑ख्‍षो॒हाऽमी॑व॒चात॑नः⁠॥ निष्कृ॑ति॒र् नाम॑ वो मा॒ताऽथा॑ यू॒यꣴ स्थ॒ संकृ॑तीः⁠। स॒राः प॑त॒त्रिणीः᳚ [२५೨೫౨౫௨௫२५] स्थन॒ यदा॒मय॑ति॒ नि ष्कृ॑त⁠॥ अ॒न्या वो॑ अ॒न्याम॑वत्व॒न्याऽन्यस्या॒ उपा॑वत⁠। ताः सर्वा॒ ओष॑धयः सव्ँविदा॒ना इ॒दम्मे॒ प्राव॑ता॒ वचः॑⁠॥ उच्छुष्मा॒ ओष॑धीना॒ङ्गावो॑ गो॒ष्ठादि॑वेरते⁠। धन॑ꣳ सनि॒ष्यन्ती॑नामा॒त्मान॒न्तव॑ पूरुष⁠॥ अति॒ विश्वाः᳚ परि॒ष्ठाः स्ते॒न इ॑व व्र॒जम॑क्रमुः⁠। ओष॑धयः॒ प्राचु॑च्यवु॒र् यत् किञ्च॑ त॒नुवा॒ꣳ॒ रपः॑⁠॥ या [२६೨೬౨౬௨௬२६] स्त॑ आत॒स्थुरा॒त्मान॒य्ँया आ॑विवि॒शुः परुः॑परुः⁠। तास्ते॒ यख्‍ष्म॒व्ँवि बा॑धन्तामु॒ग्रो म॑द्ध्यम॒शीरि॑व⁠॥ सा॒कय्ँय॑ख्‍ष्म॒ प्र प॑त श्ये॒नेन॑ किकिदी॒विना᳚⁠। सा॒कव्ँवात॑स्य॒ ध्राज्या॑ सा॒कन्न॑श्य नि॒हाक॑या⁠॥ अ॒श्वा॒व॒तीꣳ सो॑मव॒तीमू॒र्जय॑न्ती॒मुदो॑जसम्⁠। आ वि॑थ्सि॒ सर्वा॒ ओष॑धीर॒स्मा अ॑रि॒ष्टता॑तये⁠॥ याः फ॒लिनी॒र् या अ॑फ॒ला अ॑पु॒ष्पा याश्च॑ पु॒ष्पिणीः᳚⁠। बृह॒स्पति॑प्रसूता॒ स्तानो॑ मुञ्च॒न्त्वꣳ ह॑सः⁠॥ या [२७೨೭౨౭௨௭२७] ओष॑धयः॒ सोम॑राज्ञीः॒ प्रवि॑ष्टाः पृथि॒वीमनु॑⁠। तासा॒न्त्वम॑स्युत्त॒मा प्र णो॑ जी॒वात॑वे सुव⁠॥ अ॒व॒पत॑न्तीरवदन् दि॒व ओष॑दयः॒ परि॑⁠। यञ्जी॒वम॒श्ञवा॑महै॒ न स रि॑ष्याति॒ पूरु॑षः⁠॥ याश्चे॒दमु॑पशृ॒ण्वन्ति॒ याश्च॑ दू॒रम्परा॑गताः⁠। इ॒ह स॒ङ्गत्य॒ ताः सर्वा॑ अ॒स्मै सन्द॑त्त भेष॒जम्⁠॥ मा वो॑ रिषत् खनि॒ता यस्मै॑ चा॒हङ्खना॑मि वः⁠। द्वि॒पच्चतु॑ष्पद॒स्माक॒ꣳ॒ सर्व॑म॒स्त्वना॑तुरम्⁠॥ ओष॑धयः॒ सव्ँव॑दन्ते॒ सोमे॑न स॒ह राज्ञा᳚⁠। यस्मै॑ क॒रोति॑ ब्राह्म॒णस्तꣳ रा॑जन् पारयामसि⁠ [२८೨೮౨౮௨௮२८] (रपः॑ पत॒त्रिणी॒र् या अꣳह॑सो॒ याः खना॑मि वो॒ ऽष्टाद॑श च) ॥६॥

मा नो॑ हिꣳसीज्जनि॒ता यः पृ॑थि॒व्या यो वा॒ दिव॑ꣳ स॒त्यध॑र्मा ज॒जान॑⁠। यश्चा॒पश्च॒न्द्रा बृ॑ह॒तीर्ज॒जान॒ कस्मै॑ दे॒वाय॑ ह॒विषा॑ विधेम⁠॥ अ॒भ्याव॑र्तस्व पृथिवि य॒ज्ञेन॒ पय॑सा स॒ह⁠। व॒पान्ते॑ अ॒ग्निरि॑षि॒तोऽव॑ सर्पतु⁠॥ अग्ने॒ यत् ते॑ शु॒क्रय्ँयच्च॒न्द्रय्ँयत् पू॒तय्ँयद्य॒ज्ञिय᳚म्⁠। तद्दे॒वेभ्यो॑ भरामसि⁠॥ इष॒मूर्ज॑म॒हमि॒त आ [२९೨೯౨౯௨௯२९] द॑द ऋ॒तस्य॒ धाम्नो॑ अ॒मृत॑स्य॒ योनेः᳚⁠। आ नो॒ गोषु॑ विश॒त्वौष॑धीषु॒ जहा॑मि से॒दिमनि॑रा॒ममी॑वाम्⁠॥ अग्ने॒ तव॒ श्रवो॒ वयो॒ महि॑ भ्राजन्त्य॒र्चयो॑ विभावसो⁠। बृह॑द्भानो॒ शव॑सा॒ वाज॑मु॒क्थ्य॑न्दधा॑सि दा॒शुषे॑ कवे⁠॥ इ॒र॒ज्यन्न॑ग्ने प्रथयस्व ज॒न्तुभि॑र॒स्मे रायो॑ अमर्त्य⁠। स द॑र्‌श॒तस्य॒ वपु॑षो॒ वि रा॑जसि पृ॒णख्‍षि॑ सान॒सिꣳ र॒यिम्⁠॥ ऊर्जो॑ नपा॒ज्जात॑वेदः सुश॒स्तिभि॒र् मन्द॑स्व [३०೩೦౩౦௩௦३०] धी॒तिभि॑र् हि॒तः⁠। त्वे इषः॒ सन्द॑धु॒र् भूरि॑रेतसश्चि॒त्रोत॑यो वा॒मजा॑ताः⁠॥ पा॒व॒कव॑र्चाः शु॒क्रव॑र्चा॒ अनू॑नवर्चा॒ उदि॑यर्‌षि भा॒नुना᳚⁠। पु॒त्रः पि॒तरा॑ वि॒चर॒न्नुपा॑वस्यु॒भे पृ॑णख्‍षि॒ रोद॑सी⁠॥ ऋ॒तावा॑नम्महि॒षव्ँवि॒श्वच॑र्‌षणिम॒ग्निꣳ सु॒म्नाय॑ दधिरे पु॒रो जनाः᳚⁠। श्रुत्क॑र्णꣳ स॒प्रथ॑स्तमन्त्वा गि॒रा दैव्य॒म्मानु॑षा यु॒गा⁠॥ नि॒ष्क॒र्तार॑मद्ध्व॒रस्य॒ प्रचे॑तस॒ङ्ख्‍षय॑न्त॒ꣳ॒ राध॑से म॒हे⁠। रा॒तिम्भृगू॑णामु॒शिज॑ङ्क॒विक्र॑तुम्पृ॒णख्‍षि॑ सान॒सिꣳ [३१೩೧౩౧௩௧३१] र॒यिम्⁠॥ चितः॑ स्थ परि॒चित॑ ऊर्द्ध्व॒चितः॑ श्रयद्ध्व॒न्तया॑ दे॒वत॑याऽङ्गिर॒स्वद् ध्रु॒वाः सी॑दत⁠॥ आ प्या॑यस्व॒ समे॑तु ते वि॒श्वतः॑ सोम॒ वृष्णि॑यम्⁠। भवा॒ वाज॑स्य सङ्ग॒थे⁠॥ सन्ते॒ पया॑ꣳसि॒ समु॑ यन्तु॒ वाजाः॒ सव्ँवृष्णि॑यान्यभिमाति॒षाहः॑⁠। आ॒प्याय॑मानो अ॒मृता॑य सोम दि॒वि श्रवा॑ꣴस्युत्त॒मानि॑ धिष्व⁠ [३२೩೨౩౨௩௨३२] (आ मन्द॑स्व सान॒सि॒ मेका॒न्नच॑त्वारि॒ꣳ॒शच्च॑) ॥७॥

अ॒भ्य॑स्था॒द्विश्वाः॒ पृत॑ना॒ अरा॑ती॒स्तद॒ग्निरा॑ह॒ तदु॒ सोम॑ आह⁠। बृह॒स्पतिः॑ सवि॒ता तन्म॑ आह पू॒षा मा॑ऽधाथ् सुकृ॒तस्य॑ लो॒के⁠॥ यदक्र॑न्दः प्रथ॒मञ्जाय॑मान उ॒द्यन्थ् स॑मु॒द्रादु॒त वा॒ पुरी॑षात्⁠। श्ये॒नस्य॑ प॒ख्‍षा ह॑रि॒णस्य॑ बा॒हू उप॑स्तुत॒ञ्जनि॑म॒ तत् ते॑ अर्वन्न्⁠॥ अ॒पाम्पृ॒ष्ठम॑सि॒ योनि॑र॒ग्नेः स॑मु॒द्रम॒भितः॒ पिन्व॑मानम्⁠। वर्द्ध॑मानम्म॒ह [३३೩೩౩౩௩௩३३] आ च॒ पुष्क॑रन्दि॒वो मात्र॑या वरि॒णा प्र॑थस्व⁠॥ ब्रह्म॑ जज्ञा॒नम्प्र॑थ॒मम्पु॒रस्ता॒द् वि सी॑म॒तः सु॒रुचो॑ वे॒न आ॑वः⁠। स बु॒द्ध्निया॑ उप॒मा अ॑स्य वि॒ष्ठाः स॒तश्च॒ योनि॒मस॑तश्च॒ विवः॑⁠॥ हि॒र॒ण्य॒ग॒र्भः सम॑वर्त॒ताग्रे॑ भू॒तस्य॑ जा॒तः पति॒रेक॑ आसीत्⁠। स दा॑धार पृथि॒वीन्द्यामु॒तेमाङ्कस्मै॑ दे॒वाय॑ ह॒विषा॑ विधेम⁠॥ द्र॒फ्स्सश्च॑स्कन्द पृथि॒वीमनु॒ [३४೩೪౩౪௩௪३४] द्यामि॒मञ्च॒ योनि॒मनु॒ यश्च॒ पूर्वः॑⁠। तृ॒तीय॒य्ँयोनि॒मनु॑ स॒ञ्चर॑न्तन्द्र॒फ्स्सञ्जु॑हो॒म्यनु॑ स॒प्त होत्राः᳚⁠॥ नमो॑ अस्तु स॒र्पेभ्यो॒ ये के च॑ पृथि॒वीमनु॑⁠। ये अ॒न्तरि॑ख्‍षे॒ ये दि॒वि तेभ्यः॑ स॒र्पेभ्यो॒ नमः॑⁠॥ ये॑ऽदो रो॑च॒ने दि॒वो ये वा॒ सूर्य॑स्य र॒श्मिषु॑⁠। येषा॑म॒फ्सु सदः॑ कृ॒तन्तेभ्यः॑ स॒र्पेभ्यो॒ नमः॑⁠॥ या इष॑वो यातु॒धाना॑ना॒य्ँये वा॒ वन॒स्पती॒ꣳ॒रनु॑⁠। ये वा॑ऽव॒टेषु॒ शेर॑ते॒ तेभ्यः॑ स॒र्पेभ्यो॒ नमः॑⁠ [३५೩೫౩౫௩௫३५] (म॒हो ऽनु॑ यातु॒धाना॑ना॒ मेका॑दश च) ॥८॥

ध्रु॒वाऽसि॑ ध॒रुणाऽस्तृ॑ता वि॒श्वक॑र्मणा॒ सुकृ॑ता⁠। मा त्वा॑ समु॒द्र उद्व॑धी॒न्मा सु॑प॒र्णोऽव्य॑थमाना पृथि॒वीन्दृ॑ꣳह⁠॥ प्र॒जाप॑तिस्त्वा सादयतु पृथि॒व्याः पृ॒ष्ठे व्यच॑स्वती॒म्प्रथ॑स्वती॒म्प्रथो॑ऽसि पृथि॒व्य॑सि॒ भूर॑सि॒ भूमि॑र॒स्यदि॑तिरसि वि॒श्वधा॑या॒ विश्व॑स्य॒ भुव॑नस्य ध॒र्त्री पृ॑थि॒वीय्ँय॑च्छ पृथि॒वीन्दृ॑ꣳह पृथि॒वीम्मा हि॑ꣳसी॒र् विश्व॑स्मै प्रा॒णाया॑पा॒नाय॑ व्या॒नायो॑दा॒नाय॑ प्रति॒ष्ठायै॑ [३६೩೬౩౬௩௬३६] च॒रित्रा॑या॒ग्निस्त्वा॒ऽभि पा॑तु म॒ह्या स्व॒स्त्या छ॒र्दिषा॒ शन्त॑मेन॒ तया॑ दे॒वत॑याऽङ्गिर॒स्वद्ध्रु॒वा सी॑द⁠॥ काण्डा᳚त्काण्डात् प्र॒रोह॑न्ती॒ परु॑षःपरुषः॒ परि॑⁠। ए॒वा नो॑ दूर्वे॒ प्र त॑नु स॒हस्रे॑ण श॒तेन॑ च⁠॥ या श॒तेन॑ प्रत॒नोषि॑ स॒हस्रे॑ण वि॒रोह॑सि⁠। तस्या᳚स्ते देवीष्टके वि॒धेम॑ ह॒विषा॑ व॒यम्⁠॥ अषा॑ढाऽसि॒ सह॑माना॒ सह॒स्वारा॑तीः॒ सह॑स्वारातीय॒तः सह॑स्व॒ पृत॑नाः॒ सह॑स्व पृतन्य॒तः⁠। स॒हस्र॑वीर्या [३७೩೭౩౭௩௭३७] सि॒ सा मा॑ जिन्व⁠॥ मधु॒ वाता॑ ऋताय॒ते मधु॑ ख्‍षरन्ति॒ सिन्ध॑वः⁠। माद्ध्वी᳚र् नः स॒न्त्वोष॑धीः⁠॥ मधु॒ नक्त॑मु॒तोषसि॒ मधु॑म॒त् पार्थि॑व॒ꣳ॒ रजः॑⁠। मधु॒ द्यौर॑स्तु नः पि॒ता⁠॥ मधु॑मान् नो॒ वन॒स्पति॒र् मधु॑माꣳ अस्तु॒ सूर्यः॑⁠। माध्वी॒र् गावो॑ भवन्तु नः⁠॥ म॒ही द्यौः पृ॑थि॒वी च॑ न इ॒मय्ँय॒ज्ञम्मि॑मिख्‍षताम्⁠। पि॒पृ॒तान्नो॒ भरी॑मभिः⁠॥ तद्विष्णोः᳚ पर॒मं [३८೩೮౩౮௩௮३८] प॒दꣳ सदा॑ पश्यन्ति सू॒रयः॑⁠। दि॒वीव॒ चख्‍षु॒रात॑तम्⁠॥ ध्रु॒वाऽसि॑ पृथिवि॒ सह॑स्व पृतन्य॒तः⁠। स्यू॒ता दे॒वेभि॑र॒मृते॒नाऽऽ*गाः᳚⁠॥ यास्ते॑ अग्ने॒ सूर्ये॒ रुच॑ उद्य॒तो दिव॑मात॒न्वन्ति॑ र॒श्मिभिः॑⁠। ताभिः॒ सर्वा॑भी रु॒चे जना॑य न स्कृधि⁠॥ या वो॑ देवाः॒ सूर्ये॒ रुचो॒ गोष्वश्वे॑षु॒ या रुचः॑⁠। इन्द्रा᳚ग्नी॒ ताभिः॒ सर्वा॑भी॒ रुच॑न्नो धत्त बृहस्पते⁠॥ वि॒राड् [३९೩೯౩౯௩௯३९] ज्योति॑रधारयथ् स॒म्राड् ज्योति॑रधारयथ् स्व॒राड् ज्योति॑रधारयत्⁠॥ अग्ने॑ यु॒ख्‍ष्वा हि ये तवाश्वा॑सो देव सा॒धवः॑⁠। अर॒व्ँवह॑न्त्या॒शवः॑⁠॥ यु॒ख्‍ष्वा हि दे॑व॒हूत॑मा॒ꣳ॒ अश्वा॑ꣳ अग्ने र॒थीरि॑व⁠। नि होता॑ पू॒र्व्यः स॑दः⁠॥ द्र॒फ्स्सश्च॑स्कन्द पृथि॒वीमनु॒ द्यामि॒मञ्च॒ योनि॒मनु॒ यश्च॒ पूर्वः॑⁠। तृ॒तीय॒य्ँयोनि॒मनु॑ स॒ञ्चर॑न्तन्द्र॒फ्स्सञ्जु॑हो॒म्यनु॑ स॒प्त [४०೪೦౪౦௪௦४०] होत्राः᳚⁠॥ अभू॑दि॒दव्ँविश्व॑स्य॒ भुव॑नस्य॒ वाजि॑नम॒ग्नेर् वै᳚श्वान॒रस्य॑ च⁠। अ॒ग्निर् ज्योति॑षा॒ ज्योति॑ष्मान् रु॒क्मो वर्च॑सा॒ वर्च॑स्वान्⁠॥ ऋ॒चे त्वा॑ रु॒चे त्वा॒ समिथ् स्र॑वन्ति स॒रितो॒ न धेनाः᳚⁠। अ॒न्तर्‌हृ॒दा मन॑सा पू॒यमा॑नाः⁠॥ घृ॒तस्य॒ धारा॑ अ॒भि चा॑कशीमि⁠। हि॒र॒ण्ययो॑ वेत॒सो मद्ध्य॑ आसाम्⁠॥ तस्मि᳚न्थ् सुप॒र्णो म॑धु॒कृत् कु॑ला॒यी भज॑न्नास्ते॒ मधु॑ दे॒वता᳚भ्यः⁠। तस्या॑सते॒ हर॑यः स॒प्त तीरे᳚ स्व॒धान्दुहा॑ना अ॒मृत॑स्य॒ धारा᳚म्⁠ [४१೪೧౪౧௪௧४१] (प्र॒ति॒ष्ठायै॑ स॒हस्र॑वीर्या पर॒मं वि॒राट्थ् स॒प्त तीरे॑ च॒त्वारि॑ च) ॥९॥

आ॒दि॒त्यङ्गर्भ॒म्पय॑सा सम॒ञ्जन्थ् स॒हस्र॑स्य प्रति॒माव्ँवि॒श्वरू॑पम्⁠। परि॑ वृङ्ग्धि॒ हर॑सा॒ माऽभि मृ॑ख्‍षः श॒तायु॑षङ्कृणुहि ची॒यमा॑नः⁠॥ इ॒मम्मा हि॑ꣳसीर् द्वि॒पाद॑म्पशू॒नाꣳ सह॑स्राख्‍ष॒ मेध॒ आ ची॒यमा॑नः⁠। म॒युमा॑र॒ण्यमनु॑ ते दिशामि॒ तेन॑ चिन्वा॒नस्त॒नुवो॒ नि षी॑द⁠॥ वात॑स्य॒ ध्राजि॒व्ँवरु॑णस्य॒ नाभि॒मश्व॑ञ्जज्ञा॒नꣳ स॑रि॒रस्य॒ मद्ध्ये᳚⁠। शिशु॑न्न॒दीना॒ꣳ॒ हरि॒मद्रि॑बुद्ध॒मग्ने॒ मा हि॑ꣳसीः [४२೪೨౪౨௪௨४२] पर॒मे व्यो॑मन्न्⁠॥ इ॒मम्मा हि॑ꣳसी॒रेक॑शफम्पशू॒नाङ्क॑निक्र॒दव्ँवा॒जिन॒व्ँवाजि॑नेषु⁠। गौ॒रमा॑र॒ण्यमनु॑ ते दिशामि॒ तेन॑ चिन्वा॒नस्त॒नुवो॒ नि षी॑द⁠॥ अज॑स्र॒मिन्दु॑मरु॒षम्भु॑र॒ण्युम॒ग्निमी॑डे पू॒र्वचि॑त्तौ॒ नमो॑भिः⁠। स पर्व॑भिर्‌ऋतु॒शः कल्प॑मानो॒ गाम्मा हि॑ꣳसी॒रदि॑तिव्ँवि॒राज᳚म्⁠॥ इ॒मꣳ स॑मु॒द्रꣳ श॒तधा॑र॒मुथ्स॑व्ँव्य॒च्यमा॑न॒म्भुव॑नस्य॒ मद्ध्ये᳚⁠। घृ॒तन्दुहा॑ना॒मदि॑ति॒ञ्जना॒याग्ने॒ मा [४३೪೩౪౩௪௩४३] हि॑ꣳसीः पर॒मे व्यो॑मन्न्⁠। ग॒व॒यमा॑र॒ण्यमनु॑ ते दिशामि॒ तेन॑ चिन्वा॒नस्त॒नुवो॒ नि षी॑द⁠॥ वरू᳚त्रि॒न्त्वष्टु॒र् वरु॑णस्य॒ नाभि॒मवि॑ञ्जज्ञा॒नाꣳ रज॑सः॒ पर॑स्मात्⁠। म॒हीꣳ सा॑ह॒स्रीमसु॑रस्य मा॒यामग्ने॒ मा हि॑ꣳसीः पर॒मे व्यो॑मन्न्⁠॥ इ॒मामू᳚र्णा॒युव्ँवरु॑णस्य मा॒यान्त्वच॑म्पशू॒नान्द्वि॒पदा॒ञ्चतु॑ष्पदाम्⁠। त्वष्टुः॑ प्र॒जाना᳚म्प्रथ॒मञ्ज॒नित्र॒मग्ने॒ मा हि॑ꣳसीः पर॒मे व्यो॑मन्न्⁠। उष्ट्र॑मार॒ण्यमनु॑ [४४೪೪౪౪௪௪४४] ते दिशामि॒ तेन॑ चिन्वा॒नस्त॒नुवो॒ नि षी॑द⁠॥ यो अ॒ग्निर॒ग्नेस्तप॒सोऽधि॑ जा॒तः शोचा᳚त् पृथि॒व्या उ॒त वा॑ दि॒वस्परि॑⁠। येन॑ प्र॒जा वि॒श्वक॑र्मा॒ व्यान॒ट् तम॑ग्ने॒ हेडः॒ परि॑ ते वृणक्तु⁠॥ अ॒जा ह्य॑ग्नेरज॑निष्ट॒ गर्भा॒थ् सा वा अ॑पश्यज्जनि॒तार॒मग्रे᳚⁠। तया॒ रोह॑माय॒न्नुप॒ मेद्ध्या॑स॒स्तया॑ दे॒वा दे॒वता॒मग्र॑ आयन्न्⁠। श॒र॒भ मा॑र॒ण्यमनु॑ ते दिशामि॒ तेन॑ चिन्वा॒नस्त॒नुवो॒ नि षी॑द⁠ [४५೪೫౪౫௪௫४५] (अग्ने॒ मा हि॑ꣳसी॒ रग्ने॒ मो ष्ट्र॑मार॒ण्यमनु॑ शर॒भन् नव॑ च) ॥१०॥

अनुवाक १० विशेष: (आ॒दि॒त्य मि॒मन्द्वि॒पादे॑ म॒युव्ँवात॒स्या श्व॑ मि॒म मेक॑शफ ङ्गौ॒रम ज॑स्रङ्गव॒यव्ँवरू᳚त्रि॒ मवि॑ मि॒मामू᳚र्णा॒र्यु मुष्ट्र॒य्ँयो अ॒ग्निः श॑र॒भम्⁠॥)

इन्द्रा᳚ग्नी रोच॒ना दि॒वः परि॒ वाजे॑षु भूषथः⁠। तद् वा᳚ञ्चेति॒ प्र वी॒र्य᳚म्⁠॥ श्ञथ॑द्वृ॒त्रमु॒त स॑नोति॒ वाज॒मिन्द्रा॒ यो अ॒ग्नी सहु॑री सप॒र्यात्⁠। इ॒र॒ज्यन्ता॑ वस॒व्य॑स्य॒ भूरेः॒ सह॑स्तमा॒ सह॑सा वाज॒यन्ता᳚⁠॥ प्र च॑र्‌ष॒णिभ्यः॑ पृतना॒ हवे॑षु॒ प्र पृ॑थि॒व्या रि॑रिचाथे दि॒वश्च॑⁠। प्र सिन्धु॑भ्यः॒ प्र गि॒रिभ्यो॑ महि॒त्वा प्रेन्द्रा᳚ग्नी॒ विश्वा॒ भुव॒नाऽत्य॒न्या⁠॥ मरु॑तो॒ यस्य॒ हि [४६೪೬౪౬௪௬४६] ख्‍षये॑ पा॒था दि॒वो वि॑महसः⁠। स सु॑गो॒पात॑मो॒ जनः॑⁠॥ य॒ज्ञैर् वा॑ यज्ञवाहसो॒ विप्र॑स्य वा मती॒नाम्⁠। मरु॑तः शृणु॒ता हव᳚म्⁠॥ श्रि॒यसे॒ कम्भा॒नुभिः॒ सम्मि॑मिख्‍षिरे॒ ते र॒श्मिभि॒स्त ऋक्व॑भिः सुखा॒दयः॑⁠। ते वाशी॑मन्त इ॒ष्मिणो॒ अभी॑रवो वि॒द्रे प्रि॒यस्य॒ मारु॑तस्य॒ धाम्नः॑⁠॥ अव॑ ते॒ हेड॒> १, उदु॑त्त॒मं >२⁠॥ कया॑ नश्चि॒त्र आ भु॑वदू॒ती स॒दावृ॑धः॒ सखा᳚⁠। कया॒ शचि॑ष्ठया वृ॒ता⁠ [४७೪೭౪౭௪௭४७] को अ॒द्य यु॑ङ्क्ते धु॒रि गा ऋ॒तस्य॒ शिमी॑वतो भा॒मिनो॑ दुर्‌हृणा॒यून्⁠। आ॒सन्नि॑षून् हृ॒थ्स्वसो॑ मयो॒भून्‌य ए॑षाम्भृ॒त्यामृ॒णध॒थ् स जी॑वात्⁠॥ अग्ने॒ नयाऽऽ> ३, दे॒वाना॒ꣳ॒ >४, शन्नो॑ भवन्तु॒ > ५, वाजे॑वाजे>६⁠॥ अ॒फ्स्व॑ग्ने॒ सधि॒ष्टव॒ सौष॑धी॒रनु॑ रुद्ध्यसे⁠। गर्भे॒ सञ्जा॑यसे॒ पुनः॑⁠॥ वृषा॑ सोम द्यु॒माꣳ अ॑सि॒ वृषा॑ देव॒ वृष॑व्रतः⁠। वृषा॒ धर्मा॑णि दधिषे⁠॥ इ॒मम्मे॑ वरुण॒ > ७, तत्त्वा॑ यामि॒>८, त्वन्नो॑ अग्ने॒>९, स त्वन्नो॑ अग्ने> १०⁠ [४८೪೮౪౮௪௮४८] (हि वृ॒ता म॒ एका॑दश च) ॥११॥