ऋचां प्राची

ऋचाम्प्राची

ओं नमः परमात्मने, श्री महागणपतये नमः,

श्री गुरुभ्यो नमः⁠। ह॒रिः॒ ओं⁠॥

ॐ
तै.ब्रा.३.१२.९.१
ऋ॒चां प्राची॑ मह॒ती दिगु॑च्यते⁠। दख्‍षि॑णामाहु॒र् यजु॑षामपा॒रां⁠। अथ॑र्वणा॒मग्ङि॑रसां प्र॒तीची᳚⁠। साम्ना॒मुदी॑ची मह॒ती दिगु॑च्यते⁠। ऋ॒ग्भिः पू᳚र्वा॒ह्णे दि॒वि दे॒व ई॑यते⁠। य॒जु॒र्वे॒दे ति॑ष्ठति॒ मद्ध्ये॒ अह्नः॑⁠। सा॒म॒वे॒देना᳚स्तम॒ये मही॑यते⁠। वेदै॒रशू᳚न्यस्त्रि॒भिरे॑ति॒ सूर्यः॑⁠। ऋ॒ग्भ्यो जा॒ताꣳ स॑र्व॒शो मूर्त्ति॑माहुः⁠। सर्वा॒ गति॑र् याजु॒षी है॒व शश्व॑त्⁠॥ १ सर्वं॒ तेज॑ स्सामरू॒प्यꣳ ह॑ शश्वत्⁠। सर्व॑ हे॒दं ब्रह्म॑णा है॒व सृ॒ष्टं⁠। ऋ॒ग्भ्यो जा॒तव्ँवैश्य॒व्ँवर्ण॑माहुः⁠। य॒जु॒र्वे॒दं ख्‍ष॑त्रि॒यस्या॑हु॒र् योनिं᳚⁠। सा॒म॒वे॒दो ब्रा᳚ह्म॒णानां॒ प्रसू॑तिः⁠। पूर्वे॒ पूर्वे᳚भ्यो॒ वच॑ ए॒तदू॑चुः⁠। आ॒द॒र्॒‌शम॒ग्निं चि॑न्वा॒नाः⁠। पूर्वे॑ विश्व॒सृजो॒ऽमृताः᳚⁠। श॒तव्ँव॑र्‌षसह॒स्राणि॑⁠। दी॒ख्‍षि॒ता स्स॒त्रमा॑सत⁠॥ २ तप॑ आसीद् गृ॒हप॑तिः⁠। ब्रह्म॑ ब्र॒ह्माभ॑वथ् स्व॒यं⁠। स॒त्यꣳ ह॒ होतै॑षा॒मासी᳚त्⁠। यद् वि॑श्व॒सृज॒ आस॑त⁠। अ॒मृत॑मेभ्य॒ उद॑गायत्⁠। स॒हस्रं॑ परिवथ्स॒रान्⁠। भू॒तꣳ ह॑ प्रस्तो॒तैषा॒मासी᳚त्⁠। भ॒वि॒ष्यत् प्रति॑ चाहरत्⁠। प्रा॒णो अ॑द्ध्व॒र्युर॑भवत्⁠। इ॒दꣳ सर्व॒ꣳ॒ सिषा॑सतां⁠॥ ३ अ॒पा॒नो वि॒द्वाना॒वृतः॑⁠। प्रति॒ प्राति॑ष्ठदद्ध्व॒रे⁠। आ॒र्त्त॒वा उ॑पगा॒तारः॑⁠। स॒द॒स्या॑ ऋ॒तवो॑ऽभवन्⁠। अ॒र्द्ध॒मा॒साश्च॒ मासा᳚श्च⁠। च॒म॒सा॒द्ध्व॒र्य॒वोऽभ॑वन्⁠। अश॑ꣳ स॒द् ब्रह्म॑ण॒स्तेजः॑⁠। अ॒च्छा॒वा॒कोऽभ॑व॒द् यशः॑⁠। ऋ॒तमे॑षां प्रशा॒स्ताऽऽसी᳚त्⁠। यद् वि॑श्व॒सृज॒ आस॑त⁠॥ ४ ऊर्ग् राजा॑न॒मुद॑वहत्⁠। ध्रु॒व॒ गो॒प स्सहो॑ऽभवत्⁠। ओजो॒ऽभ्य॑ष्टौ॒द् ग्राव्‌ण्णः॑⁠। यद् वि॑श्व॒सृज॒ आस॑त⁠। अप॑चितिः पो॒त्रीया॑मयजत्⁠। ने॒ष्ट्रीया॑मयज॒त् त्विषिः॑⁠। आग्नी᳚द्ध्राद् वि॒दुषी॑ स॒त्यं⁠। श्र॒द्धा है॒वा य॑जथ् स्व॒यं⁠। इरा॒ पत्नी॑ विश्व॒ सृजां᳚⁠। आकू॑तिरपिनड्ढ॒विः⁠॥ ५ इ॒द्ध्मꣳ ह॒ ख्‍षुच् चै᳚भ्य उ॒ग्रे⁠। तृ॒ष्णा चा व॑हतामु॒भे⁠। वागे॑षाꣳ सुब्रह्म॒ण्याऽऽसी᳚त्⁠। छ॒न्दो॒ यो॒गान्‌वि॑जान॒ती⁠। क॒ल्प॒त॒न्त्राणि॑ तन्वा॒नाऽहः॑⁠। स॒ꣴ॒ स्थाश्च॑ सर्व॒शः⁠। अ॒हो॒रा॒त्रे प॑शुपा॒ल्यौ⁠। मु॒हू॒र्त्ताः प्रे॒ष्या॑ अभवन्⁠। मृ॒त्युस् तद॑भवद्धा॒ता⁠। श॒मि॒तोग्रो वि॒शां पतिः॑⁠॥ ६ वि॒श्व॒सृजः॑ प्रथ॒मा स्स॒त्रमा॑सत⁠। स॒हस्र॑ समं॒ प्रसु॑तेन॒ यन्तः॑⁠। ततो॑ ह जज्ञे॒ भुव॑नस्य गो॒पाः⁠। हि॒र॒ण्मय॑ श्श॒कुनि॒र् ब्रह्म॒ नाम॑⁠। येन॒ सूर्य॒स्तप॑ति॒ तेज॑से॒द्धः⁠। पि॒ता पु॒त्रेण॑ पितृ॒मान् योनि॑योनौ⁠। नावे॑दविन् मनुते॒ तं बृ॒हन्तं᳚⁠। स॒र्वा॒नु॒भुमा॒त्मान॑ꣳ संपरा॒ये⁠। ए॒ष नि॒त्यो म॑हि॒मा ब्रा᳚ह्म॒णस्य॑⁠। न कर्म॑णा वर्द्धते॒ नो कनी॑यान्⁠॥ ७ तस्यै॒वात्मा प॑द॒वित्तव्ँवि॑दित्वा⁠। न कर्म॑णा लिप्यते॒ पाप॑केन⁠। पञ्च॑ पश्चा॒शत॑स्त्रि॒वृत॑ स्सव्ँवथ्स॒राः⁠। पञ्च॑ पञ्चा॒शतः॑ पञ्चद॒शाः⁠। पञ्च॑ पञ्चा॒शत॑ स्सप्तद॒शाः⁠। पञ्च॑ पञ्चा॒शत॑ एकवि॒ꣳ॒शाः⁠। वि॒श्व॒सृजा॑ꣳ स॒हस्र॑ सव्ँवथ्सरं⁠। ए॒तेन॒ वै वि॑श्व॒सृज॑ इ॒दव्ँविश्व॑मसृजन्त⁠। यद् विश्व॒मसृ॑जन्त⁠। तस्मा᳚द् विश्व॒सृजः॑⁠। विश्व॑मेना॒ननु॒ प्रजा॑यते⁠। ब्रह्म॑ण॒ स्सायु॑ज्यꣳ सलो॒कता᳚य्ँयन्ति⁠। ए॒तासा॑मे॒व दे॒वता॑ना॒ꣳ॒ सायु॑ज्यं⁠। सा॒र्ष्टिता॑ꣳ समान लो॒कता᳚य्ँयन्ति⁠। य ए॒तदु॑प॒यन्ति॑⁠। ये चै॑न॒त् प्राहुः॑⁠। येभ्य॑श्चैन॒त् प्राहुः॑⁠॥ ओं⁠॥
Sections१
Mantras१
Version5.0