कृष्ण यजुर्वेदीय तैत्तिरीय संहिता
चतुर्थकाण्डे षष्ठः प्रश्नः

कांड ४ प्रश्न ६
परिषेचनसंस्काराभिधानं

ओं नमः परमात्मने, श्री महागणपतये नमः

श्री गुरुभ्यो नमः, ह॒रिः॒ ओं

ॐ
अश्म॒न्नूर्ज॒म्पर्व॑ते शिश्रिया॒णाव्ँवाते॑ प॒र्जन्ये॒ वरु॑णस्य॒ शुष्मे᳚⁠। अ॒द्भ्य ओष॑धीभ्यो॒ वन॒स्पति॒भ्योऽधि॒ संभृ॑ता॒न्तान्न॒ इष॒मूर्ज॑न्धत्त मरुतः सꣳररा॒णाः⁠॥ अश्म॑ꣴस्ते॒ ख्‍षुद॒मुन्ते॒ शुगृ॑च्छतु॒ यन्द्वि॒ष्मः⁠॥ स॒मु॒द्रस्य॑ त्वा॒ऽ*वाक॒याऽग्ने॒ परि॑ व्ययामसि⁠। पा॒व॒को अ॒स्मभ्य॑ꣳ शि॒वो भ॑व⁠॥ हि॒मस्य॑ त्वा ज॒रायु॒णाऽग्ने॒ परि॑ व्ययामसि⁠। पा॒व॒को अ॒स्मभ्य॑ꣳ शि॒वो भ॑व⁠॥ उप॒ [१] ज्मन्नुप॑ वेत॒सेऽव॑त्तरन्न॒दीष्वा⁠। अग्ने॑ पि॒त्तम॒पाम॑सि⁠॥ मण्डू॑कि॒ ताभि॒रा ग॑हि॒ सेमन्नो॑ य॒ज्ञम्⁠। पा॒व॒कव॑र्णꣳ शि॒वङ्कृ॑धि⁠॥ पा॒व॒क आ चि॒तय॑न्त्या कृ॒पा⁠। ख्‍षाम॑न् रुरु॒च उ॒षसो॒ न भा॒नुना᳚⁠॥ तूर्व॒न् न याम॒न्नेत॑शस्य॒ नू रण॒ आ यो घृ॒णे⁠। न त॑तृषा॒णो अ॒जरः॑⁠॥ अग्ने॑ पावक रो॒चिषा॑ म॒न्द्रया॑ देव जि॒ह्वया᳚⁠। आ दे॒वान् [२] व॑ख्‍षि॒ यख्‍षि॑ च⁠॥ स नः॑ पावक दीदि॒वोऽग्ने॑ दे॒वाꣳ इ॒हाऽऽव॑ह⁠। उप॑ य॒ज्ञꣳ ह॒विश्च॑ नः⁠॥ अ॒पामि॒दन्न्यय॑नꣳ समु॒द्रस्य॑ नि॒वेश॑नम्⁠। अ॒न्यन्ते॑ अ॒स्मत् त॑पन्तु हे॒तयः॑ पाव॒को अ॒स्मभ्य॑ꣳ शि॒वो भ॑व⁠॥ नम॑स्ते॒ हर॑से शो॒चिषे॒ नम॑स्ते अस्त्व॒र्चिषे᳚⁠। अ॒न्यन्ते॑ अ॒स्मत् त॑पन्तु हे॒तयः॑ पाव॒को अ॒स्मभ्य॑ꣳ शि॒वो भ॑व⁠॥ नृ॒षदे॒ वड॑ [३] फ्सु॒षदे॒ वड् व॑न॒सदे॒ वड् ब॑र्हि॒षदे॒ वट्थ् सु॑व॒र्विदे॒ वट्⁠॥ ये दे॒वा दे॒वाना᳚य्ँय॒ज्ञिया॑ य॒ज्ञिया॑नाꣳ सव्ँवथ्स॒रीण॒मुप॑ भा॒गमास॑ते⁠। अ॒हु॒तादो॑ ह॒विषो॑ य॒ज्ञे अ॒स्मिन्थ् स्व॒यञ्जु॑हुद्ध्व॒म्मधु॑नो घृ॒तस्य॑⁠॥ ये दे॒वा दे॒वेष्वधि॑ देव॒त्वमाय॒न्॒‌ये ब्रह्म॑णः पुरे॒तारो॑ अ॒स्य⁠। येभ्यो॒ नर्ते पव॑ते॒ धाम॒ किञ्च॒न न ते दि॒वो न पृ॑थि॒व्या अधि॒ स्नुषु॑⁠॥ प्रा॒ण॒दा [४] अ॑पान॒दा व्या॑न॒दाश्च॑ख्‍षु॒र्दा व॑र्चो॒दा व॑रिवो॒दाः⁠। अ॒न्यन्ते॑ अ॒स्मत् त॑पन्तु हे॒तयः॑ पाव॒को अ॒स्मभ्य॑ꣳ शि॒वो भ॑व⁠॥ अ॒ग्निस्ति॒ग्मेन॑ शो॒चिषा॒ यꣳस॒द् विश्व॒न्न्य॑त्रिण᳚म्⁠। अ॒ग्निर् नो॑ वꣳसते र॒यिम्⁠॥ सैनाऽनी॑केन सुवि॒दत्रो॑ अ॒स्मे यष्टा॑ दे॒वाꣳ आय॑जिष्ठः स्व॒स्ति⁠। अद॑ब्धो गो॒पा उ॒त नः॑ पर॒स्पा अग्ने᳚ द्यु॒मदु॒त रे॒वद्दि॑दीहि⁠ [५] (उप॑ दे॒वान् वट् प्रा॑ण॒दा श्चतु॑श्चत्वारिꣳशच्च) ॥१॥
य इ॒मा विश्वा॒ भुव॑नानि॒ जुह्व॒दृषि॒र्॒‌होता॑ निष॒सादा॑ पि॒ता नः॑⁠। स आ॒शिषा॒ द्रवि॑णमि॒च्छमा॑नः परम॒च्छदो॒ वर॒ आ वि॑वेश⁠॥ वि॒श्वक॑र्मा॒ मन॑सा॒ यद् विहा॑या धा॒ता वि॑धा॒ता प॑र॒मोत स॒न्दृक्⁠। तेषा॑मि॒ष्टानि॒ समि॒षा म॑दन्ति॒ यत्र॑ सप्त॒र्॒‌षीन् प॒र एक॑मा॒हुः⁠॥ यो नः॑ पि॒ता ज॑नि॒ता यो वि॑धा॒ता यो नः॑ स॒तो अ॒भ्या सज्ज॒जान॑⁠ [६] यो दे॒वाना᳚न्नाम॒धा एक॑ ए॒व तꣳ सं॑प्र॒श्ञम्भुव॑ना यन्त्य॒न्या⁠॥ त आऽय॑जन्त॒ द्रवि॑ण॒ꣳ॒ सम॑स्मा॒ ऋष॑यः॒ पूर्वे॑ जरि॒तारो॒ न भू॒ना⁠। अ॒सूर्ता॒ सूर्ता॒ रज॑सो वि॒माने॒ ये भू॒तानि॑ स॒मकृ॑ण्वन्नि॒मानि॑⁠॥ न तव्ँवि॑दाथ॒ य इ॒दञ्ज॒जाना॒न्यद् यु॒ष्माक॒मन्त॑रम्भवाति⁠। नी॒हा॒रेण॒ प्रावृ॑ता॒ जल्प्या॑ चासु॒तृप॑ उक्थ॒शास॑श्चरन्ति⁠॥ प॒रो दि॒वा प॒र ए॒ना [७] पृ॑थि॒व्या प॒रो दे॒वेभि॒रसु॑रै॒र् गुहा॒ यत्⁠। कꣴ स्वि॒द् गर्भ॑म्प्रथ॒मन्द॑ध्र॒ आपो॒ यत्र॑ दे॒वाः स॒मग॑च्छन्त॒ विश्वे᳚⁠॥ तमिद् गर्भ॑म्प्रथ॒मन्द॑ध्र॒ आपो॒ यत्र॑ दे॒वाः स॒मग॑च्छन्त॒ विश्वे᳚⁠। अ॒जस्य॒ नाभा॒वद्ध्येक॒मर्पि॑त॒य्ँयस्मि॑न्नि॒दव्ँविश्व॒म्भुव॑न॒मधि॑ श्रि॒तम्⁠॥ वि॒श्वक॑र्मा॒ ह्यज॑निष्ट दे॒व आदिद्ग॑न्ध॒र्वो अ॑भवद् द्वि॒तीयः॑⁠। तृ॒तीयः॑ पि॒ता ज॑नि॒तौष॑धीना [८] म॒पाङ्गर्भ॒व्ँव्य॑दधात् पुरु॒त्रा⁠॥ चख्‍षु॑षः पि॒ता मन॑सा॒ हि धीरो॑ घृ॒तमे॑ने अजन॒न्नन्न॑माने⁠। य॒देदन्ता॒ अद॑दृꣳहन्त॒ पूर्व॒ आदिद् द्यावा॑पृथि॒वी अ॑प्रथेताम्⁠॥ वि॒श्वत॑श्चख्‍षुरु॒त वि॒श्वतो॑मुखो वि॒श्वतो॑हस्त उ॒त वि॒श्वत॑स्पात्⁠। सम्बा॒हुभ्या॒न्नम॑ति॒ सम्पत॑त्रै॒र् द्यावा॑पृथि॒वी ज॒नय॑न् दे॒व एकः॑⁠॥ किꣴ स्वि॑दासीदधि॒ष्ठान॑मा॒रंभ॑णङ्कत॒मथ् स्वि॒त् किमा॑सीत्⁠। यदी॒ भूमि॑ञ्ज॒नय॑न् [९] वि॒श्वक॑र्मा॒ वि द्यामौर्णो᳚न् महि॒ना वि॒श्वच॑ख्‍षाः⁠॥ किꣴ स्वि॒द्वन॒ङ्क उ॒ स वृ॒ख्‍ष आ॑सी॒द्यतो॒ द्यावा॑पृथि॒वी नि॑ष्टत॒ख्‍षुः⁠। मनी॑षिणो॒ मन॑सा पृ॒च्छतेदु॒ तद्यद॒द्ध्यति॑ष्ठ॒द् भुव॑नानि धा॒रय॑न्न्⁠॥ या ते॒ धामा॑नि पर॒माणि॒ याऽव॒मा या म॑द्ध्य॒मा वि॑श्वकर्मन्नु॒तेमा⁠। शिख्‍षा॒ सखि॑भ्यो ह॒विषि॑ स्वधावः स्व॒यय्ँय॑जस्व त॒नुव॑ञ्जुषा॒णः⁠॥ वा॒चस्पति॑व्ँवि॒श्वक॑र्माणमू॒तये॑ [१०] मनो॒युज॒व्ँवाजे॑ अ॒द्या हु॑वेम⁠। स नो॒ नेदि॑ष्ठा॒ हव॑नानि जोषते वि॒श्वशं॑भू॒रव॑से सा॒धुक॑र्मा⁠॥ विश्व॑कर्मन्‌ह॒विषा॑ वावृधा॒नः स्व॒यय्ँय॑जस्व त॒नुव॑ञ्जुषा॒णः⁠। मुह्य॑न्त्व॒न्ये अ॒भितः॑ स॒पत्ना॑ इ॒हास्माक॑म्म॒घवा॑ सू॒रिर॑स्तु⁠॥ विश्व॑कर्मन्‌ह॒विषा॒ वर्द्ध॑नेन त्रा॒तार॒मिन्द्र॑मकृणोरव॒द्ध्यम्⁠। तस्मै॒ विशः॒ सम॑नमन्त पू॒र्वीर॒यमु॒ग्रो वि॑ह॒व्यो॑ यथाऽस॑त्⁠॥ स॒मु॒द्राय॑ व॒युना॑य॒ सिन्धू॑ना॒म्पत॑ये॒ नमः॑⁠। न॒दीना॒ꣳ॒ सर्वा॑साम्पि॒त्रे जु॑हु॒ता वि॒श्वक॑र्मणे॒ विश्वाऽहाऽम॑र्त्यꣳ ह॒विः⁠ [११] (ज॒जानै॒ नौ ष॑धीनां॒ ॒ भूमि॑ञ्ज॒नय॑ न्नू॒तये॒ नमो॒ नव॑ च) ॥२॥
उदे॑नमुत्त॒रान्न॒याग्ने॑ घृतेनाऽऽहुत⁠। रा॒यस्पोषे॑ण॒ सꣳ सृ॑ज प्र॒जया॑ च॒ धने॑न च⁠॥ इन्द्रे॒मम्प्र॑त॒राङ्कृ॑धि सजा॒ताना॑मसद्व॒शी⁠। समे॑न॒व्ँवर्च॑सा सृज दे॒वेभ्यो॑ भाग॒धा अ॑सत्⁠॥ यस्य॑ कु॒र्मो ह॒विर् गृ॒हे तम॑ग्ने वर्द्धया॒ त्वम्⁠। तस्मै॑ दे॒वा अधि॑ ब्रवन्न॒यञ्च॒ ब्रह्म॑ण॒स्पतिः॑⁠॥ उदु॑ त्वा॒ विश्वे॑ दे॒वा [१२] अग्ने॒ भर॑न्तु॒ चित्ति॑भिः⁠। स नो॑ भव शि॒वत॑मः सु॒प्रती॑को वि॒भाव॑सुः⁠॥ पञ्च॒ दिशो॒ दैवी᳚र् य॒ज्ञम॑वन्तु दे॒वीरपाम॑तिन्दुर्म॒तिम्बाध॑मानाः⁠। रा॒यस्पोषे॑ य॒ज्ञप॑तिमा॒भज॑न्तीः⁠॥ रा॒यस्पोषे॒ अधि॑ य॒ज्ञो अ॑स्था॒थ् समि॑द्धे अ॒ग्नावधि॑ मामहा॒नः⁠। उ॒क्थप॑त्र॒ ईड्यो॑ गृभी॒तस्त॒प्तङ्घ॒र्मम्प॑रि॒गृह्या॑यजन्त⁠॥ ऊ॒र्जा यद्य॒ज्ञमश॑मन्त दे॒वा दैव्या॑य ध॒र्त्रे जोष्ट्रे᳚⁠। दे॒व॒श्रीः श्रीम॑णाः श॒तप॑याः [१३] परि॒गृह्य॑ दे॒वा य॒ज्ञमा॑यन्न्⁠॥ सूर्य॑रश्मि॒र्॒‌हरि॑केशः पु॒रस्ता᳚थ् सवि॒ता ज्योति॒रुद॑या॒ꣳ॒ अज॑स्रम्⁠। तस्य॑ पू॒षा प्र॑स॒वय्ँया॑ति दे॒वः सं॒पश्य॒न् विश्वा॒ भुव॑नानि गो॒पाः⁠॥ दे॒वा दे॒वेभ्यो॑ अद्ध्व॒र्यन्तो॑ अस्थुर् वी॒तꣳ श॑मि॒त्रे श॑मि॒ता य॒जद्ध्यै᳚⁠। तु॒रीयो॑ य॒ज्ञो यत्र॑ ह॒व्यमेति॒ ततः॑ पाव॒का आ॒शिषो॑ नो जुषन्ताम्⁠॥ वि॒मान॑ ए॒ष दि॒वो मद्ध्य॑ आस्त आपप्रि॒वान् रोद॑सी अ॒न्तरि॑ख्‍षम्⁠। स वि॒श्वाची॑र॒भि [१४] च॑ष्टे घृ॒ताची॑रन्त॒रा पूर्व॒मप॑रञ्च के॒तुम्⁠॥ उ॒ख्‍षा स॑मु॒द्रो अ॑रु॒णः सु॑प॒र्णः पूर्व॑स्य॒ योनि॑म्पि॒तुरा वि॑वेश⁠। मद्ध्ये॑ दि॒वो निहि॑तः॒ पृश्ञि॒रश्मा॒ वि च॑क्रमे॒ रज॑सः पा॒त्यन्तौ᳚⁠॥ इन्द्र॒व्ँविश्वा॑ अवीवृधन्थ् समु॒द्रव्य॑चस॒ङ्गिरः॑⁠। र॒थीत॑मꣳ रथी॒नाव्ँवाजा॑ना॒ꣳ॒ सत्प॑ति॒म्पति᳚म्⁠॥ सु॒म्न॒हूर् य॒ज्ञो दे॒वाꣳ आ च॑ वख्‍ष॒द्यख्‍ष॑द॒ग्निर् दे॒वो दे॒वाꣳ आ च॑ वख्‍षत्⁠॥ वाज॑स्य मा प्रस॒वेनो᳚द्ग्रा॒भेणोद॑ग्रभीत्⁠। अथा॑ स॒पत्ना॒ꣳ॒ इन्द्रो॑ मे निग्रा॒भेणाध॑राꣳ अकः⁠॥ उ॒द्ग्रा॒भञ्च॑ निग्रा॒भञ्च॒ ब्रह्म॑ दे॒वा अ॑वीवृधन्न्⁠। अथा॑ स॒पत्ना॑निन्द्रा॒ग्नी मे॑ विषू॒चीना॒न् व्य॑स्यताम्⁠ [१५] (दे॒वाः श॒तप॑या अ॒भि वाज॑स्य॒ षड्वि॑ꣳशतिश्च) ॥३॥
आ॒शुः शिशा॑नो वृष॒भो न यु॒द्ध्मो घ॑नाघ॒नः ख्‍षोभ॑णश्चर्‌षणी॒नाम्⁠। सं॒क्रन्द॑नोऽनिमि॒ष ए॑कवी॒रः श॒तꣳ सेना॑ अजयथ् सा॒कमिन्द्रः॑⁠॥ सं॒क्रन्द॑नेना निमि॒षेण॑ जि॒ष्णुना॑ युत्का॒रेण॑ दुश्च्यव॒नेन॑ धृ॒ष्णुना᳚⁠। तदिन्द्रे॑ण जयत॒ तथ् स॑हद्ध्व॒य्ँयुधो॑ नर॒ इषु॑हस्तेन॒ वृष्णा᳚⁠॥ स इषु॑हस्तैः॒ स नि॑षं॒गिभि॑र् व॒शी सꣴस्र॑ष्टा॒ स युध॒ इन्द्रो॑ ग॒णेन॑⁠। स॒ꣳ॒सृ॒ष्ट॒जिथ् सो॑म॒पा बा॑हुश॒र्द्ध्यू᳚र्द्ध्वध॑न्वा॒ प्रति॑हिताभि॒रस्ता᳚⁠॥ बृह॑स्पते॒ परि॑ दीया॒ [१६] रथे॑न रख्‍षो॒हाऽमित्रा॑ꣳ अप॒बाध॑मानः⁠। प्र॒भ॒ञ्जन्थ् सेनाः᳚ प्रमृ॒णो यु॒धा जय॑न्न॒स्माक॑मेद्ध्यवि॒ता रथा॑नाम्⁠॥ गो॒त्र॒भिद॑ङ्गो॒विद॒व्ँवज्र॑बाहु॒ञ्जय॑न्त॒मज्म॑ प्रमृ॒णन्त॒मोज॑सा⁠। इ॒मꣳ स॑जाता॒ अनु॑ वीरयद्ध्व॒मिन्द्र॑ꣳ सखा॒योऽनु॒ सꣳ र॑भद्ध्वम्⁠॥ ब॒ल॒वि॒ज्ञा॒यः स्थवि॑रः॒ प्रवी॑रः॒ सह॑स्वान्‌वा॒जी सह॑मान उ॒ग्रः⁠। अ॒भिवी॑रो अ॒भिस॑त्वा सहो॒जा जैत्र॑मिन्द्र॒ रथ॒माति॑ष्ठ गो॒वित्⁠॥ अ॒भि गो॒त्राणि॒ सह॑सा॒ गाह॑मानोऽदा॒यो [१७] वी॒रः श॒तम॑न्यु॒रिन्द्रः॑⁠। दु॒श्च्य॒व॒नः पृ॑तना॒षाड॑यु॒द्ध्यो᳚स्माक॒ꣳ॒ सेना॑ अवतु॒ प्र यु॒थ्सु⁠॥ इन्द्र॑ आसान्ने॒ता बृह॒स्पति॒र् दख्‍षि॑णा य॒ज्ञः पु॒र ए॑तु॒ सोमः॑⁠। दे॒व॒से॒नाना॑मभिभञ्जती॒नाञ्जय॑न्तीनाम्म॒रुतो॑ य॒न्त्वग्रे᳚⁠॥ इन्द्र॑स्य॒ वृष्णो॒ वरु॑णस्य॒ राज्ञ॑ आदि॒त्याना᳚म्म॒रुता॒ꣳ॒ शर्द्ध॑ उ॒ग्रम्⁠। म॒हाम॑नसाम्भुवनच्य॒वाना॒ङ्घोषो॑ दे॒वाना॒ञ्जय॑ता॒ मुद॑स्थात्⁠॥ अ॒स्माक॒मिन्द्रः॒ समृ॑तेषु ध्व॒जेष्व॒स्माक॒य्ँया इष॑व॒स्ता ज॑यन्तु⁠ [१८] अ॒स्माक॑व्ँवी॒रा उत्त॑रे भवन्त्व॒स्मानु॑ देवा अवता॒ हवे॑षु⁠॥ उद्ध॑र्‌षय मघव॒न्नायु॑धा॒न्युथ् सत्व॑नाम्माम॒काना॒म्महा॑ꣳसि⁠। उद्वृ॑त्रहन् वा॒जिना॒व्ँवाजि॑ना॒न्युद्रथा॑ना॒ञ्जय॑तामेतु॒ घोषः॑⁠॥ उप॒ प्रेत॒ जय॑ता नरः स्थि॒रा वः॑ सन्तु बा॒हवः॑⁠। इन्द्रो॑ वः॒ शर्म॑ यच्छत्वनाधृ॒ष्या यथाऽस॑थ⁠॥ अव॑सृष्टा॒ परा॑ पत॒ शर॑व्ये॒ ब्रह्म॑सꣳशिता⁠। गच्छा॒मित्रा॒न् प्र [१९] वि॑श॒ मैषा॒ङ्कञ्च॒नोच्छि॑षः⁠॥ मर्मा॑णि ते॒ वर्म॑भि श्छादयामि॒ सोम॑स्त्वा॒ राजा॒ऽमृते॑ना॒भि व॑स्ताम्⁠। उ॒रोर् वरी॑यो॒ वरि॑वस्ते अस्तु॒ जय॑न्त॒न्त्वामनु॑ मदन्तु दे॒वाः⁠॥ यत्र॑ बा॒णाः सं॒पत॑न्ति कुमा॒रा वि॑शि॒खा इ॑व⁠। इन्द्रो॑ न॒स्तत्र॑ वृत्र॒हा वि॑श्वा॒हा शर्म॑ यच्छतु⁠ [२०] (दी॒या॒ दा॒यो ज॑यन्त्व॒ मित्रा॒न् प्र॒ च॑त्वारि॒ꣳ॒शच्च॑) ॥४॥
प्राची॒मनु॑ प्र॒दिश॒म्प्रेहि॑ वि॒द्वान॒ग्नेर॑ग्ने पु॒रोअ॑ग्निर् भवे॒ह⁠। विश्वा॒ आशा॒ दीद्या॑नो॒ वि भा॒ह्यूर्ज॑न्नो धेहि द्वि॒पदे॒ चतु॑ष्पदे⁠॥ क्रम॑द्ध्वम॒ग्निना॒ नाक॒मुख्य॒ꣳ॒ हस्ते॑षु॒ बिभ्र॑तः⁠। दि॒वः पृ॒ष्ठꣳ सुव॑र् ग॒त्वा मि॒श्रा दे॒वेभि॑राद्ध्वम्⁠॥ पृ॒थि॒व्या अ॒हमुद॒न्तरि॑ख्‍ष॒माऽरु॑हम॒न्तरि॑ख्‍षा॒द् दिव॒माऽरु॑हम्⁠। दि॒वो नाक॑स्य पृ॒ष्ठाथ् सुव॒र्ज्योति॑रगा [२१] म॒हम्⁠॥ सुव॒र् यन्तो॒ नापे᳚ख्‍षन्त॒ आ द्याꣳ रो॑हन्ति॒ रोद॑सी⁠। य॒ज्ञय्ँये वि॒श्वतो॑धार॒ꣳ॒ सुवि॑द्वाꣳसो वितेनि॒रे⁠॥ अग्ने॒ प्रेहि॑ प्रथ॒मो दे॑वय॒ताञ्चख्‍षु॑र् दे॒वाना॑मु॒त मर्त्या॑नाम्⁠। इय॑ख्‍षमाणा॒ भृगु॑भिः स॒जोषाः॒ सुव॑र् यन्तु॒ स्व॒स्ति⁠॥ नक्तो॒षासा॒ सम॑नसा॒ विरू॑पे धा॒पये॑ते॒ शिशु॒मेक॑ꣳ समी॒ची⁠। द्यावा॒ ख्‍षामा॑ रु॒क्मो अ॒न्तर् वि भा॑ति दे॒वा अ॒ग्निन्धा॑रयन् द्रविणो॒दाः⁠॥ अग्ने॑ सहस्राख्‍ष [२२] शतमूर्द्धञ्छ॒तन्ते᳚ प्रा॒णाः स॒हस्र॑मपा॒नाः⁠। त्वꣳ सा॑ह॒स्रस्य॑ रा॒य ई॑शिषे॒ तस्मै॑ ते विधेम॒ वाजा॑य॒ स्वाहा᳚⁠॥ सु॒प॒र्णो॑ऽसि ग॒रुत्मा᳚न् पृथि॒व्याꣳ सी॑द पृ॒ष्ठे पृ॑थि॒व्याः सी॑द भा॒साऽन्तरि॑ख्‍ष॒मा पृ॑ण॒ ज्योति॑षा॒ दिव॒मुत्त॑भान॒ तेज॑सा॒ दिश॒ उद् दृ॑ꣳह⁠॥ आ॒जुह्वा॑नः सु॒प्रती॑कः पु॒रस्ता॒दग्ने॒ स्वाय्ँयोनि॒मा सी॑द सा॒द्ध्या⁠। अ॒स्मिन्थ्स॒धस्थे॒ अद्ध्युत्त॑रस्मि॒न् विश्वे॑ देवा॒ [२३] यज॑मानश्च सीदत⁠॥ प्रेद्धो॑ अग्ने दीदिहि पु॒रो नोऽज॑स्रया सू॒र्म्या॑ यविष्ठ⁠। त्वाꣳ शश्व॑न्त॒ उप॑ यन्ति॒ वाजाः᳚⁠॥ वि॒धेम॑ ते पर॒मे जन्म॑न्नग्ने वि॒धेम॒ स्तोमै॒रव॑रे स॒धस्थे᳚⁠। यस्मा॒द्योने॑रु॒दारि॑था॒ यजे॒ तम्प्र त्वे ह॒वीꣳषि॑ जुहुरे॒ समि॑द्धे⁠॥ ताꣳ स॑वि॒तुर् वरे᳚ण्यस्य चि॒त्रामाऽहव्ँवृ॑णे सुम॒तिव्ँवि॒श्वज॑न्याम्⁠। याम॑स्य॒ कण्वो॒ अदु॑ह॒त् प्रपी॑नाꣳ स॒हस्र॑धारां॒ [२४] पय॑सा म॒हीङ्गाम्⁠॥ स॒प्त ते॑ अग्ने स॒मिधः॑ स॒प्त जि॒ह्वाः स॒प्तर्‌ष॑यः स॒प्त धाम॑ प्रि॒याणि॑⁠। स॒प्त होत्राः᳚ सप्त॒धा त्वा॑ यजन्ति स॒प्त योनी॒रा पृ॑णस्वा घृ॒तेन॑⁠॥ ई॒दृङ् चा᳚न्या॒दृङ् चै॑ता॒दृङ् च॑ प्रति॒दृङ् च॑ मि॒तश्च॒ संमि॑तश्च॒ सभ॑राः⁠॥ शु॒क्रज्यो॑तिश्च चि॒त्रज्यो॑तिश्च स॒त्यज्यो॑तिश्च॒ ज्योति॑ष्माꣴश्च स॒त्यश्च॑र्त॒पाश्चात्य॑ꣳहाः⁠ [२५] ऋ॒त॒जिच्च॑ सत्य॒जिच्च॑ सेन॒जिच्च॑ सु॒षेण॒श्चान्त्य॑मित्रश्च दू॒रेअ॑मित्रश्च ग॒णः⁠॥ ऋ॒तश्च॑ स॒त्यश्च॑ ध्रु॒वश्च॑ ध॒रुण॑श्च ध॒र्ता च॑ विध॒र्ता च॑ विधार॒यः⁠॥ ई॒दृख्‍षा॑स एता॒दृख्‍षा॑स ऊ॒ षु णः॑ स॒दृख्‍षा॑सः॒ प्रति॑सदृख्‍षास॒ एत॑न⁠। मि॒तास॑श्च॒ संमि॑तासश्च न ऊ॒तये॒ सभ॑रसो मरुतो य॒ज्ञे अ॒स्मिन्निन्द्र॒न्दैवी॒र् विशो॑ म॒रुतोऽनु॑वर्त्मानो॒ यथेन्द्र॒न्दैवी॒र् विशो॑ म॒रुतोऽनु॑वर्त्मान ए॒वमि॒मय्ँयज॑मान॒न्दैवी᳚श्च॒ विशो॒ मानु॑षी॒श्चानु॑वर्त्मानो भवन्तु⁠ [२६] (अ॒गा॒ꣳ॒ स॒ह॒स्रा॒ख्‍ष॒ दे॒वाः॒ स॒हस्र॑धारा॒ मत्य॑ꣳहा॒ अनु॑वर्त्मानः॒ षोड॑श च) ॥५॥
जी॒मूत॑स्येव भवति॒ प्रती॑क॒य्ँयद्व॒र्मी याति॑ स॒मदा॑मु॒पस्थे᳚⁠। अना॑विद्धया त॒नुवा॑ जय॒ त्वꣳ स त्वा॒ वर्म॑णो महि॒मा पि॑पर्तु⁠॥ धन्व॑ना॒ गा धन्व॑ना॒ऽऽजिञ्ज॑येम॒ धन्व॑ना ती॒व्राः स॒मदो॑ जयेम⁠। धनुः॒ शत्रो॑रपका॒मङ्कृ॑णोति॒ धन्व॑ना॒ सर्वाः᳚ प्र॒दिशो॑ जयेम⁠॥ व॒ख्‍ष्यन्ती॒वेदा ग॑नीगन्ति॒ कर्ण॑म्प्रि॒यꣳ सखा॑यम्परिषस्वजा॒ना⁠। योषे॑व शिङ्क्ते॒ वित॒ताऽधि॒ धन्व॒न् [२७] ज्या इ॒यꣳ सम॑ने पा॒रय॑न्ती⁠॥ ते आ॒चर॑न्ती॒ सम॑नेव॒ योषा॑ मा॒तेव॑ पु॒त्रम्बि॑भृतामु॒पस्थे᳚⁠। अप॒ शत्रू॑न्‌विद्ध्यताꣳ सव्ँविदा॒ने आर्त्नी॑ इ॒मे वि॑ष्फु॒रन्ती॑ अ॒मित्रा॑न्⁠॥ ब॒ह्वी॒नाम्पि॒ता ब॒हुर॑स्य पु॒त्रश्चि॒श्चा कृ॑णोति॒ सम॑नाऽव॒गत्य॑⁠। इ॒षु॒धिः सङ्काः॒ पृत॑नाश्च॒ सर्वाः᳚ पृ॒ष्ठे निन॑द्धो जयति॒ प्रसू॑तः⁠॥ रथे॒ तिष्ठ॑न् नयति वा॒जिनः॑ पु॒रो यत्र॑यत्र का॒मय॑ते सुषार॒थिः⁠। अ॒भीशू॑नाम्महि॒मानं॑ [२८] पनायत॒ मनः॑ प॒श्चादनु॑ यच्छन्ति र॒श्मयः॑⁠॥ ती॒व्रान् घोषा᳚न् कृण्वते॒ वृष॑पाण॒योऽश्वा॒ रथे॑भिः स॒ह वा॒जय॑न्तः⁠। अ॒व॒क्राम॑न्तः॒ प्रप॑दैर॒मित्रा᳚न् ख्‍षि॒णन्ति॒ शत्रू॒ꣳ॒रन॑पव्ययन्तः⁠॥ र॒थ॒वाह॑नꣳ ह॒विर॑स्य॒ नाम॒ यत्राऽऽ*यु॑ध॒न्निहि॑तमस्य॒ वर्म॑⁠। तत्रा॒ रथ॒मुप॑ श॒ग्मꣳ स॑देम वि॒श्वाहा॑ व॒यꣳ सु॑मन॒स्यमा॑नाः⁠॥ स्वा॒दु॒ष॒ꣳ॒सदः॑ पि॒तरो॑ वयो॒धाः कृ॑च्छ्रे॒श्रितः॒ शक्ती॑वन्तो गभी॒राः⁠। चि॒त्रसे॑ना॒ इषु॑बला॒ अमृ॑ध्राः स॒तोवी॑रा उ॒रवो᳚ व्रातसा॒हाः⁠॥ ब्राह्म॑णासः॒ [२९] पित॑रः॒ सोम्या॑सः शि॒वे नो॒ द्यावा॑पृथि॒वी अ॑ने॒हसा᳚⁠। पू॒षा नः॑ पातु दुरि॒तादृ॑तावृधो॒ रख्‍षा॒ माकि॑र् नो अ॒घश॑ꣳस ईशत⁠॥ सु॒प॒र्णव्ँव॑स्ते मृ॒गो अ॑स्या॒ दन्तो॒ गोभिः॒ सन्न॑द्धा पतति॒ प्रसू॑ता⁠। यत्रा॒ नरः॒ सञ्च॒ वि च॒ द्रव॑न्ति॒ तत्रा॒स्मभ्य॒मिष॑वः॒ शर्म॑ यꣳसन्न्⁠॥ ऋजी॑ते॒ परि॑ वृङ्ग्धि॒ नोऽश्मा॑ भवतु नस्त॒नूः⁠। सोमो॒ अधि॑ ब्रवीतु॒ नोऽदि॑तिः॒ [३०] शर्म॑ यच्छतु⁠॥ आ ज॑ङ्घन्ति॒ सान्वे॑षाञ्ज॒घना॒ꣳ॒ उप॑ जिघ्नते⁠। अश्वा॑जनि॒ प्रचे॑त॒सोऽश्वा᳚न्थ् स॒मथ्सु॑ चोदय⁠॥ अहि॑रिव भो॒गैः पर्ये॑ति बा॒हुञ्ज्याया॑ हे॒तिम्प॑रि॒बाध॑मानः⁠। ह॒स्त॒घ्नो विश्वा॑ व॒युना॑नि वि॒द्वान् पुमा॒न् पुमा॑ꣳस॒म्परि॑ पातु वि॒श्वतः॑⁠॥ वन॑स्पते वी॒ड्व॑ङ्गो॒ हि भू॒या अ॒स्मथ्स॑खा प्र॒तर॑णः सु॒वीरः॑⁠। गोभिः॒ सन्न॑द्धो असि वी॒डय॑स्वाऽऽस्था॒ता ते॑ जयतु॒ जेत्वा॑नि⁠॥ दि॒वः पृ॑थि॒व्याः पर्यो [३१] ज॒ उद्भृ॑त॒व्ँवन॒स्पति॑भ्यः॒ पर्याभृ॑त॒ꣳ॒ सहः॑⁠। अ॒पामो॒ज्मान॒म्परि॒ गोभि॒रावृ॑त॒मिन्द्र॑स्य॒ वज्र॑ꣳ ह॒विषा॒ रथ॑य्ँयज⁠॥ इन्द्र॑स्य॒ वज्रो॑ म॒रुता॒मनी॑कम्मि॒त्रस्य॒ गर्भो॒ वरु॑णस्य॒ नाभिः॑⁠। सेमान्नो॑ ह॒व्यदा॑तिञ्जुषा॒णो देव॑ रथ॒ प्रति॑ ह॒व्या गृ॑भाय⁠॥ उप॑ श्वासय पृथि॒वीमु॒त द्याम्पु॑रु॒त्रा ते॑ मनुता॒व्ँविष्ठि॑त॒ञ्जग॑त्⁠। स दु॑न्दुभे स॒जूरिन्द्रे॑ण दे॒वैर् दू॒रा [३२] द्दवी॑यो॒ अप॑ सेध॒ शत्रू॑न्⁠॥ आ क्र॑न्दय॒ बल॒मोजो॑ न॒ आ धा॒ निष्ट॑निहि दुरि॒ता बाध॑मानः⁠। अप॑ प्रोथ दुन्दुभे दु॒च्छुना॑ꣳ इ॒त इन्द्र॑स्य मु॒ष्टिर॑सि वी॒डय॑स्व⁠॥ आऽमूर॑ज प्र॒त्याव॑र्तये॒माः के॑तु॒मद् दु॑न्दु॒भिर् वा॑वदीति⁠। समश्व॑पर्णा॒श्चर॑न्ति नो॒ नरो॒ऽस्माक॑मिन्द्र र॒थिनो॑ जयन्तु⁠ [३३] (धन्व॑न् महि॒मानं॒ ब्राह्म॑णा॒सो ऽदि॑तिः पृथि॒व्याः परि॑ दू॒रा॒ देक॑चत्वारिꣳशच्च) ॥६॥
यदक्र॑न्दः प्रथ॒मञ्जाय॑मान उ॒द्यन्थ् स॑मु॒द्रादु॒त वा॒ पुरी॑षात्⁠। श्ये॒नस्य॑ प॒ख्‍षा ह॑रि॒णस्य॑ बा॒हू उ॑प॒स्तुत्य॒म्महि॑ जा॒तन्ते॑ अर्वन्न्⁠॥ य॒मेन॑ द॒त्तन्त्रि॒त ए॑नमायुन॒गिन्द्र॑ एणम्प्रथ॒मो अद्ध्य॑तिष्ठत्⁠। ग॒न्ध॒र्वो अ॑स्य रश॒नाम॑गृभ्णा॒थ् सूरा॒दश्व॑व्ँवसवो॒ निर॑तष्ट⁠॥ असि॑ य॒मो अस्या॑दि॒त्यो अ॑र्व॒न्नसि॑ त्रि॒तो गुह्ये॑न व्र॒तेन॑⁠। असि॒ सोमे॑न स॒मया॒ विपृ॑क्त [३४] आ॒हुस्ते॒ त्रीणि॑ दि॒वि बन्ध॑नानि⁠॥ त्रीणि॑ त आहुर् दि॒वि बन्ध॑नानि॒ त्रीण्य॒फ्सु त्रीण्य॒न्तः स॑मु॒द्रे⁠। उ॒तेव॑ मे॒ वरु॑ण श्छन्थ्स्यर्व॒न्॒‌यत्रा॑ त आ॒हुः प॑र॒मञ्ज॒नित्र᳚म्⁠॥ इ॒मा ते॑ वाजिन्नव॒मार्ज॑नानी॒मा श॒फाना॑ꣳ सनि॒तुर् नि॒धाना᳚⁠। अत्रा॑ ते भ॒द्रा र॑श॒ना अ॑पश्यमृ॒तस्य॒ या अ॑भि॒रख्‍ष॑न्ति गो॒पाः⁠॥ आ॒त्मान॑न्ते॒ मन॑सा॒ऽऽराद॑जानाम॒वो दि॒वा [३५] प॒तय॑न्तम्पत॒ङ्गम्⁠। शिरो॑ अपश्यम्प॒थिभिः॑ सु॒गेभि॑ररे॒णुभि॒र् जेह॑मानम्पत॒त्रि⁠॥ अत्रा॑ ते रू॒पमु॑त्त॒मम॑पश्य॒ञ्जिगी॑षमाणमि॒ष आ प॒दे गोः⁠। य॒दा ते॒ मर्तो॒ अनु॒ भोग॒मान॒डादिद् ग्रसि॑ष्ठ॒ ओष॑धीरजीगः⁠॥ अनु॑ त्वा॒ रथो॒ अनु॒ मर्यो॑ अर्व॒न्ननु॒ गावोऽनु॒ भगः॑ क॒नीना᳚म्⁠। अनु॒ व्राता॑स॒स्तव॑ स॒ख्यमी॑यु॒रनु॑ दे॒वा म॑मिरे वी॒र्यं॑ [३६] ते⁠॥ हिर॑ण्यशृ॒ङ्गोऽयो॑ अस्य॒ पादा॒ मनो॑जवा॒ अव॑र॒ इन्द्र॑ आसीत्⁠। दे॒वा इद॑स्य हवि॒रद्य॑माय॒न्॒‌यो अर्व॑न्तम्प्रथ॒मो अ॒द्ध्यति॑ष्ठत्⁠॥ ई॒र्मान्ता॑सः॒ सिलि॑कमद्ध्यमासः॒ सꣳ शूर॑णासो दि॒व्यासो॒ अत्याः᳚⁠। ह॒ꣳ॒सा इ॑व श्रेणि॒शो य॑तन्ते॒ यदाख्‍षि॑षुर् दि॒व्यमज्म॒मश्वाः᳚⁠॥ तव॒ शरी॑रम्पतयि॒ष्ण्व॑र्व॒न् तव॑ चि॒त्तव्ँवात॑ इव॒ ध्रजी॑मान्⁠। तव॒ शृङ्गा॑णि॒ विष्ठि॑ता पुरु॒त्राऽर॑ण्येषु॒ जर्भु॑राणा चरन्ति⁠॥ उप॒ [३७] प्रागा॒च्छस॑नव्ँवा॒ज्यर्वा॑ देव॒द्रीचा॒ मन॑सा॒ दीद्ध्या॑नः⁠। अ॒जः पु॒रो नी॑यते॒ नाभि॑र॒स्यानु॑ प॒श्चात् क॒वयो॑ यन्ति रे॒भाः⁠॥ उप॒ प्रागा᳚त् पर॒मय्ँयथ् स॒धस्थ॒मर्वा॒ꣳ॒ अच्छा॑ पि॒तर॑म्मा॒तर॑ञ्च⁠। अ॒द्या दे॒वान् जुष्ट॑तमो॒ हि ग॒म्या अथाऽऽशा᳚स्ते दा॒शुषे॒ वार्या॑णि⁠ [३८] (विपृ॑क्तो दि॒वा वी॒र्य॑ मुपै का॒न्नच॑त्वारि॒ꣳ॒शच्च॑) ॥७॥
मा नो॑ मि॒त्रो वरु॑णो अर्य॒माऽऽयुरिन्द्र॑ ऋभु॒ख्‍षा म॒रुतः॒ परि॑ ख्यन्न्⁠। यद्वा॒जिनो॑ दे॒वजा॑तस्य॒ सप्तेः᳚ प्रव॒ख्‍ष्यामो॑ वि॒दथे॑ वी॒र्या॑णि⁠॥ यन्नि॒र्णिजा॒ रेक्ण॑सा॒ प्रावृ॑तस्य रा॒तिङ्गृ॑भी॒ताम्मु॑ख॒तो नय॑न्ति⁠। सुप्रा॑ङ॒जो मेम्य॑द् वि॒श्वरू॑प इन्द्रापू॒ष्णोः प्रि॒यमप्ये॑ति॒ पाथः॑⁠॥ ए॒ष च्छागः॑ पु॒रो अश्वे॑न वा॒जिना॑ पू॒ष्णो भा॒गो नी॑यते वि॒श्वदे᳚व्यः⁠। अ॒भि॒प्रिय॒य्ँयत् पु॑रो॒डाश॒मर्व॑ता॒ त्वष्टे [३९] दे॑नꣳ सौश्रव॒साय॑ जिन्वति⁠॥ यद्ध॒विष्य॑मृतु॒शो दे॑व॒यान॒न्त्रिर् मानु॑षाः॒ पर्यश्व॒न्नय॑न्ति⁠। अत्रा॑ पू॒ष्णः प्र॑थ॒मो भा॒ग ए॑ति य॒ज्ञन्दे॒वेभ्यः॑ प्रतिवे॒दय॑न्न॒जः⁠॥ होता᳚ऽद्ध्व॒र्युराव॑या अग्निमि॒न्धो ग्रा॑वग्रा॒भ उ॒त शꣴस्ता॒ सुवि॑प्रः⁠। तेन॑ य॒ज्ञेन॒ स्व॑रंकृतेन॒ स्वि॑ष्टेन व॒ख्‍षणा॒ आ पृ॑णद्ध्वम्⁠॥ यू॒प॒व्र॒स्का उ॒त ये यू॑पवा॒हाश्च॒षाल॒य्ँये अ॑श्वयू॒पाय॒ तख्‍ष॑ति⁠। ये चार्व॑ते॒ पच॑नꣳ सं॒भर॑न्त्यु॒तो [४०] तेषा॑म॒भिगू᳚र्तिर् न इन्वतु⁠॥ उप॒ प्रागा᳚थ् सु॒मन्मे॑ऽधायि॒ मन्म॑ दे॒वाना॒माशा॒ उप॑ वी॒तपृ॑ष्ठः⁠। अन्वे॑न॒व्ँविप्रा॒ ऋष॑यो मदन्ति दे॒वाना᳚म्पु॒ष्टे च॑कृमा सु॒बन्धु᳚म्⁠॥ यद्वा॒जिनो॒ दाम॑ स॒न्दा॒मर्व॑तो॒ या शी॑र्‌ष॒ण्या॑ रश॒ना रज्जु॑रस्य⁠। यद्वा॑ घास्य॒ प्रभृ॑तमा॒स्ये॑ तृण॒ꣳ॒ सर्वा॒ ता ते॒ अपि॑ दे॒वेष्व॑स्तु⁠॥ यदश्व॑स्य क्र॒विषो॒ [४१] मख्‍षि॒काऽऽश॒ यद्वा॒ स्वरौ॒ स्वधि॑तौ रि॒प्तमस्ति॑⁠। यद्धस्त॑योः शमि॒तुर् यन्न॒खेषु॒ सर्वा॒ ता ते॒ अपि॑ दे॒वेष्व॑स्तु⁠॥ यदूव॑द्ध्यमु॒दर॑स्याप॒वाति॒ य आ॒मस्य॑ क्र॒विषो॑ ग॒न्धो अस्ति॑⁠। सु॒कृ॒ता तच्छ॑मि॒तारः॑ कृण्वन्तू॒त मेध॑ꣳ शृत॒पाक॑म्पचन्तु⁠॥ यत् ते॒ गात्रा॑द॒ग्निना॑ प॒च्यमा॑नाद॒भि शूल॒न्निह॑तस्याव॒धाव॑ति⁠। मा तद्भूम्या॒मा श्रि॑ष॒ न्मा तृणे॑षु दे॒वेभ्य॒स्तदु॒शद्भ्यो॑ रा॒तम॑स्तु⁠ [४२] (इ दु॒तो क्र॒विषः॑ श्रिषथ् स॒प्त च॑) ॥८॥
ये वा॒जिन॑म्परि॒पश्य॑न्ति प॒क्वय्ँय ई॑मा॒हुः सु॑र॒भिर् निर् ह॒रेति॑⁠। ये चार्व॑तो माꣳसभि॒ख्‍षामु॒पास॑त उ॒तो तेषा॑म॒भिगू᳚र्तिर् न इन्वतु⁠॥ यन्नीख्‍ष॑णम्मा॒ꣴ॒स्पच॑न्या उ॒खाया॒ या पात्रा॑णि यू॒ष्ण आ॒सेच॑नानि⁠। ऊ॒ष्म॒ण्या॑ऽपि॒धाना॑ चरू॒णाम॒ङ्काः सू॒नाः परि॑ भूष॒न्त्यश्व᳚म्⁠॥ नि॒क्रम॑णन्नि॒षद॑नव्ँवि॒वर्त॑न॒य्ँयच्च॒ पड्बी॑श॒मर्व॑तः⁠। यच्च॑ प॒पौ यच्च॑ घा॒सिं [४३] ज॒घास॒ सर्वा॒ ता ते॒ अपि॑ दे॒वेष्व॑स्तु⁠॥ मा त्वा॒ऽग्निर् ध्व॑नयिद्धू॒मग॑न्धि॒र् मोखा भ्राज॑न्त्य॒भि वि॑क्त॒ जघ्रिः॑⁠। इ॒ष्टव्ँवी॒तम॒भिगू᳚र्त॒व्ँवष॑ट्कृत॒न्तन्दे॒वासः॒ प्रति॑ गृभ्ण॒न्त्यश्व᳚म्⁠॥ यदश्वा॑य॒ वास॑ उपस्तृ॒णन्त्य॑धीवा॒सय्ँया हिर॑ण्यान्यस्मै⁠। स॒न्दान॒मर्व॑न्त॒म्पड्बी॑शम्प्रि॒या दे॒वेष्वा या॑मयन्ति⁠॥ यत् ते॑ सा॒दे मह॑सा॒ शूकृ॑तस्य॒ पार्ष्णि॑या वा॒ कश॑या [४४] वा तु॒तोद॑⁠। स्रु॒चेव॒ ता ह॒विषो॑ अद्ध्व॒रेषु॒ सर्वा॒ ता ते॒ ब्रह्म॑णा सूदयामि⁠॥ चतु॑स्त्रिꣳशद्वा॒जिनो॑ दे॒वब॑न्धो॒र् वङ्क्री॒रश्व॑स्य॒ स्वधि॑तिः॒ समे॑ति⁠। अच्छि॑द्रा॒ गात्रा॑ व॒युना॑ कृणोत॒ परु॑ष्परुरनु॒घुष्या॒ वि श॑स्त⁠॥ एक॒स्त्वष्टु॒रश्व॑स्या विश॒स्ता द्वा य॒न्तारा॑ भवत॒स्तथ॒र्तुः⁠। या ते॒ गात्रा॑णामृतु॒था कृ॒णोमि॒ ताता॒ पिण्डा॑ना॒म्प्र जु॑होम्य॒ग्नौ⁠॥ मा त्वा॑ तपत् [४५] प्रि॒य आ॒त्माऽपि॒यन्त॒म्मा स्वधि॑तिस्त॒नुव॒ आ ति॑ष्ठिपत् ते⁠। मा ते॑ गृ॒ध्नुर॑विश॒स्ताऽति॒हाय॑ छि॒द्रा गात्रा᳚ण्य॒सिना॒ मिथू॑ कः⁠॥ न वा उ॑वे॒तन्म्रि॑यसे॒ न रि॑ष्यसि दे॒वाꣳ इदे॑षि प॒थिभिः॑ सु॒गेभिः॑⁠। हरी॑ ते॒ युञ्जा॒ पृष॑ती अभूता॒मुपा᳚स्थाद्वा॒जी धु॒रि रास॑भस्य⁠॥ सु॒गव्य॑न्नो वा॒जी स्वश्वि॑यम्पु॒ꣳ॒सः पु॒त्राꣳ उ॒त वि॑श्वा॒पुष॑ꣳ र॒यिं⁠। अ॒ना॒गा॒स्त्वन्नो॒ अदि॑तिः कृणोतु ख्‍ष॒त्रन्नो॒ अश्वो॑ वनताꣳ ह॒विष्मा॑न्⁠ [४६] (घा॒सिं कश॑या तपद् र॒यिं नव॑ च) ॥९॥
(अश्म॒न् य इ॒मो दे॑न मा॒शुः प्राचीं᳚ जी॒मूत॑स्य॒ यदक्र॑न्दो॒ मा नो॑ मि॒त्रो ये वा॒जिनं॒ नव॑)
(अश्म॑न् मनो॒युजं॒ प्राची॒मनु॒ शर्म॑ यच्छतु॒ तेषा॑म॒भिगू᳚र्तिः॒ षट्च॑त्वारिꣳशत्)
(अश्म॑न् ह॒विष्मा॑न्)
अनुवाकाः पञ्चशती
९ ४६