रुद्र सूक्तं

रुद्रसूक्तम्

ओं नमः परमात्मने, श्री महागणपतये नमः,

श्री गुरुभ्यो नमः⁠। ह॒रिः॒ ओं⁠॥

ॐ
तै.सं.४.५.१०.४
परि॑ णो रु॒द्रस्य॑ हे॒तिर् वृ॑णक्तु॒ परि॑ त्वे॒षस्य॑ दुर्म॒तिर॑घा॒योः⁠। अव॑स्थि॒रा म॒घव॑द्भ्यस्तनुष्व॒ मीढ्व॑स्तो॒काय॒ तन॑याय मृडय⁠।
तै.सं.४.५.१०.३
स्तु॒हि श्रु॒तं ग॑र्त्त॒सद॒य्ँयुवा॑नं मृ॒गं न भी॒ममु॑पह॒त्नुमु॒ग्रं⁠। मृ॒डा ज॑रि॒त्रे रु॑द्र॒ स्तवा॑नो अ॒न्यन्ते॑ अ॒स्मन्निव॑पन्तु॒ सेनाः᳚⁠॥
तै.सं.४.५.१०.४
मीढु॑ष्टम॒ शिव॑तम शि॒वो नः॑ सु॒मना॑ भव⁠। प॒र॒मे वृ॒ख्‍ष आयु॑धं नि॒धाय॒ कृत्ति॒व्ँवसा॑न॒ आच॑र॒ पिना॑कं॒ बिभ्र॒दाग॑हि⁠॥
तै.आ.७.५.७
अर्‌ह॑न् बिभर्‌षि॒ साय॑कानि॒ धन्व॑⁠। अर्‌ह॑न्नि॒ष्कय्ँय॑ज॒तव्ँवि॒श्वरू॑पं⁠। अर्‌ह॑न्नि॒दं द॑यसे॒ विश्व॒मब्भु॑वं⁠। न वा ओजी॑यो रुद्र॒ त्वद॑स्ति⁠॥ ४ (अर्‌ह॑न् बिभर्‌षि॒ साय॑कानि॒ धन्वार्‌ह॑न्नि॒ष्कय्ँय॑ज॒तव्ँवि॒श्वरू॑पं⁠। अर्‌ह॑न्नि॒दं द॑यसे॒ विश्व॒मब्भु॑वं॒ न वा ओजी॑यो रुद्र॒ त्वद॑स्ति⁠। )
तै.सं.१.३.१४.१
त्वम॑ग्ने रु॒द्रो असु॑रो म॒हो दि॒वस्त्वꣳ शर्द्धो॒ मारु॑तं पृ॒ख्‍ष ई॑शिषे⁠। त्वव्ँवातै॑ररु॒णैर् या॑सि शंग॒यस्त्वं पू॒षा वि॑ध॒तः पा॑सि॒ नु त्मना᳚⁠॥
तै.सं.१.३.१४.१
आ वो॒ राजा॑नमद्ध्व॒रस्य॑ रु॒द्रꣳ होता॑रꣳ सत्य॒यज॒ꣳ॒ रोद॑स्योः⁠। अ॒ग्निं पु॒रा त॑नयि॒त्नोर॒चित्ता॒द्धिर॑ण्यरूप॒मव॑से कृणुद्ध्वं⁠॥

॥ ओं शान्तिः॒ शान्तिः॒ शान्तिः॑ ॥

Sections१
Mantras१
Version5.0