कृष्ण यजुर्वेदीय तैत्तिरीय संहिता
प्रथमकाण्डे षष्ठः प्रश्नः

कांड १ प्रश्न ६
याजमानकाण्डं

ओं नमः परमात्मने, श्री महागणपतये नमः

श्री गुरुभ्यो नमः, ह॒रिः॒ ओं

ॐ
सन्त्वा॑ सिञ्चामि॒ यजु॑षा प्र॒जामायु॒र्द्धन॑ञ्च⁠। बृह॒स्पति॑प्रसूतो॒ यज॑मान इ॒ह मा रि॑षत्⁠॥ आज्य॑मसि स॒त्यम॑सि स॒त्यस्याद्ध्य॑ख्‍षमसि ह॒विर॑सि वैश्वान॒रव्ँवै᳚श्वदे॒वमुत्पू॑तशुष्मꣳ स॒त्यौजाः॒ सहो॑ऽसि॒ सह॑मानमसि॒ सह॒स्वारा॑तीः॒ सह॑स्वारातीय॒तः सह॑स्व॒ पृत॑नाः॒ सह॑स्व पृतन्य॒तः⁠। स॒हस्र॑वीर्यमसि॒ तन्मा॑ जि॒न्वाज्य॒स्याज्य॑मसि स॒त्यस्य॑ स॒त्यम॑सि स॒त्यायु॑ [१] रसि स॒त्यशु॑ष्ममसि स॒त्येन॑ त्वा॒ऽभि घा॑रयामि॒ तस्य॑ ते भख्‍षीय पञ्चा॒नान्त्वा॒ वाता॑नाय्ँय॒न्त्राय॑ ध॒र्त्राय॑ गृह्णामि पञ्चा॒नान्त्व॑र्तू॒नाय्ँय॒न्त्राय॑ ध॒र्त्राय॑ गृह्णामि पञ्चा॒नान्त्वा॑ दि॒शाय्ँय॒न्त्राय॑ ध॒र्त्राय॑ गृह्णामि पञ्चा॒नान्त्वा॑ पञ्चज॒नाना᳚य्ँय॒न्त्राय॑ ध॒र्त्राय॑ गृह्णामि च॒रोस्त्वा॒ पञ्च॑बिलस्य य॒न्त्राय॑ ध॒र्त्राय॑ गृह्णामि॒ ब्रह्म॑णस्त्वा॒ तेज॑से य॒न्त्राय॑ ध॒र्त्राय॑ गृह्णामि ख्‍ष॒त्रस्य॒ त्वौज॑से य॒न्त्राय॑ [२] ध॒र्त्राय॑ गृह्णामि वि॒शे त्वा॑ य॒न्त्राय॑ ध॒र्त्राय॑ गृह्णामि सु॒वीर्या॑य त्वा गृह्णामि सुप्रजा॒स्त्वाय॑ त्वा गृह्णामि रा॒यस्पोषा॑य त्वा गृह्णामि ब्रह्मवर्च॒साय॑ त्वा गृह्णामि॒ भूर॒स्माक॑ꣳ ह॒विर्दे॒वाना॑मा॒शिषो॒ यज॑मानस्य दे॒वाना᳚न्त्वा दे॒वता᳚भ्यो गृह्णामि॒ कामा॑य त्वा गृह्णामि⁠ [३] (स॒त्यायु॒रोज॑से य॒न्त्राय॒त्रय॑स्त्रिꣳशच्च) ॥१॥
ध्रु॒वो॑ऽसि ध्रु॒वो॑ऽहꣳ स॑जा॒तेषु॑ भूयास॒न्धीर॒श्चेत्ता॑ वसु॒विदु॒ग्रो᳚ऽस्यु॒ग्रो॑ऽहꣳ स॑जा॒तेषु॑ भूयासमु॒ग्रश्चेत्ता॑ वसु॒विद॑भि॒भूर॑स्यभि॒भूर॒हꣳ स॑जा॒तेषु॑ भूयासमभि॒भूश्चेत्ता॑ वसु॒विद् यु॒नज्मि॑ त्वा॒ ब्रह्म॑णा॒ दैव्ये॑न ह॒व्याया॒स्मै वोढ॒वे जा॑तवेदः⁠॥ इन्धा॑नास्त्वा सुप्र॒जसः॑ सु॒वीरा॒ ज्योग्जी॑वेम बलि॒हृतो॑ व॒यन्ते᳚⁠॥ यन्मे॑ अग्ने अ॒स्य य॒ज्ञस्य॒ रिष्या॒ [४] द् यद्वा॒ स्कन्दा॒दाज्य॑स्यो॒त वि॑ष्णो⁠। तेन॑ हन्मि स॒पत्न॑न्दुर्मरा॒युमैन॑न्दधामि॒ निर्‌ऋ॑त्या उ॒पस्थे᳚⁠। भूर् भुवः॒ सुव॒रुच्छु॑ष्मो अग्ने॒ यज॑मानायैधि॒ निशु॑ष्मो अभि॒दास॑ते⁠। अग्ने॒ देवे᳚द्ध॒ मन्वि॑द्ध॒ मन्द्र॑जि॒ह्वाम॑र्त्यस्य ते होतर्मू॒र्द्धन्ना जि॑घर्मि रा॒यस्पोषा॑य सुप्रजा॒स्त्वाय॑ सु॒वीर्या॑य॒ मनो॑ऽसि प्राजाप॒त्यम्मन॑सा मा भू॒तेना *वि॑श॒ वाग॑स्यै॒न्द्री स॑पत्न॒ख्‍षय॑णी [५] वा॒चा मे᳚न्द्रि॒येणा *वि॑श वस॒न्तमृ॑तू॒नाम्प्री॑णामि॒ स मा᳚ प्री॒तः प्री॑णातु ग्री॒ष्ममृ॑तू॒नाम्प्री॑णामि॒ स मा᳚ प्री॒तः प्री॑णातु व॒र्॒‌षा ऋ॑तू॒नाम्प्री॑णामि॒ ता मा᳚ प्री॒ताः प्री॑णन्तु श॒रद॑मृतू॒नाम्प्री॑णामि॒ सा मा᳚ प्री॒ता प्री॑णातु हेमन्तशिशि॒रावृ॑तू॒नाम्प्री॑णामि॒ तौ मा᳚ प्री॒तौ प्री॑णीताम॒ग्नीषोम॑योर॒हं दे॑वय॒ज्यया॒ चख्‍षु॑ष्मान् भूयासम॒ग्नेर॒हन्दे॑वय॒ज्यया᳚ऽन्ना॒दो भू॑यासं॒ [६] दब्धि॑र॒स्यद॑ब्धो भूयासम॒मुन्द॑भेयम॒ग्नीषोम॑योर॒हन्दे॑वय॒ज्यया॑ वृत्र॒हा भू॑यासमिन्द्राग्नि॒योर॒हन्दे॑वय॒ज्यये᳚न्द्रिया॒व्य॑न्ना॒दो भू॑यास॒मिन्द्र॑स्या॒ऽहन्दे॑वय॒ज्यये᳚न्द्रिया॒वी भू॑यासम्महे॒न्द्रस्या॒ऽहन्दे॑वय॒ज्यया॑ जे॒मान॑म्महि॒मान॑ङ्गमेयम॒ग्नेः स्वि॑ष्ट॒कृतो॒ऽहन्दे॑वय॒ज्ययाऽऽयु॑ष्मान्‌य॒ज्ञेन॑ प्रति॒ष्ठाङ्ग॑मेयम्⁠ [७] (रिष्या᳚थ्सपत्न॒ख्‍षय॑ण्यन्ना॒दो भू॑यास॒ꣳ॒षट्त्रि॑ꣳशच्च) ॥२॥
अ॒ग्निर्मा॒ दुरि॑ष्टात् पातु सवि॒ताऽघश॑ꣳसा॒द्यो मेऽन्ति॑ दू॒रे॑ऽराती॒यति॒ तमे॒तेन॑ जेष॒ꣳ॒ सुरू॑पवर्‌षवर्ण॒ एही॒मान् भ॒द्रान् दुर्या॑ꣳ अ॒भ्येहि॒ मामनु॑व्रता॒ न्यु॑ शी॒र्॒‌षाणि॑ मृढ्व॒मिड॒ एह्यदि॑त॒ एहि॒ सर॑स्व॒त्येहि॒ रन्ति॑रसि॒ रम॑तिरसि सू॒नर्य॑सि॒ जुष्टे॒ जुष्टि॑न्तेऽशी॒योप॑हूत उपह॒वं [८] ते॑ऽशीय॒ सा मे॑ स॒त्याऽऽशीर॒स्य य॒ज्ञस्य॑ भूया॒दरे॑डता॒ मन॑सा॒ तच्छ॑केयय्ँय॒ज्ञो दिव॑ꣳ रोहतु य॒ज्ञो दिव॑ङ्गच्छतु॒ यो दे॑व॒यानः॒ पन्था॒स्तेन॑ य॒ज्ञो दे॒वाꣳ अप्ये᳚त्व॒स्मास्विन्द्र॑ इन्द्रि॒यन्द॑धात्व॒स्मान्राय॑ उ॒त य॒ज्ञाः स॑चन्ताम॒स्मासु॑ सन्त्वा॒शिषः॒ सा नः॑ प्रि॒या सु॒प्रतू᳚र्तिर्म॒घोनी॒ जुष्टि॑रसि जु॒षस्व॑ नो॒ जुष्टा॑ नो [९] ऽसि॒ जुष्टि॑न्ते गमेय॒म्मनो॒ ज्योति॑र् जुषता॒माज्य॒व्ँविच्छि॑न्नय्ँय॒ज्ञꣳ समि॒मन्द॑धातु⁠। बृह॒स्पति॑स्तनुतामि॒मन्नो॒ विश्वे॑ दे॒वा इ॒ह मा॑दयन्ताम्⁠॥ ब्रद्ध्न॒ पिन्व॑स्व॒ दद॑तो मे॒ मा ख्‍षा॑यि कुर्व॒तो मे॒ मोप॑ दसत् प्र॒जाप॑तेर् भा॒गो᳚ऽस्यूर्ज॑स्वा॒न् पय॑स्वान् प्राणापा॒नौ मे॑ पाहि समानव्या॒नौ मे॑ पाह्युदानव्या॒नौ मे॑ पा॒ह्यख्‍षि॑तो॒ऽस्यख्‍षि॑त्यै त्वा॒ मा मे᳚ ख्‍षेष्ठा अ॒मुत्रा॒मुष्मि॑ल्ँलो॒के⁠ [१०] (उ॒प॒ह॒वंजुष्टा॑नस्त्वा॒ षट् च॑) ॥३॥
ब॒र्॒‌हिषो॒ऽहन्दे॑वय॒ज्यया᳚ प्र॒जावा᳚न् भूयास॒न्नरा॒शꣳस॑स्या॒हन्दे॑वय॒ज्यया॑ पशु॒मान् भू॑यासम॒ग्नेः स्वि॑ष्ट॒कृतो॒ऽहन्दे॑वय॒ज्ययाऽऽयु॑ष्मान्‌य॒ज्ञेन॑ प्रति॒ष्ठाङ्ग॑मेयम॒ग्नेर॒हमुज्जि॑ति॒मनूज्जे॑ष॒ꣳ॒ सोम॑स्या॒ह मुज्जि॑ति॒मनूज्जे॑षम॒ग्नेर॒हमुज्जि॑ति॒मनूज्जे॑षम॒ग्नीषोम॑योर॒हमुज्जि॑ति॒मनूज्जे॑षमिन्द्राग्नि॒योर॒हमुज्जि॑ति॒मनूज्जे॑ष॒मिन्द्र॑स्या॒ह [११] मुज्जि॑ति॒मनूज्जे॑षम्महे॒न्द्रस्या॒हमुज्जि॑ति॒ मनूज्जे॑षम॒ग्नेः स्वि॑ष्ट॒कृतो॒ऽह मुज्जि॑ति॒मनूज्जे॑ष॒व्ँवाज॑स्य मा प्रस॒वेनो᳚द् ग्रा॒भेणोद॑ग्रभीत्⁠। अथा॑ स॒पत्ना॒ꣳ॒ इन्द्रो॑ मे निग्रा॒भेणाध॑राꣳ अकः⁠॥ उ॒द्ग्रा॒भञ्च॑ निग्रा॒भञ्च॒ ब्रह्म॑ दे॒वा अ॑वीवृधन्न्⁠। अथा॑ स॒पत्ना॑निन्द्रा॒ग्नी मे॑ विषू॒चीना॒न् व्य॑स्यताम्⁠॥ एमा अ॑ग्मन्ना॒शिषो॒ दोह॑कामा॒ इन्द्र॑वन्तो [१२] वनामहे धुख्‍षी॒महि॑ प्र॒जामिष᳚म्⁠॥ रोहि॑तेन त्वा॒ऽग्निर् दे॒वता᳚ङ्गमयतु॒ हरि॑भ्या॒न्त्वेन्द्रो॑ दे॒वता᳚ङ्गमय॒त्वेत॑शेन त्वा॒ सूर्यो॑ दे॒वता᳚ङ्गमयतु॒ वि ते॑ मुञ्चामि रश॒ना वि र॒श्मीन् वि योक्त्रा॒ यानि॑ परि॒चर्त॑नानि ध॒त्ताद॒स्मासु॒ द्रवि॑ण॒य्ँयच्च॑ भ॒द्रम्प्र णो᳚ ब्रूताद्भाग॒धान् दे॒वता॑सु⁠॥ विष्णोः᳚ श॒य्ँयोर॒हन्दे॑वय॒ज्यया॑ य॒ज्ञेन॑ प्रति॒ष्ठाङ्ग॑मेय॒ꣳ॒ सोम॑स्या॒हं दे॑वय॒ज्यया॑ [१३] सु॒रेता॒ रेतो॑ धिषीय॒ त्वष्टु॑र॒हन्दे॑वय॒ज्यया॑ पशू॒नाꣳ रू॒पम्पु॑षेयन्दे॒वाना॒म्पत्नी॑र॒ग्निर् गृ॒हप॑तिर् य॒ज्ञस्य॑ मिथु॒नन्तयो॑र॒हन्दे॑वय॒ज्यया॑ मिथु॒नेन॒ प्रभू॑यासव्ँवे॒दो॑ऽसि॒ वित्ति॑रसि वि॒देय॒ कर्मा॑ऽसि क॒रुण॑मसि क्रि॒यास॑ꣳ स॒निर॑सि सनि॒ताऽसि॑ स॒नेय॑ङ्घृ॒तव॑न्तङ्कुला॒यिन॑ꣳ रा॒यस्पोष॑ꣳ सह॒स्रिण॑व्ँवे॒दो द॑दातु वा॒जिन᳚म्⁠ [१४] (इन्द्र॑स्या॒हमिन्द्र॑वन्तः॒सोम॑स्या॒हन्दे॑वय॒ज्यया॒चतु॑श्चत्वारिꣳशच्च) ॥४॥
आ प्या॑यतान्ध्रु॒वा घृ॒तेन॑ य॒ज्ञय्ँय॑ज्ञ॒म्प्रति॑ देव॒यद्भ्यः॑⁠। सू॒र्याया॒ ऊधोऽदि॑त्या उ॒पस्थ॑ उ॒रुधा॑रा पृथि॒वी य॒ज्ञे अ॒स्मिन्न्⁠॥ प्र॒जाप॑तेर् वि॒भान्नाम॑ लो॒कस्तस्मि॑ꣴस्त्वा दधामि स॒ह यज॑मानेन॒ सद॑सि॒ सन्मे॑ भूयाः॒ सर्व॑मसि॒ सर्व॑म्मे भूयाः पू॒र्णम॑सि पू॒र्णम्मे॑ भूया॒ अख्‍षि॑तमसि॒ मा मे᳚ ख्‍षेष्ठाः॒ प्राच्या᳚न्दि॒शि दे॒वा ऋ॒त्विजो॑ मार्जयन्ता॒न्दख्‍षि॑णायां [१५] दि॒शि मासाः᳚ पि॒तरो॑ मार्जयन्ताम्प्र॒तीच्या᳚न्दि॒शि गृ॒हाः प॒शवो॑ मार्जयन्ता॒मुदी᳚च्यान्दि॒श्याप॒ ओष॑धयो॒ वन॒स्पत॑यो मार्जयन्तामू॒र्द्ध्वाया᳚न्दि॒शि य॒ज्ञः स॑व्ँवथ्स॒रो य॒ज्ञप॑तिर् मार्जयन्ता॒व्ँविष्णोः॒ क्रमो᳚ऽस्यभिमाति॒हा गा॑य॒त्रेण॒ छन्द॑सा पृथि॒वीमनु॒ वि क्र॑मे॒ निर्भ॑क्तः॒ स यन्द्वि॒ष्मो विष्णोः॒ क्रमो᳚ऽस्यभिशस्ति॒हा त्रैष्टु॑भेन॒ छन्द॑सा॒ऽन्तरि॑ख्‍ष॒मनु॒ वि क्र॑मे॒ निर्भ॑क्तः॒ स यन्द्वि॒ष्मो विष्णोः॒ क्रमो᳚ऽस्यरातीय॒तो ह॒न्ता जाग॑तेन॒ छन्द॑सा॒ दिव॒मनु॒ वि क्र॑मे॒ निर्भ॑क्तः॒ स यन्द्वि॒ष्मो विष्णोः॒ क्रमो॑ऽसि शत्रूय॒तो ह॒न्ताऽऽनु॑ष्टुभेन॒ छन्द॑सा॒ दिशोऽनु॒ वि क्र॑मे॒ निर्भ॑क्तः॒ स यन्द्वि॒ष्मः⁠ [१६] (दख्‍षि॑णाया म॒न्तरि॑ख्‍ष॒मनु॒ वि क्र॑मे॒ निर्भ॑क्तः॒ स यन्द्वि॒ष्मो विष्णो॒ रेका॒न्नत्रि॒ꣳ॒शच्च॑) ॥५॥
अग॑न्म॒ सुवः॒ सुव॑रगन्म स॒न्दृश॑स्ते॒ मा छि॑थ्सि॒ यत्ते॒ तप॒स्तस्मै॑ ते॒ माऽऽवृ॑ख्‍षि सु॒भूर॑सि॒ श्रेष्ठो॑ रश्मी॒नामा॑यु॒र्द्धा अ॒स्यायु॑र्मे धेहि वर्चो॒धा अ॑सि॒ वर्चो॒ मयि॑ धेही॒दम॒हम॒मुम्भ्रातृ॑व्यमा॒भ्यो दि॒ग्भ्यो᳚ऽस्यै दि॒वो᳚ऽस्माद॒न्तरि॑ख्‍षाद॒स्यै पृ॑थि॒व्या अ॒स्माद॒न्नाद्या॒न्निर्भ॑जामि॒ निर्भ॑क्तः॒ स यन्द्वि॒ष्मः⁠ [१७] सञ्ज्योति॑षाऽभूवमै॒न्द्रीमा॒वृत॑म॒न्वाव॑र्ते॒ सम॒हम्प्र॒जया॒ सम्मया᳚ प्र॒जा सम॒हꣳ रा॒यस्पोषे॑ण॒ सम्मया॑ रा॒यस्पोषः॒ समि॑द्धो अग्ने मे दीदिहि समे॒द्धा ते॑ अग्ने दीद्यास॒व्ँवसु॑मान्‌य॒ज्ञो वसी॑यान् भूयास॒मग्न॒ आयू॑ꣳषि पवस॒ आ सु॒वोर्ज॒मिष॑ञ्च नः⁠। आ॒रे बा॑धस्व दु॒च्छुना᳚म्⁠॥ अग्ने॒ पव॑स्व॒ स्वपा॑ अ॒स्मे वर्चः॑ सु॒वीर्य᳚म्⁠ [१८] दध॒त्पोष॑ꣳ र॒यिम्मयि॑⁠। अग्ने॑ गृहपते सुगृहप॒तिर॒हन्त्वया॑ गृ॒हप॑तिना भूयासꣳ सुगृहप॒तिर्मया॒ त्वङ्गृ॒हप॑तिना भूयाः श॒तꣳ हिमा॒स्तामा॒शिष॒मा शा॑से॒ तन्त॑वे॒ ज्योति॑ष्मती॒न्तामा॒शिष॒मा शा॑से॒ऽमुष्मै॒ ज्योति॑ष्मती॒ङ्कस्त्वा॑ युनक्ति॒ स त्वा॒ विमु॑ञ्च॒त्वग्ने᳚ व्रतपते व्र॒तम॑चारिष॒न्तद॑शक॒न्तन्मे॑ऽराधि य॒ज्ञो ब॑भूव॒ स आ [१९] ब॑भूव॒ स प्रज॑ज्ञे॒ स वा॑वृधे⁠। स दे॒वाना॒मधि॑पतिर् बभूव॒ सो अ॒स्माꣳ अधि॑पतीन् करोतु व॒यꣴ स्या॑म॒ पत॑यो रयी॒णाम्⁠॥ गोमा॑ꣳ अ॒ग्नेऽवि॑माꣳ अ॒श्वी य॒ज्ञो नृ॒वथ्स॑खा॒ सद॒मिद॑प्रमृ॒ष्यः⁠। इडा॑वाꣳ ए॒षो अ॑सुर प्र॒जावा᳚न् दी॒र्घो र॒यिः पृ॑थुबु॒द्ध्नः स॒भावा॑न्⁠ [२०] (द्वि॒ष्मःसु॒वीर्य॒ꣳ॒स आपञ्च॑त्रिꣳशच्च) ॥६॥
यथा॒ वै स॑मृतसो॒मा ए॒वव्ँवा ए॒ते स॑मृतय॒ज्ञा यद्द॑र्‌शपूर्णमा॒सौ कस्य॒ वाऽह॑ दे॒वा य॒ज्ञमा॒गच्छ॑न्ति॒ कस्य॑ वा॒ न ब॑हू॒नाय्ँयज॑मानाना॒य्ँयो वै दे॒वताः॒ पूर्वः॑ परिगृ॒ह्णाति॒ स ए॑नाः॒ श्वो भू॒ते य॑जत ए॒तद्वै दे॒वाना॑मा॒यत॑न॒य्ँयदा॑हव॒नीयो᳚ऽन्त॒राऽग्नी प॑शू॒नाङ्गार्‌ह॑पत्यो मनु॒ष्या॑णामन्वाहार्य॒पच॑नः पितृ॒णाम॒ग्निङ्गृ॑ह्णाति॒ स्व ए॒वायत॑ने दे॒वताः॒ परि॑ [२१] गृह्णाति॒ ताः श्वो भू॒ते य॑जते व्र॒तेन॒ वै मेद्ध्यो॒ ऽग्निर् व्र॒तप॑तिर् ब्राह्म॒णो व्र॑त॒भृद्व्र॒तमु॑पै॒ष्यन् ब्रू॑या॒दग्ने᳚ व्रतपते व्र॒तञ्च॑रिष्या॒मीत्य॒ग्निर् वै दे॒वाना᳚व्ँव्र॒तप॑ति॒स्तस्मा॑ ए॒व प्र॑ति॒प्रोच्य॑ व्र॒तमा ल॑भते ब॒र्॒‌हिषा॑ पू॒र्णमा॑से व्र॒तमुपै॑ति व॒थ्सैर॑मावा॒स्या॑यामे॒तद्ध्ये॑तयो॑रा॒यत॑नमुप॒स्तीर्यः॒ पूर्व॑श्चा॒ग्निरप॑र॒श्चेत्या॑हुर् मनु॒ष्या॑ [२२] इन्न्वा उप॑स्तीर्णमि॒च्छन्ति॒ किमु॑ दे॒वा येषा॒न्नवा॑वसान॒मुपा᳚स्मि॒ञ्छ्वो य॒ख्‍ष्यमा॑णे दे॒वता॑ वसन्ति॒ य ए॒वव्ँवि॒द्वान॒ग्निमु॑पस्तृ॒णाति॒ यज॑मानेन ग्रा॒म्याश्च॑ प॒शवो॑ऽव॒रुद्ध्या॑ आर॒ण्याश्चेत्या॑हु॒र् यद् ग्रा॒म्यानु॑प॒वस॑ति॒ तेन॑ ग्रा॒म्यानव॑ रुन्धे॒ यदा॑र॒ण्यस्या॒श्ञाति॒ तेना॑र॒ण्यान् यदना᳚श्वानुप॒वसे᳚त् पितृदेव॒त्यः॑ स्यादार॒ण्यस्या᳚श्ञातीन्द्रि॒य [२३] व्ँवा आ॑र॒ण्यमि॑न्द्रि॒यमे॒वाऽऽत्मन् ध॑त्ते॒ यदना᳚श्वानुप॒वसे॒त् ख्‍षोधु॑कः स्या॒द्यद॑श्ञी॒याद्रु॒द्रो᳚ऽस्य प॒शून॒भि म॑न्येता॒ऽपो᳚ऽश्ञाति॒ तन्नेवा॑शि॒तन्नेवाऽन॑शित॒न्न ख्‍षोधु॑को॒ भव॑ति॒ नास्य॑ रु॒द्रः प॒शून॒भि म॑न्यते॒ वज्रो॒ वै य॒ज्ञः ख्‍षुत् खलु॒ वै म॑नु॒ष्य॑स्य॒ भ्रातृ॑व्यो॒ यदना᳚ऽश्वानुप॒वस॑ति॒ वज्रे॑णै॒व सा॒ख्‍षात् ख्‍षुध॒म्भ्रातृ॑व्यꣳ हन्ति⁠ [२४] (परि॑मनु॒ष्या॑इन्द्रि॒यꣳसा॒ख्‍षात्त्रीणि॑ च) ॥७॥
यो वै श्र॒द्धामना॑रभ्य य॒ज्ञेन॒ यज॑ते॒ नास्ये॒ष्टाय॒ श्रद्द॑धते॒ऽपः प्र ण॑यति श्र॒द्धा वा आपः॑ श्र॒द्धामे॒वाऽऽरभ्य॑ य॒ज्ञेन॑ यजत उ॒भये᳚ऽस्य देवमनु॒ष्या इ॒ष्टाय॒ श्रद्द॑धते॒ तदा॑हु॒रति॒ वा ए॒ता वर्त्र॑न्नेद॒न्त्यति॒ वाच॒म्मनो॒ वावैता नाति॑ नेद॒न्तीति॒ मन॑सा॒ प्र ण॑यती॒यव्ँवै मनो॒ [२५] ऽनयै॒वैनाः॒ प्र ण॑य॒त्यस्क॑न्नहविर् भवति॒ य ए॒वव्ँवेद॑ यज्ञायु॒धानि॒ सम्भ॑रति य॒ज्ञो वै य॑ज्ञायु॒धानि॑ य॒ज्ञमे॒व तथ्सम्भ॑रति॒ यदेक॑मेकꣳ सं॒भरे᳚त्पितृदेव॒त्या॑नि स्यु॒र्यथ् स॒ह सर्वा॑णि मानु॒षाणि॒ द्वेद्वे॒ संभ॑रति याज्यानुवा॒क्य॑योरे॒व रू॒पङ्क॑रो॒त्यथो॑ मिथु॒नमे॒वयो वै दश॑ यज्ञायु॒धानि॒ वेद॑ मुख॒तो᳚ऽस्य य॒ज्ञः क॑ल्पते॒ स्फ्यः [२६] च॑ क॒पाला॑नि चाग्निहोत्र॒हव॑णी च॒ शूर्प॑ञ्च कृष्णाजि॒नञ्च॒ शम्या॑ चो॒लूख॑लञ्च॒ मुस॑लञ्च दृ॒षच्चोप॑ला चै॒तानि॒ वै दश॑ यज्ञायु॒धानि॒ य ए॒वव्ँवेद॑ मुख॒तो᳚ऽस्य य॒ज्ञः क॑ल्पते॒ यो वै दे॒वेभ्यः॑ प्रति॒प्रोच्य॑ य॒ज्ञेन॒ यज॑ते जु॒षन्ते᳚ऽस्य दे॒वा ह॒व्यꣳ ह॒विर् नि॑रु॒प्यमा॑णम॒भि म॑न्त्रयेता॒ऽग्निꣳ होता॑रमि॒ह तꣳ हु॑व॒ इति॑ [२७] दे॒वेभ्य॑ ए॒व प्र॑ति॒प्रोच्य॑ य॒ज्ञेन॑ यजते जु॒षन्ते᳚ऽस्य दे॒वा ह॒व्यमे॒ष वै य॒ज्ञस्य॒ ग्रहो॑ गृही॒त्वैव य॒ज्ञेन॑ यजते॒ तदु॑दि॒त्वा वाच॑य्ँयच्छति य॒ज्ञस्य॒ धृत्या॒ अथो॒ मन॑सा॒ वै प्र॒जाप॑तिर् य॒ज्ञम॑तनुत॒ मन॑सै॒व तद्य॒ज्ञन्त॑नुते॒ रख्‍ष॑सा॒मन॑न्ववचाराय॒ यो वै य॒ज्ञय्ँयोग॒ आग॑ते यु॒नक्ति॑ यु॒ङ्क्ते यु॑ञ्जा॒नेषु॒ कस्त्वा॑ युनक्ति॒ स त्वा॑ युन॒क्त्वि त्या॑ह प्र॒जाप॑ति॒र् वै कः प्र॒जाप॑तिनै॒वैन॑य्ँयुनक्ति यु॒ङ्क्ते यु॑ञ्जा॒नेषु॑⁠ [२८] (वैम॒नःस्फ्यैति॑युन॒क्त्वेका॑दश च) ॥८॥
प्र॒जाप॑तिर् य॒ज्ञान॑सृजताग्निहो॒त्रञ्चा᳚ग्निष्टो॒मञ्च॑ पौर्णमा॒सीञ्चो॒क्थ्य॑ञ्चामावा॒स्या᳚ञ्चातिरा॒त्रं च॒ तानुद॑मिमीत॒ याव॑दग्निहो॒त्रमासी॒त् तावा॑नग्निष्टो॒मो याव॑ती पौर्णमा॒सी तावा॑नु॒क्थ्यो॑ याव॑त्यमावा॒स्या॑ तावा॑नतिरा॒त्रो य ए॒वव्ँवि॒द्वान॑ग्निहो॒त्रञ्जु॒होति॒ याव॑दग्निष्टो॒मेनो॑ पा॒प्नोति॒ ताव॒दुपा᳚ऽऽप्नोति॒ य ए॒वव्ँवि॒द्वान् पौ᳚र्णमा॒सीय्ँयज॑ते॒ याव॑दु॒क्थ्ये॑नोपा॒प्नोति॒ [२९] ताव॒दुपा᳚ऽऽप्नोति॒ य ए॒वव्ँवि॒द्वान॑मावा॒स्या᳚य्ँयज॑ते॒ याव॑दतिरा॒त्रेणो॑पा॒प्नोति॒ ताव॒दुपा᳚ऽऽप्नोति परमे॒ष्ठिनो॒ वा ए॒ष य॒ज्ञोऽग्र॑ आसी॒त् तेन॒ स प॑र॒माङ्काष्ठा॑मगच्छ॒त् तेन॑ प्र॒जाप॑तिन्नि॒रवा॑सायय॒त् तेन॑ प्र॒जाप॑तिः पर॒माङ्काष्ठा॑मगच्छ॒त् तेनेन्द्र॑न्नि॒रवा॑सायय॒त् तेनेन्द्रः॑ पर॒माङ्काष्ठा॑मगच्छ॒त् तेना॒ऽग्नीषोमौ॑ नि॒रवा॑सायय॒त् तेना॒ग्नीषोमौ॑ प॒रमाङ्काष्ठा॑मगच्छता॒य्ँय [३०] ए॒वव्ँवि॒द्वान् द॑र्‌शपूर्णमा॒सौ यज॑ते पर॒मामे॒व काष्ठा᳚ङ्गच्छति॒ यो वै प्रजा॑तेन य॒ज्ञेन॒ यज॑ते॒ प्र प्र॒जया॑ प॒शुभि॑र् मिथु॒नैर् जा॑यते॒ द्वाद॑श॒ मासाः᳚ सव्ँवथ्स॒रो द्वाद॑श द्व॒न्द्वानि॑ दर्‌शपूर्णमा॒सयो॒स्तानि॑ सं॒पाद्या॒नीत्या॑हुर् व॒थ्सञ्चो॑पावसृ॒जत्यु॒खाञ्चाधि॑ श्रय॒त्यव॑ च॒ हन्ति॑ दृ॒षदौ॑ च स॒माह॒न्त्यधि॑ च॒ वप॑ते क॒पाला॑नि॒ चोप॑ दधाति पुरो॒डाशं॑ [३१] चाऽधि॒श्रय॒त्याज्य॑ञ्च स्तंबय॒जुश्च॒ हर॑त्य॒भि च॑ गृह्णाति॒ वेदि॑ञ्च परि गृ॒ह्णाति॒ पत्नी᳚ञ्च॒ संन॑ह्यति॒ प्रोख्‍ष॑णीश्चाऽऽसा॒दय॒त्याज्य॑ञ्चै॒तानि॒ वै द्वाद॑श द्व॒न्द्वानि॑ दर्‌शपूर्णमा॒सयो॒स्तानि॒ य ए॒वꣳ सं॒पाद्य॒ यज॑ते॒ प्रजा॑तेनै॒व य॒ज्ञेन॑ यजते॒ प्र प्र॒जया॑ प॒शुभि॑र् मिथु॒नैर् जा॑यते⁠ [३२] (उ॒क्थ्ये॑नोपा॒प्नोत्य॑गच्छता॒य्ँयः पु॑रो॒डाश॑ञ्चचत्वारि॒ꣳ॒शच्च॑) ॥९॥
ध्रु॒वो॑ऽसि ध्रु॒वो॑ऽहꣳ स॑जा॒तेषु॑ भूयास॒मित्या॑ह ध्रु॒वाने॒वैना᳚न् कुरुत उ॒ग्रो᳚ऽस्यु॒ग्रो॑ऽहꣳ स॑जा॒तेषु॑ भूयास॒मित्या॒हाप्र॑तिवादिन ए॒वैना᳚न् कुरुतेऽभि॒भूर॑स्यभि॒भूर॒हꣳ स॑जा॒तेषु॑ भूयास॒मित्या॑ह॒ य ए॒वैन॑म्प्रत्यु॒त्पिपी॑ते॒ तमुपा᳚स्यते यु॒नज्मि॑ त्वा॒ ब्रह्म॑णा॒ दैव्ये॒नेत्या॑है॒ष वा अ॒ग्नेर्योग॒स्तेनै॒ [३३] वैन॑य्ँयुनक्ति य॒ज्ञस्य॒ वै समृ॑द्धेन दे॒वाः सु॑व॒र्गल्ँलो॒कमा॑यन्‌य॒ज्ञस्य॒ व्यृ॑द्धे॒नासु॑रा॒न् परा॑ऽभावय॒न्‌यन्मे॑ अग्ने अ॒स्य य॒ज्ञस्य॒ रिष्या॒दित्या॑ह य॒ज्ञस्यै॒व तथ्समृ॑द्धेन॒ यज॑मानः सुव॒र्गल्ँलो॒कमे॑ति य॒ज्ञस्य॒ व्यृ॑द्धेन॒ भ्रातृ॑व्या॒न् परा॑ भावयत्यग्निहो॒त्रमे॒ताभि॒र् व्याहृ॑तीभि॒रुप॑ सादयेद्यज्ञमु॒खव्ँवा अ॑ग्निहो॒त्रम्ब्रह्मै॒ता व्याहृ॑तयो यज्ञमु॒ख ए॒व ब्रह्म॑ [३४] कुरुते सव्ँवथ्स॒रे प॒र्याग॑त ए॒ताभि॑रे॒वोप॑ सादये॒द्ब्रह्म॑णै॒वोभ॒यतः॑ सव्ँवथ्स॒रम्परि॑ गृह्णाति दर्‌शपूर्णमा॒सौ चा॑तुर्मा॒स्यान्या॒लभ॑मान ए॒ताभि॒र् व्याहृ॑तीभिर्‌ह॒वीꣴष्यासा॑दयेद् यज्ञमु॒खव्ँवै द॑र्‌शपूर्णमा॒सौ चा॑तुर्मा॒स्यानि॒ ब्रह्मै॒ता व्याहृ॑तयो यज्ञमु॒ख ए॒व ब्रह्म॑ कुरुते सव्ँवथ्स॒रे प॒र्याग॑त ए॒ताभि॑रे॒वासा॑दये॒द् ब्रह्म॑णै॒वोभ॒यतः॑ सव्ँवथ्स॒रं परि॑गृह्णाति॒ यद्वै य॒ज्ञस्य॒ साम्ना᳚ क्रि॒यते॑ रा॒ष्ट्र [३५] य्ँय॒ज्ञस्या॒*शीर्ग॑च्छति॒ यदृ॒चा विश॑य्ँय॒ज्ञस्या॒ *शीर्ग॑च्छ॒त्यथ॑ ब्राह्म॒णो॑ऽना॒शीर्के॑ण य॒ज्ञेन॑ यजते सामिधे॒नीर॑नुव॒ख्‍ष्यन्ने॒ता व्याहृ॑तीः पु॒रस्ता᳚द्दद्ध्या॒द् ब्रह्मै॒व प्र॑ति॒पद॑ङ्कुरुते॒ तथा᳚ ब्राह्म॒णः साशी᳚र्केण य॒ज्ञेन॑ यजते॒ यङ्का॒मये॑त॒ यज॑मान॒म्भ्रातृ॑व्यमस्य य॒ज्ञस्या॒*शीर्ग॑च्छे॒दिति॒ तस्यै॒ता व्याहृ॑तीः पुरोनुवा॒क्या॑यान्दद्ध्याद् भ्रातृव्यदेव॒त्या॑ वै पु॑रोनुवा॒क्या᳚ भ्रातृ॑व्यमे॒वास्य॑ य॒ज्ञस्या॒ [३६] ऽऽशीर्ग॑च्छति॒ यान् का॒मये॑त॒ यज॑मानान्थ् स॒माव॑त्येनान् य॒ज्ञस्या॒ऽऽशीर्ग॑च्छे॒दिति॒ तेषा॑मे॒ता व्याहृ॑तीः पुरोनुवा॒क्या॑या अर्द्ध॒र्च एका᳚न्दद्ध्याद्या॒ज्या॑यै पु॒रस्ता॒देका᳚य्ँया॒ज्या॑या अर्द्ध॒र्च एका॒न्तथै॑नान्थ् स॒माव॑ती य॒ज्ञस्या॒ऽऽशीर्ग॑च्छति॒ यथा॒ वै प॒र्जन्यः॒ सुवृ॑ष्ट॒व्ँवर्‌ष॑त्ये॒वय्ँय॒ज्ञो यज॑मानाय वर्‌षति॒ स्थल॑योद॒कम्प॑रिगृ॒ह्णन्त्या॒शिषा॑ य॒ज्ञय्ँयज॑मानः॒ परि॑ गृह्णाति॒ मनो॑ऽसि प्राजाप॒त्यं [३७] मन॑सा मा भू॒तेनाऽऽवि॒शेत्या॑ह॒ मनो॒ वै प्रा॑जाप॒त्यम्प्रा॑जाप॒त्यो य॒ज्ञो मन॑ ए॒व य॒ज्ञमा॒त्मन् ध॑त्ते॒ वाग॑स्यै॒न्द्री स॑पत्न॒ख्‍षय॑णी वा॒चा मे᳚न्द्रि॒येणाऽऽवि॒शेत्या॑है॒न्द्री वै वाग्वाच॑मे॒वैन्द्री मा॒त्मन् ध॑त्ते⁠ [३८] (तेनै॒व ब्रह्म॑ रा॒ष्ट्रमे॒वास्य॑ य॒ज्ञस्य॑प्राजाप॒त्यꣳषट्त्रि॑ꣳशच्च) ॥१०॥
यो वै स॑प्तद॒शम्प्र॒जाप॑तिय्ँय॒ज्ञम॒न्वाय॑त्त॒व्ँवेद॒ प्रति॑ य॒ज्ञेन॑ तिष्ठति॒ न य॒ज्ञाद् भ्र॑ꣳशत॒ आ श्रा॑व॒येति॒ चतु॑रख्‍षर॒मस्तु॒ श्रौष॒डिति॒ चतु॑रख्‍षर॒य्ँयजेति॒ द्व्य॑ख्‍षर॒य्ँये यजा॑मह॒ इति॒ पञ्चा᳚ख्‍षरन्द्व्यख्‍ष॒रो व॑षट्का॒र ए॒ष वै स॑प्तद॒शः प्र॒जाप॑तिर् य॒ज्ञम॒न्वाय॑त्तो॒ य ए॒वव्ँवेद॒ प्रति॑ य॒ज्ञेन॑ तिष्ठति॒ न य॒ज्ञाद् भ्र॑ꣳशते॒ यो वै य॒ज्ञस्य॒ प्राय॑णम्प्रति॒ष्ठा [३९] मु॒दय॑न॒व्ँवेद॒ प्रति॑ष्ठिते॒नारि॑ष्टेन य॒ज्ञेन॑ स॒ꣴ॒स्थाङ्ग॑च्छ॒त्याश्रा॑व॒यास्तु॒ श्रौष॒ड्यज॒ ये यजा॑महे वषट्का॒र ए॒तद्वै य॒ज्ञस्य॒ प्राय॑णमे॒षा प्र॑ति॒ष्ठैतदु॒दय॑न॒य्ँय ए॒वव्ँवेद॒ प्रति॑ष्ठिते॒नाऽरि॑ष्टेन य॒ज्ञेन॑ स॒ꣴ॒स्थाङ्ग॑च्छति॒ यो वै सू॒नृता॑यै॒ दोह॒व्ँवेद॑ दु॒ह ए॒वैना᳚य्ँय॒ज्ञो वै सू॒नृताऽऽश्रा॑व॒येत्यैवैना॑मह्व॒दस्तु॒ [४०] श्रौष॒डित्यु॒पावा᳚स्रा॒ग्यजेत्युद॑नैषी॒द्ये यजा॑मह॒ इत्युपा॑ऽसदद् वषट्का॒रेण॑ दोग्द्ध्ये॒ष वै सू॒नृता॑यै॒ दोहो॒ य ए॒वव्ँवेद॑ दु॒ह ए॒वैना᳚न्दे॒वा वै स॒त्रमा॑सत॒ तेषा॒न्दिशो॑ऽदस्य॒न्त ए॒तामा॒र्द्राम्प॒ङ्क्तिम॑पश्य॒न्ना श्रा॑व॒येति॑ पुरोवा॒तम॑जनय॒न्नस्तु॒ श्रौष॒डित्य॒भ्रꣳ सम॑प्लावय॒न्॒‌यजेति॑ वि॒द्युत॑ [४१] मजनय॒न्॒‌ये यजा॑मह॒ इति॒ प्राव॑र्‌षयन्न॒भ्य॑स्तनयन् वषट्का॒रेण॒ ततो॒ वै तेभ्यो॒ दिशः॒ प्राप्या॑यन्त॒ य ए॒वव्ँवेद॒ प्रास्मै॒ दिशः॑ प्यायन्ते प्र॒जाप॑तिन्त्वो॒वेद॑ प्र॒जाप॑ति स्त्वव्ँवेद॒ यम्प्र॒जाप॑ति॒र् वेद॒ स पुण्यो॑ भवत्ये॒ष वै छ॑न्द॒स्यः॑ प्र॒जाप॑ति॒रा श्रा॑व॒याऽस्तु॒ श्रौष॒ड्यज॒ ये यजा॑महे वषट्का॒रो य ए॒वव्ँवेद॒ पुण्यो॑ भवति वस॒न्त [४२] मृ॑तू॒नाम्प्री॑णा॒मीत्या॑ह॒र्तवो॒ वै प्र॑या॒जा ऋ॒तूने॒व प्री॑णाति॒ ते᳚ऽस्मै प्री॒ता य॑थापू॒र्वङ्क॑ल्पन्ते॒ कल्प॑न्तेऽस्मा ऋ॒तवो॒ य ए॒वव्ँवेदा॒ग्नीषोम॑योर॒हन्दे॑वय॒ज्यया॒ चख्‍षु॑ष्मान् भूयास॒मित्या॑हा॒ग्नीषोमा᳚भ्यां॒ वै य॒ज्ञश्चख्‍षु॑ष्मा॒न् ताभ्या॑मे॒व चख्‍षु॑रा॒त्मन् ध॑त्ते॒ऽग्नेर॒हन्दे॑वय॒ज्यया᳚ऽन्ना॒दो भू॑यास॒मित्या॑हा॒ग्निर्वै दे॒वाना॑मन्ना॒दस्ते नै॒ वा [४३] ऽन्नाद्य॑मा॒त्मन् ध॑त्ते॒ दब्धि॑र॒स्यद॑ब्धो भूयासम॒मुन्द॑भेय॒मित्या॑है॒तया॒ वै दब्द्ध्या॑ दे॒वा असु॑रानदभ्नुव॒न्तयै॒व भ्रातृ॑व्यन्दभ्नोत्य॒ग्नीषोम॑योर॒हन्दे॑वय॒ज्यया॑ वृत्र॒हा भू॑यास॒मित्या॑हा॒ऽग्नीषोमा᳚भ्या॒व्ँवा इन्द्रो॑ वृ॒त्रम॑ह॒न्ताभ्या॑मे॒व भ्रातृ॑व्यꣴ स्तृणुत इन्द्राग्नि॒योर॒हन्दे॑वय॒ज्यये᳚न्द्रिया॒व्य॑न्ना॒दो भू॑यास॒मित्या॑हेन्द्रिया॒व्ये॑वान्ना॒दो भ॑व॒तीन्द्र॑स्या॒ [४४] ऽहन्दे॑वय॒ज्यये᳚न्द्रिया॒वी भू॑यास॒मित्या॑हेन्द्रिया॒व्ये॑व भ॑वति महे॒न्द्रस्या॒ऽहन्दे॑वय॒ज्यया॑ जे॒मानं॑ महि॒मान॑ङ्गमेय॒मित्या॑ह जे॒मान॑मे॒व म॑हि॒मान॑ङ्गच्छत्य॒ग्नेः स्वि॑ष्ट॒कृतो॒ऽहन्दे॑वय॒ज्ययाऽऽयु॑ष्मान्‌य॒ज्ञेन॑ प्रति॒ष्ठाङ्ग॑मेय॒मित्या॒हायु॑रे॒वात्मन् ध॑त्ते॒ प्रति॑ य॒ज्ञेन॑ तिष्ठति⁠ [४५] (प्र॒ति॒ष्ठाम॑ह्व॒दस्तु॑वि॒द्युतं॑वस॒न्तंतेनै॒वेन्द्र॑स्या॒ऽष्टात्रि॑ꣳशच्च) ॥११॥
इन्द्र॑व्ँवो वि॒श्वत॒स्परि॒ हवा॑महे॒ जने᳚भ्यः⁠। अ॒स्माक॑मस्तु॒ केव॑लः⁠॥ इन्द्र॒न्नरो॑ ने॒मधि॑ता हवन्ते॒ यत्पार्या॑ यु॒नज॑ते॒ धिय॒स्ताः⁠। शूरो॒ नृषा॑ता॒ शव॑सश्चका॒न आ गोम॑ति व्र॒जे भ॑जा॒ त्वन्नः॑⁠॥ इ॒न्द्रि॒याणि॑ शतक्रतो॒ या ते॒ जने॑षु प॒ञ्चसु॑⁠॥ इन्द्र॒ तानि॑ त॒ आ वृ॑णे⁠॥ अनु॑ ते दायि म॒ह इ॑न्द्रि॒याय॑ स॒त्रा ते॒ विश्व॒मनु॑ वृत्र॒हत्ये᳚⁠। अनु॑ [४६] ख्‍ष॒त्रमनु॒ सहो॑ यज॒त्रेन्द्र॑ दे॒वेभि॒रनु॑ ते नृ॒षह्ये᳚⁠॥ आयस्मि᳚न्थ् स॒प्तवा॑स॒वा स्तिष्ठ॑न्ति स्वा॒रुहो॑ यथा⁠। ऋषि॑र्‌ह दीर्घ॒श्रुत्त॑म॒ इन्द्र॑स्य घ॒र्मो अति॑थिः⁠॥ आ॒मासु॑ प॒क्वमैर॑य॒ आ सूर्य॑ꣳ रोहयो दि॒वि⁠। घ॒र्मन्न साम॑न्तपता सुवृ॒क्तिभि॒र् जुष्ट॒ङ्गिर्व॑णसे॒ गिरः॑⁠॥ इन्द्र॒मिद् गा॒थिनो॑ बृ॒हदिन्द्र॑म॒र्केभि॑र॒र्किणः॑⁠। इन्द्र॒व्ँवाणी॑रनूषत⁠॥ गाय॑न्ति त्वा गाय॒त्रिणो [४७] ऽर्च॑न्त्य॒र्कम॒र्किणः॑⁠। ब्र॒ह्माण॑स्त्वा शतक्रत॒वुद्व॒ꣳ॒शमि॑व येमिरे⁠॥ अ॒ꣳ॒हो॒मुचे॒ प्र भ॑रेमा मनी॒षामो॑षिष्ठ॒दाव्‌न्ने॑ सुम॒तिङ्गृ॑णा॒नाः⁠। इ॒दमि॑न्द्र॒ प्रति॑ ह॒व्यङ्गृ॑भाय स॒त्याः स॑न्तु॒ यज॑मानस्य॒ कामाः᳚⁠॥ वि॒वेष॒ यन्मा॑ धि॒षणा॑ ज॒जान॒ स्तवै॑ पु॒रा पार्या॒दिन्द्र॒मह्नः॑⁠। अꣳह॑सो॒ यत्र॑ पी॒पर॒द्यथा॑ नो ना॒वेव॒ यान्त॑ मु॒भये॑ हवन्ते⁠॥ प्र स॒म्राज॑म्प्रथ॒मम॑द्ध्व॒राणा॑ [४८] मꣳहो॒मुच॑व्ँवृष॒भय्ँय॒ज्ञिया॑नाम्⁠। अ॒पान्नपा॑तमश्विना॒ हय॑न्तम॒स्मिन्न॑र इन्द्रि॒यन्ध॑त्त॒मोजः॑⁠॥ वि न॑ इन्द्र॒ मृधो॑ जहि नी॒चा य॑च्छ पृतन्य॒तः⁠। अ॒ध॒स्प॒दन्तमी᳚ङ्कृधि॒ यो अ॒स्माꣳ अ॑भि॒दास॑ति⁠॥ इन्द्र॑ ख्‍ष॒त्रम॒भि वा॒ममोजोऽजा॑यथा वृषभ चर्‌षणी॒नाम्⁠। अपा॑नुदो॒ जन॑ममित्र॒यन्त॑मु॒रुन्दे॒वेभ्यो॑ अकृणोरु लो॒कम्⁠॥ मृ॒गो न भी॒मः कु॑च॒रो गि॑रि॒ष्ठाः प॑रा॒वत॒ [४९] आ ज॑गामा॒ पर॑स्याः⁠। सृ॒कꣳ स॒ꣳ॒शाय॑ प॒विमि॑न्द्र ति॒ग्मव्ँवि शत्रू᳚न् ताढि॒ विमृधो॑ नुदस्व⁠॥ वि शत्रू॒न्॒‌वि मृधो॑ नुद॒ विवृ॒त्रस्य॒ हनू॑ रुज⁠। वि म॒न्युमि॑न्द्र भामि॒तो॑ऽमित्र॑स्याऽभि॒दास॑तः⁠॥ त्रा॒तार॒मिन्द्र॑मवि॒तार॒मिन्द्र॒ꣳ॒ हवे॑हवे सु॒हव॒ꣳ॒ शूर॒मिन्द्र᳚म्⁠। हु॒वे नु श॒क्रम्पु॑रुहू॒तमिन्द्र॑ꣴ स्व॒स्ति नो॑ म॒घवा॑ धा॒त्विन्द्रः॑⁠॥ मा ते॑ अ॒स्याꣳ [५०] स॑हसाव॒न् परि॑ष्टाव॒घाय॑ भूम हरिवः परा॒दै⁠। त्राय॑स्व नोऽवृ॒केभि॒र् वरू॑थै॒स्तव॑ प्रि॒यासः॑ सू॒रिषु॑ स्याम⁠॥ अन॑वस्ते॒ रथ॒मश्वा॑य तख्‍ष॒न् त्वष्टा॒ वज्र॑म्पुरुहूत द्यु॒मन्त᳚म्⁠। ब्र॒ह्माण॒ इन्द्र॑म्म॒हय॑न्तो अ॒र्कैरव॑र्द्धय॒न्नह॑ये॒ हन्त॒वा उ॑⁠॥ वृष्णे॒ यत् ते॒ वृष॑णो अ॒र्कमर्चा॒निन्द्र॒ ग्रावा॑णो॒ अदि॑तिः स॒जोषाः᳚⁠। अ॒न॒श्वासो॒ ये प॒वयो॑ऽर॒था इन्द्रे॑षिता अ॒भ्यव॑र्त्तन्त॒ दस्यू॑न्⁠ [५१] (वृ॒त्र॒हत्येऽनु॑गाय॒त्रिणो᳚ऽद्ध्व॒राणां᳚परा॒वतो॒ऽस्याम॒ष्टाच॑त्वारिꣳशच्च) ॥१२॥
(सन्त्वा॑ सिञ्चामिध्रु॒वो᳚ऽस्य॒ग्निर्मा॑ब॒र्॒‌हिषो॒ऽहमा प्या॑यता॒मग॑न्म॒यथा॒ वैयो वै श्र॒द्धां प्र॒जाप॑ति॒र् यज्ञान्ध्रु॒वो॑ऽसीत्या॑ह॒यो वै स॑प्तद॒शमिन्द्र॑व्ँवो॒द्वाद॑श)
(सन्त्वा॑ब॒र्॒‌हिषो॒ऽहंयथा॒ वाए॒वव्ँवि॒द्वाञ्छ्रौष॑ट्थ्सहसाव॒न्नेक॑पञ्चा॒शत्)
(सन्त्वा॑सिञ्चामि॒ दस्यू॑न्)
अनुवाकाः पञ्चशती
१२ ५१