शान्ति पञ्चकं

शान्तिपञ्चकम्

ओं नमः परमात्मने, श्री महागणपतये नमः,

श्री गुरुभ्यो नमः⁠। ह॒रिः॒ ओं⁠॥

ॐ
तै.आ.५.१.१
ओं शन्नो॑ मि॒त्रः शव्ँवरु॑णः⁠। शन्नो॑ भवत्वर्य॒मा⁠। शन्न॒ इन्द्रो॒ बृह॒स्पतिः॑⁠। शन्नो॒ विष्णु॑रुरुक्र॒मः⁠। नमो॒ ब्रह्म॑णे⁠। नम॑स्ते वायो⁠। त्वमे॒व प्र॒त्यख्‍षं॒ ब्रह्मा॑सि⁠। त्वमे॒व प्र॒त्यख्‍षं॒ ब्रह्म॑ वदिष्यामि⁠। ऋ॒तव्ँव॑दिष्यामि⁠। स॒त्यव्ँव॑दिष्यामि⁠। तन्माम॑वतु⁠। तद्व॒क्तार॑मवतु⁠। अव॑तु॒ मां⁠। अव॑तु व॒क्तारं᳚⁠॥ १ ओं शान्तिः॒ शान्तिः॒ शान्तिः॑⁠॥
तै.आ.५.१२.१
ओं शन्नो॑ मि॒त्रः शव्ँवरु॑णः⁠। शन्नो॑ भवत्वर्य॒मा⁠। शन्न॒ इन्द्रो॒ बृह॒स्पतिः॑⁠। शन्नो॒ विष्णु॑रुरुक्र॒मः⁠। नमो॒ ब्रह्म॑णे⁠। नम॑स्ते वायो⁠। त्वमे॒व प्र॒त्यख्‍षं॒ ब्रह्मा॑सि⁠। त्वामे॒व प्र॒त्यख्‍षं॒ ब्रह्मावा॑दिषं⁠। ऋ॒तम॑वादिषं⁠। स॒त्यम॑वादिषं⁠। तन्मामा॑वीत्⁠। तद्व॒क्तार॑मावीत्⁠। आवी॒न्मां⁠। आवी᳚द्व॒क्तारं᳚⁠॥ २ ओं शान्तिः॒ शान्तिः॒ शान्तिः॑⁠॥
तै.आ.५.१३.१
ओं स॒ह ना॑ववतु⁠। स॒ह नौ॑ भुनक्तु⁠। स॒ह वी॒र्यं॑ करवावहै⁠। ते॒ज॒स्विना॒वधी॑तमस्तु॒ मा वि॑द्विषा॒वहै᳚⁠॥ ३ ओं शान्तिः॒ शान्तिः॒ शान्तिः॑⁠॥
तै.आ.७.१.१
नमो॑ वा॒चे या चो॑दि॒ता या चानु॑दिता॒ तस्यै॑ वा॒चे नमो॒ नमो॑ वा॒चे नमो॑ वा॒चस्पत॑ये॒ नम॒ ऋषि॑भ्यो मन्त्र॒कृद्भ्यो॒ मन्त्र॑पतिभ्यो॒ मा मामृष॑यो मन्त्र॒कृतो॑ मन्त्र॒पत॑यः॒ परा॑दु॒र् माऽहमृषी᳚न् मन्त्र॒कृतो॑ मन्त्र॒पती॒न् परा॑दाव्ँवैश्वदे॒वीव्ँवाच॑मुद्यासꣳ शि॒वा मद॑स्ता॒ञ्जुष्टां᳚ दे॒वेभ्यः॒ शर्म॑ मे॒ द्यौः शर्म॑ पृथि॒वी शर्म॒ विश्व॑मि॒दं जग॑त्⁠। शर्म॑ च॒न्द्रश्च॒ सूर्य॑श्च॒ शर्म॑ ब्रह्म प्रजाप॒ती⁠॥ भू॒तव्ँव॑दिष्ये॒ भुव॑नव्ँवदिष्ये॒ तेजो॑ वदिष्ये॒ यशो॑ वदिष्ये॒ तपो॑ वदिष्ये॒ ब्रह्म॑ वदिष्ये स॒त्यव्ँव॑दिष्ये॒ तस्मा॑ अ॒हमि॒दमु॑प॒स्तर॑ण॒मुप॑स्तृण उप॒स्तर॑णं मे प्र॒जायै॑ पशू॒नां भू॑यादुप॒स्तर॑णम॒हं प्र॒जायै॑ पशू॒नां भू॑यासं॒ प्राणा॑पानौ मृ॒त्योर् मा॑ पातं॒ प्राणा॑पानौ॒ मा मा॑ हासिष्टं॒ मधु॑ मनिष्ये॒ मधु॑ जनिष्ये॒ मधु॑ वख्‍ष्यामि॒ मधु॑ वदिष्यामि॒ मधु॑मतीं दे॒वेभ्यो॒ वाच॑मुद्यासꣳ शुश्रू॒षेण्यां᳚ मनु॒ष्ये᳚भ्य॒स्तं मा॑ दे॒वा अ॑वन्तु शो॒भायै॑ पि॒तरो ऽनु॑मदन्तु⁠॥ ४ ओं शान्तिः॒ शान्तिः॒ शान्तिः॑⁠॥
तै.ब्रा.३.५.११.१
ओं तच्छ॒य्ँयोरावृ॑णीमहे⁠। गा॒तुय्ँय॒ज्ञाय॑⁠। गा॒तुय्ँय॒ज्ञप॑तये⁠। दैवी᳚ स्व॒स्तिर॑स्तु नः⁠। स्व॒स्तिर् मानु॑षेभ्यः⁠। ऊ॒र्द्ध्वं जि॑गातु भेष॒जं⁠। शन्नो॑ अस्तु द्वि॒पदे᳚⁠। शं चतु॑ष्पदे⁠॥

॥ ओं शान्तिः॒ शान्तिः॒ शान्तिः॑ ॥

Sections१
Mantras१
Version5.0